Hanna Huśkova niezadavolenaja, jak jaje sudzili na Alimpijadzie. Kazieka: Usio narmalna
Biełaruskaja frystajlistka, alimpijskaja čempijonka 2018 hoda i srebranaja pryziorka 2022‑ha ŭ łyžnaj akrabatycy Hanna Huśkova, jakaja ŭ Miłanie i Karcina d'Ampieca zaniała tolki 8‑ie miesca, u kamientary pa haračych śladach vykazała pretenzii da sudździaŭ.
«Siońnia ŭsie sami bačyli. Ja zrabiła ŭsio na 100 pracentaŭ: skački čystyja i vykanała dobra, a dalej užo sprava za sudździami», — cytuje Huśkovu telehram-kanał biełaruskaha Nacyjanalnaha alimpijskaha kamiteta.
U Huśkovaj pacikavilisia, ci adčuła jana, što jaje «prytrymlivali» sudździ jašče na stadyi kvalifikacyi:
«Pahadžusia, tamu mnie tak składana niešta kamientavać. Kali b upała dzieści, to mahła b vinavacić siabie i śćviardžać, što ja nie zrabiła ŭsio na 100 pracentaŭ».
Taksama jana adznačyła, što hety alimpijski siezon atrymaŭsia składanym i našych frystajlistak možna tolki padtrymać:
«Mahu skazać, što nam užo pomniki pry žyćci možna stavić. Za taki karotki termin — tolki ŭ śniežni pačali harnałyžnuju padrychtoŭku — zdoleli ź dziaŭčatami Andryjanavaj i Dziaruhaj adabracca na Alimpijadu i pakazać usio, na što zdolnyja. A jak usie bačyli, my dobra vystupili. Tamu i niama kamientaryjaŭ nakont adznak. Dla mianie heta vielmi dziŭna.
Ź plusaŭ — vielmi zadavolenaja, što svaju prahramu dobra vykanała. U finale čaćviorty skačok pryjšłosia vykanać adrazu, upieršyniu ŭ siezonie, kab pavysić składanaść. Usio zrabiła dziela miedala, ale, na žal, dadać užo niama čaho, vy sami ŭsio bačyli. Navat viadučy na stadyjonie prakamientavaŭ: «Bravisima!». Adnak heta nie admianiaje taho fakta, što ja nie ŭ šaściorcy najlepšych».
Staršynia Biełaruskaha łyžnaha sajuza Alaksandr Hrebnieŭ sudździami taksama niezadavoleny:
«Siońnia my ŭbačyli prykład nie samaha sumlennaha sudziejstva ŭ adnosinach da našych spartsmienaŭ. My bačyli padobnyja skački ŭ pradstaŭnikoŭ inšych krain, i adznaki vielmi mocna roźnilisia. Dy i skački ŭ ich byli nie samaj vysokaj jakaści. Paŭtarusia, što, na žal, sudziejski faktar u frystajle vielmi subjektyŭny. Tak, siarod sudździaŭ hieahrafičnaja raznastajnaść jość, ale nie budu kankretyzavać. Kamu treba — pahladzić u internecie. Tam usie ściahi i asoby viadomyja. Ja ž jak kiraŭnik mahu tolki aburycca i zrabić peŭnyja vysnovy pa sistemie sudziejstva».
Spartyŭny čynoŭnik abiacaje pry hetym «tak prosta sistemu sudziejstva nie pakinuć».
U toj ža čas słavuty trenier Mikałaj Kazieka, jakoha paśla 2020 hoda adchilili ad pracy, maje adnosna vystupleńnia Huśkovaj i sudziejstva na Alimpijadzie inšuju dumku:
«Hanna vystupiła hodna. Była dapuščanaja hrubaja pamyłka ŭ raźmierkavańni skačkoŭ. Mienavita heta i nie dazvoliła Hańnie trapić u šaściorku [udzielnic druhoha finału] i zmahacca za miedali.
Jaje druhi skačok [u pieršym finale] pavinien byŭ iści pieršym. Tady b jana była ŭ baraćbie za miedali. Druhi skačok u jaje byŭ bolš składany, za jaho jana atrymała bolš za 100 bałaŭ, a za [bolš lohki] pieršy — usiaho 86,44.
