Каля 40 чалавек загінулі, больш за 100 з траўмамі. Ахвяры страшнага пажару на раскошным альпійскім курорце
У выніку пажару, які ўспыхнуў у навагоднюю ноч у бары на гарналыжным курорце Кран-Мантана на паўднёвым захадзе Швейцарыі, загінулі каля 40 чалавек. Пра гэта паведаміў кіраўнік мясцовай паліцыі, піша Бі-бі-сі.
Шэф паліцыі кантона Вале Фрэдэрык Гілер сказаў на прэс-канферэнцыі, што апёкі і траўмы атрымалі 115 чалавек.
Паводле слоў Гілера, апазнанне загінулых, як і некаторых асоб, што атрымалі цяжкія апёкі, зойме пэўны час. Вядома, што сярод загінулых ёсць і швейцарцы, і замежныя турысты. МЗС Беларусі ў сваю чаргу паведамляла, што ім пакуль не паступала інфармацыі пра пацярпелых беларусаў.
Пажар успыхнуў у 1:30 ночы па мясцовым часе ў бары пад назвай Le Constellation. 60 пацярпелых дастаўлены ў бальніцу сталіцы кантона, Сьёна. Астатніх, як паведаміў кіраўнік мясцовай паліцыі, транспартавалі ў бальніцы Жэневы, Лазаны, Берна і Цюрыха. Дапамогу ў лячэнні пацярпелых прапанавалі і суседнія краіны: Францыя, Германія і Італія.
Прычына пажару, як сказала генеральны пракурор Швейцарыі Беатрыс Пілу, пакуль канчаткова не вызначана: следства вывучае некалькі версій.
Відавочцы пажару раней расказалі журналістам, што агонь успыхнуў з-за ўстаўленага ў бутэльку шампанскага феерверка, які паднеслі занадта блізка да столі. Полымя, паводле слоў сведак, вельмі хутка распаўсюдзілася па ўсёй столі.
Кран-Мантана — гэта фешэнэбельны курорт у кантоне Вале. У святочныя дні ён звычайна цалкам запоўнены: на прыкладна 10 000 жыхароў тут каля 2600 гатэльных месцаў.
Цяпер чытаюць
Што вядома пра затрыманых радыёаматараў, якім пагражае аж да расстрэлу12
Каментары