МУС Беларусі: Ніякіх даведак для выезду за мяжу без пашпарта ў нас не існуе
11 верасня пасьля сустрэчы ў Мінску Аляксандра Лукашэнкі з амерыканскай дэлегацыяй былі выпушчаныя з месцаў зняволення 52 чалавекі, сярод якіх 14 замежных грамадзян і 38 беларускіх палітвязняў. Усіх іх прымусова вывезлі ў Літву, а неўзабаве частка палітзняволеных даведалася, што іх вывезлі без пашпартоў, толькі з даведкай, якая пацвярджае асобу. «Радыё Свабода» паспрабавала даведацца ў чыноўнікаў, якія законы гэта дапускаюць.
«Я на пенсіі. Без каментароў», — адказаў журналісту «Радыё Свабода» 17 верасня былы кіраўнік дэпартамента грамадзянства і міграцыі Міністэрства ўнутраных спраў Беларусі Аляксей Бягун. Менавіта ягоны подпіс стаіць на даведках, выдадзеных палітвязням, хоць яго адправілі ў адстаўку яшчэ 8 верасня.
У самім гэтым дэпартаменце нічога не тлумачаць пра даведкі, якія аказаліся на руках некаторых вызваленых 11 верасня. Так, начальніку ўпраўлення грамадзянства, пашпартнай працы і выезду за мяжу МУС Беларусі Паўлу Хрышчановічу пра такія дакументы нічога невядома:
«Даведка, якая пацвярджае асобу… А што гэта за даведка? У сувязі з чым яна можа выдавацца? У нас ёсць даведка, калі чалавек згубіў пашпарт, і вось ён звяртаецца ў падраздзяленне па грамадзянстве і міграцыі, і яму выдаюць на час вырабу новага пашпарта даведку формы № 9 на месяц, і ён ёю карыстаецца як дакументам, які пацвярджае асобу на тэрыторыі краіны. Вось гэта толькі ёсць такая даведка», — сказаў Павел Хрышчановіч карэспандэнту «Радыё Свабода», які прадставіўся грамадзянінам Беларусі.
Паводле міліцэйскага начальніка, з даведкай, якая часова замяняе пашпарт, за мяжу выязджаць нельга.
«Акрамя пашпарта — біяметрычнага пашпарта ці пашпарта старога ўзору 1996 году, іншых дакументаў для грамадзян Беларусі для выезду за мяжу ў нас не існуе», — сказаў ён.
Цяпер чытаюць
Ціханоўскі: Ціханоўскай можна было ў 2020‑м не пабаяцца турмы. І, можа, у беларусаў быў бы шанец95
Каментары
Але ў гэтай няма нумара формы і запісу, кім зацверджана форма.
Прыдумалі новую катэгорыю для экспатрыяцыі (не блытаць з дэпартацыяй, якая тычыцца замежнікаў, "чужых" для краіны) і праз заканадаўства (пакуль?) не правялі.
Сам схематоз класічны: "а чалавек, які гэта зрабіў і тут падпісаўся, ў нас ужо не працуе".
Вывезці кагосьці без дакументаў яны не могуць.
Ясна, што зараз было выключэнне з агульнай працэдуры (няважна, па звычайнаму або дыпламатычнаму каналу). І яно адбывалася менавіта з-за экспатрыяцыі без дакументаў па рашэнню РБ, "часам не да законаў".