Na žal, jana pryviezła ŭ Italiju tuju samuju prahramu, ź jakoj jana stała alimpijskaj čempijonkaj u 2018 hodzie i srebranaj pryziorkaj Alimpijady ŭ 2022-m. Jana nie ŭskładniłasia. Choć usie mahčymaści ŭ jaje byli. My ŭ Minsku vałodajem najlepšaj u śviecie bazaj pa padrychtoŭcy frystajlistaŭ […]
Technična Huśkova znachodziłasia na svaim uzroŭni. Viadoma, nie prasunułasia napierad, ale ŭsio ž taki ŭzrovień byŭ niadrenny. Ja ŭpeŭnieny, što druhi skačok [pieršaha finału ŭ vypadku vykanańnia jaho pieršym] pryvioŭ by jaje da baraćby za miedali. Byŭ taktyčny promach».
Što da sudziejstva, to tut Kazieka kateharyčny:
«U mianie pretenzij niama. Mnie zdajecca, što ŭ hetym płanie ŭsio było narmalna».
Pry hetym jon adznačyŭ taksama, što ŭ Hanny Huśkovaj ciapier vielmi surjozna chvoraja maci, i heta na jaje mahło taksama cisnuć.
Što ž tyčycca dźviuch inšych biełaruskich udzielnic hetaj Alimpijady, Hanny Dziaruhi i Anastasii Andryjanavaj, to tut Mikałaj Kazieka kaža tak:
«Pa-pieršaje, nahadaju, što jany navat nie adabralisia na Alimpijadu. Ich uklučyli ŭ apošni momant. Pa-druhoje, jany jašče nie hatovyja da bolš składanych skačkoŭ. Navat tyja nie vielmi składanyja skački [z kaeficyjentam maksimum 3,150], jakija jany rabili, byli vykananyja nie vielmi jakasna. [22-hadovaja] Dziaruha i [21-hadovaja] Andryjanava ŭžo ŭ takim uzroście, što pavinny pakazvać vyniki, ale ich niama».
Ad adkazu na pytańnie, ci adbyvajecca tak praź jahonaje adchileńnie ad pracy sa zbornaj, Kazieka z uśmieškaj ustrymaŭsia.
Nahadajem, što zołata ŭ hetaj dyscyplinie vyjhrała kitajanka Siu Mintaa (112,9), u aŭstralijki Denieł Skot — srebra (102,17), u kitajanki Ksi Šaa — bronza (101,9).
Treniruje aŭstralijku, jakaja zavajavała srebra, darečy, biełarus Dźmitryj Daščynski — bronzavy pryzior Alimpijady ŭ Nahana 1998 hoda i srebrany — Turyna 2006-ha. Tamu ŭ hetaj uznaharodzie jość taksama ŭpłyŭ słavutaj biełaruskaj škoły łyžnaj akrabatyki.
Pačynajučy z 1998 hoda biełaruskija frystajlisty pryvozili miedali z usich Alimpijadaŭ, u tym liku u 2010, 2014 i 2018 hadach załatyja. Hetaja Alimpijada stała pieršaj biez uznaharod za amal 30 hadoŭ.
Hanna Huśkova nie zmahła prabicca ŭ supierfinał u łyžnaj akrabatycy
Hanna Huśkova ŭ pieršaj sprobie finału pa łyžnaj akrabatycy zaniała 10‑ie miesca
Hanna Huśkova prabiłasia ŭ finał spabornictvaŭ pa łyžnaj akrabatycy
Nivodnaja ź biełaruskich frystajlistak nie prabiłasia ŭ finał spabornictvaŭ pa łyžnaj akrabatycy ŭ pieršaj kvalifikacyi
Siońnia na Alimpijadzie pasprabujuć paŭtorna vystupić frystajlistki, a taksama ŭ hornych łyžach paspaborničaje Maryja Škanava
Ciapier čytajuć
Palitviazień Kim Samusienka paraŭnaŭ śviet na momanty jaho pasadki i vyzvaleńnia: Usio niadrenna dla jeŭrapiejskaj cyvilizacyi, a značyć, i dla biełarusaŭ2323
Kamientary
Hetaha tre bylo čakac, i ciapier nie zdziūliacca, dobra, što ūvohule patrapili na toje mierapryjemstva. Nie tamu dobra, što sport, i tra-la-la (u ciapierašnich varunkach heta pir u čas čumy, jaki nielha bylo pravodzic, bo amaralna), a tamu, što niejak dy ūsprymajuc.