«Дайце мне пыласос». Васілеўская ўспомніла, як рабіла ўборку на МКС. І расказала пра сумесную традыцыю з Навіцкім
Беларуская касмічная турыстка ў інтэрв'ю noi.md паразважала, ці ёсць прадузятасць з боку мужчын-касманаўтаў да калег-жанчын. І папрасіла ўсюды запрашаць яе адразу з Алегам Навіцкім.
Першая беларуская касмічная турыстка Марына Васілеўская распавяла, што не сутыкалася з прадузятасцю з боку мужчын-касманаўтаў.
Наадварот, сама Васілеўская вырашыла праявіць сябе на МКС як гаспадыня.
«Хутчэй, гэта не мужчыны, а я падкрэслівала сваю асаблівасць як дзяўчына, як гаспадынька. Адлятаючы са станцыі, я разумела, што хлопцы не паспелі зрабіць уборку, бо былі выхадныя — субота і нядзеля. Звычайна ў суботу ладзіцца уборка станцыі. Але мы прыляцелі і трошкі збілі ўсім графік, працавалі без выхадных.
Калі я выканала ўсю працу, то азірнулася: «Так, што тут у нас? Нешта ў нас бруднавата, усе вентылятары забітыя», — распавяла Васілеўская.
Яна папрасіла калег даць ёй пыласос, каб усё пачысціць.
«І кажу хлопцам: дайце мне пыласос, анучкі, я тут прыбяруся. Увогуле, думала прыбраць адзін сегмент, а ў выніку прыбрала ўсё, у тым ліку ўвесь расійскі сегмент. І з чыстым сумленнем, з пачуццём выкананага абавязку, што навяла парадак, паляцела дадому», — успомніла Васілеўская.
У гэтым жа інтэрв'ю яна згадала і касманаўта Алега Навіцкага. Апошнім часам ходзяць устойлівыя чуткі, што Васілеўская і Навіцкі таемна пабраліся шлюбам. Яны паўсюль з'яўляюцца разам і носяць пярсцёнкі.
Распавядаць пра асабістае жыццё Васілеўская не стала. Але прапанавала запрашаць яе ўсюды менавіта з Навіцкім. Таму што ў іх ёсць «традыцыя ездзіць разам».
«Вы запрашайце, а мы па магчымасці наведаем вашу краіну. Запрашайце нас адразу разам з Алегам Віктаравічам Навіцкім — у нас ужо добрыя традыцыі ездзіць разам, таму будзе цудоўна», — сказала Васілеўская.
Выгнаў жонку зімой на вуліцу, забраў малую дачку: дэталі разводу касманаўта Алега Навіцкага, які, здаецца, цяпер ажаніўся з Васілеўскай
Судзімасць бацькі, дзівосы з адукацыяй, прагалы ў біяграфіі — таямніцы жыцця першай беларускай касманаўткі
Касмічная турыстка Марына Васілеўская выйшла замуж за касманаўта Навіцкага? Яны носяць пярсцёнкі
Васілеўская расказала, ці паляціць у космас другі раз
Каментары