Ганна Гуськова незадаволеная, як яе судзілі на Алімпіядзе. Казека: Усё нармальна

«Сёння ўсе самі бачылі. Я зрабіла ўсё на 100 працэнтаў: скачкі чыстыя і выканала добра, а далей ужо справа за суддзямі», — цытуе Гуськову тэлеграм-канал беларускага Нацыянальнага алімпійскага камітэта.

У Гуськовай пацікавіліся, ці адчула яна, што яе «прытрымлівалі» суддзі яшчэ на стадыі кваліфікацыі:

«Пагаджуся, таму мне так складана нешта каментаваць. Калі б упала дзесьці, то магла б вінаваціць сябе і сцвярджаць, што я не зрабіла ўсё на 100 працэнтаў».

Таксама яна адзначыла, што гэты алімпійскі сезон атрымаўся складаным і нашых фрыстайлістак можна толькі падтрымаць:

«Магу сказаць, што нам ужо помнікі пры жыцці можна ставіць. За такі кароткі тэрмін — толькі ў снежні пачалі гарналыжную падрыхтоўку — здолелі з дзяўчатамі Андрыянавай і Дзяругай адабрацца на Алімпіяду і паказаць усё, на што здольныя. А як усе бачылі, мы добра выступілі. Таму і няма каментарыяў наконт адзнак. Для мяне гэта вельмі дзіўна.

З плюсаў — вельмі задаволеная, што сваю праграму добра выканала. У фінале чацвёрты скачок прыйшлося выканаць адразу, упершыню ў сезоне, каб павысіць складанасць. Усё зрабіла дзеля медаля, але, на жаль, дадаць ужо няма чаго, вы самі ўсё бачылі. Нават вядучы на стадыёне пракаментаваў: «Бравісіма!». Аднак гэта не адмяняе таго факта, што я не ў шасцёрцы найлепшых».

Старшыня Беларускага лыжнага саюза Аляксандр Грэбнеў суддзямі таксама незадаволены:

«Сёння мы ўбачылі прыклад не самага сумленнага судзейства ў адносінах да нашых спартсменаў. Мы бачылі падобныя скачкі ў прадстаўнікоў іншых краін, і адзнакі вельмі моцна розніліся. Ды і скачкі ў іх былі не самай высокай якасці. Паўтаруся, што, на жаль, судзейскі фактар у фрыстайле вельмі суб'ектыўны. Так, сярод суддзяў геаграфічная разнастайнасць ёсць, але не буду канкрэтызаваць. Каму трэба — паглядзіць у інтэрнэце. Там усе сцягі і асобы вядомыя. Я ж як кіраўнік магу толькі абурыцца і зрабіць пэўныя высновы па сістэме судзейства».

Спартыўны чыноўнік абяцае пры гэтым «так проста сістэму судзейства не пакінуць».

У той жа час славуты трэнер Мікалай Казека, якога пасля 2020 года адхілілі ад працы, мае адносна выступлення Гуськовай і судзейства на Алімпіядзе іншую думку:

«Ганна выступіла годна. Была дапушчаная грубая памылка ў размеркаванні скачкоў. Менавіта гэта і не дазволіла Ганне трапіць у шасцёрку [удзельніц другога фіналу] і змагацца за медалі.

Яе другі скачок [у першым фінале] павінен быў ісці першым. Тады б яна была ў барацьбе за медалі. Другі скачок у яе быў больш складаны, за яго яна атрымала больш за 100 балаў, а за [больш лёгкі] першы — усяго 86,44.

На жаль, яна прывезла ў Італію тую самую праграму, з якой яна стала алімпійскай чэмпіёнкай у 2018 годзе і срэбранай прызёркай Алімпіяды ў 2022-м. Яна не ўскладнілася. Хоць усе магчымасці ў яе былі. Мы ў Мінску валодаем найлепшай у свеце базай па падрыхтоўцы фрыстайлістаў […]

Тэхнічна Гуськова знаходзілася на сваім узроўні. Вядома, не прасунулася наперад, але ўсё ж такі ўзровень быў нядрэнны. Я ўпэўнены, што другі скачок [першага фіналу ў выпадку выканання яго першым] прывёў бы яе да барацьбы за медалі. Быў тактычны промах».

Што да судзейства, то тут Казека катэгарычны:

«У мяне прэтэнзій няма. Мне здаецца, што ў гэтым плане ўсё было нармальна».

Пры гэтым ён адзначыў таксама, што ў Ганны Гуськовай цяпер вельмі сур'ёзна хворая маці, і гэта на яе магло таксама ціснуць.

Што ж тычыцца дзвюх іншых беларускіх удзельніц гэтай Алімпіяды, Ганны Дзяругі і Анастасіі Андрыянавай, то тут Мікалай Казека кажа так:

«Па-першае, нагадаю, што яны нават не адабраліся на Алімпіяду. Іх уключылі ў апошні момант. Па-другое, яны яшчэ не гатовыя да больш складаных скачкоў. Нават тыя не вельмі складаныя скачкі [з каэфіцыентам максімум 3,150], якія яны рабілі, былі выкананыя не вельмі якасна. [22-гадовая] Дзяруга і [21-гадовая] Андрыянава ўжо ў такім узросце, што павінны паказваць вынікі, але іх няма».

Ад адказу на пытанне, ці адбываецца так праз ягонае адхіленне ад працы са зборнай, Казека з усмешкай устрымаўся.

Нагадаем, што золата ў гэтай дысцыпліне выйграла кітаянка Сю Мінтаа (112,9), у аўстралійкі Дэніэл Скот — срэбра (102,17), у кітаянкі Ксі Шаа — бронза (101,9).

Трэніруе аўстралійку, якая заваявала срэбра, дарэчы, беларус Дзмітрый Дашчынскі — бронзавы прызёр Алімпіяды ў Нагана 1998 года і срэбраны — Турына 2006-га. Таму ў гэтай узнагародзе ёсць таксама ўплыў славутай беларускай школы лыжнай акрабатыкі.

Пачынаючы з 1998 года беларускія фрыстайлісты прывозілі медалі з усіх Алімпіядаў, у тым ліку у 2010, 2014 і 2018 гадах залатыя. Гэтая Алімпіяда стала першай без узнагарод за амаль 30 гадоў.

• 0
• 0
• 2
• 0
• 0
• 1
• 0
• 0