Прэзідэнт ЗША Дональд Трамп распрацоўвае стратэгію стварэння «Фонду перамогі Украіны», які будзе фінансавацца за кошт рэзкага павышэння тарыфаў на імпарт з Кітая, піша The Telegraph.
Як піша выданне, Дональд Трамп даручыў свайму міністру фінансаў Скоту Бесэнту абмеркаваць з еўрапейскімі партнёрамі план фінансавання падтрымкі Украіны.
Стратэгія прадугледжвае ўвядзенне 500‑працэнтнага збору на імпарт з Кітая, атрыманыя грошы будуць накіраваныя на закупку ўзбраення для ўкраінскай арміі.
Як паведаміў сам Бесэнт журналістам: «Прэзідэнт Трамп даручыў амбасадару і мне сказаць нашым еўрапейскім саюзнікам, што мы б падтрымалі тое, што вы назвалі б «тарыфам на расійскую нафту для Кітая» або «тарыфам украінскай перамогі» на Кітай».
Мэта гэтай ініцыятывы — аказаць максімальны эканамічны ціск на Уладзіміра Пуціна, чыя ваенная машына, паводле заходніх ацэнак, моцна залежыць ад кітайскай падтрымкі.
«Мы адкажам, калі нашы еўрапейскія партнёры далучацца да нас», — дадаў Скот Бесэнт, падкрэсліўшы неабходнасць удзелу Еўропы.
Раней еўрапейскія ўрады блакіравалі ідэю ўвядзення санкцый супраць Кітая за закупкі расійскай нафты.
Пытанне фінансаў зноў стала актуальным пасля таго, як міністр абароны Украіны Дзяніс Шмыгаль заявіў саюзнікам, што для працягу супраціву ў 2026 годзе Украіне спатрэбіцца $120 мільярдаў.
Каментары
Загараджальныя мыты супраць кітайскіх тавараў трэба ўвесці пад сцягам дапамогі Украіны, а потым пакінуць іх назаўжды
Але пачакаем, ці не застанецца гэта звычайнай балбатнёй