Экс-журналістка дзяржаўных СМІ, якая збірала данаты на ежу, аказалася дачкой супрацоўніка КДБ. У яго нават ёсць пашпарт прыкрыцця
У пачатку студзеня «Люстэрка» пісала пра былую журналістку дзяржвыданняў і прыхільніцу ўлады Дар’ю Іванову, якая скардзілася, што месяцамі нідзе не можа знайсці добрую працу, і збірала данаты на ежу. Пасля гэтай публікацыі журналісты даведаліся, што жанчына да таго ж з’яўляецца дачкой супрацоўніка Цэнтральнага апарата КДБ. Звесткі пацвердзіла аб’яднанне былых сілавікоў «Белпол».
«Калі яна стала Івановай, невядома. Былы муж — кітаец, дзявочае прозвішча — Чупахіна», — адзначыў чытач. Відаць, Дар’я прайшла афіцыйную працэдуру змены прозвішча, бо паводле пашпартных звестак яна, паведамілі ў «Белполе», сапраўды Іванова. Мяркуючы з сацсетак, гэта дзявочае прозвішча яе маці.
Бацьку Дар’і завуць Чупахін Аляксандр Уладзіміравіч, ён нарадзіўся ў 1974 годзе, цяпер яму 51. Ён служыць або служыў у Цэнтральным апараце КДБ з 2004‑га і як мінімум да 2019‑га (згодна з наяўнай у «Белполе» базе звестак, актуальнай на 2021 год, апошні запіс пра працу ў КДБ у Чупахіна — за 2019-ы, але гэта не азначае, што гэта апошні год яго службы ў ведамстве).
Больш за тое, у Чупахіна ёсць пашпарт прыкрыцця на імя «Чаркасаў Аляксандр Уладзіміравіч», паведамілі «Люстэрку».
Па актыўнасці ягонага акаўнта ў Telegram, дзе ён падпісаны як Aleks Markus, мужчына цікавіцца зброяй і нажамі, перыядычна здзяйсняе паездкі ў Расію. Старонкі ў сацсетках знайсці не ўдалося.
У Дар’і і яе бацькі ёсць жыллё ў Мінску. Маюцца звесткі пра іх рэгістрацыю на працягу апошніх гадоў у шматкватэрных дамах на Ігуменскім тракце (2005 года пабудовы) — менавіта там, хутчэй за ўсё, жыве Аляксандр Чупахін — і на вуліцы Карповіча ў Копішчы (2019 года пабудовы), побач з ЖК «Новая Баравая». З 2019‑га Дар’я карысталася службамі дастаўкі па абодвух адрасах.
Цікава, што на дзяржаўнай службе ў сям’і Дар’і быў не толькі бацька. Яго бацькі ўсё жыццё жылі ў Слуцку, у маладосці былі камсамольскімі актывістамі. Дзед Дар’і Уладзімір Чупахін быў вайскоўцам — ніжэй на фота 1982 года ён у форме капітана савецкай арміі.
А бабуля Дар’і, як сцвярджае крыніца «Люстэрка», Людміла Чупахіна была дырэктарам Слуцкага кансервавага завода (з 2012 года ён уваходзіць у склад ААТ «Слуцкі сырзавод»), але пацвярджэння гэтых звестак няма. Пры гэтым у сацсетках Людмілы шмат фотаздымкаў за 2010‑я гады, дзе яна прысутнічае на розных афіцыйных мерапрыемствах і святах.
Дар’я Іванова адрэагавала на папярэднюю публікацыю «Люстэрка».
«Маю асабістую гісторыю СМІ спрабуюць ператварыць у танны хайп і збор данатаў. Яны інтэрпрэтавалі мой пост ледзь не як прасіцельства— хоць мне не патрэбны падарункі. Мне трэба, каб тыя, хто наймае людзей, выконвалі ЗАКОН! <…> Раней я працавала ў дзяржаўных СМІ і спяшаюся нагадаць: журналіст гучыць ганарова. <…> Я — не ахвяра. Я самотная маці і спецыяліст, якая патрабуе базавых і адэкватных умоў. На якія я, дарэчы, маю права, і якія прапісаны ў Канстытуцыі. Таму перастаньце распаўсюджваць фэйкі пра былую супрацоўніцу, якая мае патрэбу ў падтрымцы». Мой капітал — мой інтэлект, досвед і веданне закона. І менавіта іх я буду выкарыстоўваць, каб дапамагаць іншым маці не даваць сябе ў бяду», — заявіла Дар’я ў сацсетках.
Яна таксама панаракала на непрафесіяналізм. Аргументам было тое, што яе фота ў міліцэйскай форме, размешчанае ў артыкуле і ўзятае з яе сацсетак, нібыта было створана з дапамогай нейрасетак яшчэ ў 2023 годзе, а аўтары матэрыялу прынялі яго за сапраўднае.
Аднак ШІ-генератары на той момант не былі здольныя ствараць такія якасныя выявы без артэфактаў, і на рэальнасць фота паказваюць таксама святло, цені і мноства іншых дэталяў.
Цяпер чытаюць
З праекта будаўніцтва мінскага метро выкінулі яшчэ дзве станцыі — «Кіеўскі сквер» і «Політэхнічную»7
Каментары