Пачобут не стаў размаўляць з шасцёркамі — ні з Пратасевічам, ні з Васкрасенскім
Так, відаць, супала, але ў адзін і той жа дзень два найбольш вядомыя перабежчыкі з дэмакратычнага лагера ў праўладны, Раман Пратасевіч і Юрый Васкрасенскі, падзяліліся гісторыямі пра тое, як яны хацелі падабраць ключы да палітзняволенага журналіста Андрэя Пачобута, але той іх катэгарычна адшыў.
Раман Пратасевіч расказаў сваю гісторыю падчас эфіру ў праграме прапагандыста Рыгора Азаронка, калі той спытаўся ягоную думку пра тое, што далей будзе з Андрэем Пачобутам у ходзе развіцця магчымага дыялогу рэжыму Лукашэнкі з Польшчай.
«Магу сказаць толькі тое, што пэўны час таму я спрабаваў пабачыцца з тым самым грамадзянінам (маецца на ўвазе Андрэй Пачобут — Заўв. рэд.), але ён увогуле катэгарычна адмовіўся сустракацца, пачаў гаварыць нецэнзурна і гэтак далей. На гэтым уся гэта гісторыя і скончылася», — сказаў на гэта Пратасевіч.
Практычна аналагічную гісторыю падчас сённяшняй размовы з праваабаронцам Леанідам Судаленкам расказаў і Юрый Васкрасенскі:
«Я сустракаўся з Пачобутам у Следчым камітэце, у прысутнасці часовага паверанага ў справах Польшчы. Як ён накінуўся, пачаў абражаць, крычаць! Гэта значыць паводзіў сябе як сацыяпат. Хоць я яго наогул упершыню ў жыцці ўбачыў. Я ж яму ніколі кепскага нічога не рабіў, не зычыў».
Варта адзначыць, што падобную гісторыю Васкрасенскі расказваў яшчэ ў красавіку 2023 года, прытым яна і тады ўжо адбылася «прыкладна паўтара года таму». Калі сваю спробу рабіў Пратасевіч — невядома, але можна меркаваць, што яна магла мець месца прыкладна год таму, калі ўлады спрабавалі выкарыстаць гэтага блогера для прапагандысцкага выкарыстання ключавых палітзняволеных. Менавіта тады ў эфір выйшлі фрагменты ягонай размовы з Віктарам Бабарыкам.
У кожным разе выглядае, што Андрэй Пачобут цудоўна разумее нікчэмнасць фігур як Васкрасенскага, так і Пратасевіча, а таму катэгарычна ўхіляецца ад любых кантактаў з імі.
Каментары
[Зрэдагавана]