Пратэсты пасля прэзідэнцкіх выбараў у Танзаніі: сотні загінулых

Сотні людзей загінулі ў Танзаніі за тры дні пратэстаў пасля ўсеагульных выбараў у сераду, заявіла галоўная апазіцыйная партыя краіны, піша Бі-бі-сі.

Прадстаўнік апазіцыйнай партыі «Чадэма» паведаміў агенцтву AFP, што «каля 700» чалавек былі забітыя ў сутыкненнях з сіламі бяспекі; дыпламатычная крыніца ў Танзаніі паведаміла Бі-бі-сі, што ёсць дакладныя доказы гібелі як мінімум 500 чалавек.

Ацэнкі колькасці загінулых розняцца, а адключэнне інтэрнэту па ўсёй краіне ўскладняе праверку даных.

Урад спрабуе паменшыць маштабы гвалту — улады працягнулі каменданцкую гадзіну, каб задушыць беспарадкі.

Дэманстрацыі праходзяць у асноўным сярод моладзі, якая выходзіць на вуліцы гарадоў па ўсёй Танзаніі, пратэстуючы супраць несправядлівых выбараў.

Пратэстоўцы вінавацяць улады ў падрыве дэмакратыі шляхам пераследу лідараў апазіцыі — адзін знаходзіцца ў турме, другога знялі з выбараў па тэхнічных падставах — каб у прэзідэнта Саміі Сулуху Хасан не было канкурэнтаў.

Пратэсты працягнуліся ў пятніцу, калі дэманстранты ў сталіцы краіны, партовым горадзе Дар-эс-Салам праігнаравалі патрабаванні вайскоўцаў спыніць беспарадкі.

Міністр замежных спраў Махмуд Комба Табіт заявіў, што гвалт меў месца ў выглядзе некалькіх ізаляваных інцыдэнтаў і сказаў, што сілы бяспекі дзейнічалі вельмі хутка і рашуча, каб урэгуляваць сітуацыю.

«Мы таксама працягваем атрымліваць паведамленні аб вандалізме», — сказаў міністр, дадаўшы, што адключэнне інтэрнэту было неабходна для выратавання жыццяў людзей.

Журналістам і праваабарончым арганізацыям цяжка праверыць паведамленні аб загінулых, а бальніцы адмаўляюцца прадастаўляць інфармацыю аб ахвярах.

Крыніца ў адной з бальніц Дар-эс-Салама паведаміла, што з чацвярга яна перапоўнена пацярпелымі, і большасць дзяржаўных бальніц горада знаходзяцца ў аналагічнай сітуацыі, а моргі перапоўнены.

Адзін з кіраўнікоў партыі «Чадэма» заявіў, што баіцца за сваё жыццё, паколькі «разня адбываецца ноччу, калі ніхто не можа гэта ўбачыць».

«[Сілы бяспекі] шукаюць усіх нашых лідараў, і некаторым давялося пакінуць краіну. Гэтыя людзі забіваюць беспакарана», — сказаў Джон Кітока, дырэктар партыі па замежных справах і справах дыяспар.

«Мы застаемся занепакоеныя тым, што перадвыбарчы перыяд быў адзначаны пераследамі, выкраданнямі і запалохваннем апазіцыйных дзеячаў, журналістаў і прадстаўнікоў грамадзянскай супольнасці», — дадаў ён.

ААН заклікала сілы бяспекі Танзаніі ўстрымацца ад прымянення празмернай сілы, а міністры замежных спраў Вялікабрытаніі, Канады і Нарвегіі выступілі з сумеснай заявай, заклікаючы ўлады «дзейнічаць максімальна стрымана» і паважаць свабоду выказвання меркаванняў.

У паўаўтаномным архіпелагу Занзібар, які выбірае ўласны ўрад і лідара, кіраўнік, які прадстаўляе кіроўную партыю «Чама Ча Мапіндузі» Хусейн Мвіньі перамог, набраўшы амаль 80% галасоў.

Апазіцыя Занзібара заявіла аб масавых фальсіфікацыях.

Турысты на востраве, па паведамленнях, затрымаліся ў аэрапорце, так як пратэсты на мацерыку і адключэнне інтэрнэту затрымліваюць рэйсы.

Афіцыйныя вынікі павінны быць названыя ў суботу, але чакаецца, што пераможцам аб'явяць прэзідэнта Самію Сулуху Хасан.

Яна прыйшла да ўлады ў 2021 годзе пасля смерці былога прэзідэнта Джона Магуфулі і стала першай жанчынай на чале Танзаніі.

Спачатку Самія атрымала прызнанне за паслабленне палітычных рэпрэсій, але затым палітычная прастора звузілася, а яе ўрад сталі абвінавачваць у пераследзе апанентаў шляхам арыштаў і выкраданняў.

У цяперашніх выбарах планавалі ўдзельнічаць два асноўныя апазіцыйныя кандыдаты — Тунду Лісу, які ўтрымліваецца пад вартай па абвінавачванні ў дзяржаўнай здрадзе, і Лухага Мпіна, якога да выбараў не дапусцілі.

• 0
• 0
• 0
• 2
• 1
• 1
• 3
• 0