У цэнтры Мінска ў Свіслачы злавілі чырвонакніжную стронгу. Няўжо яна ў ёй завялася?
У цэнтры Мінска рыбак Яўген Ражкоў 24 сакавіка выпадкова злавіў рэдкую ручаёвую фарэль, занесеную ў Чырвоную кнігу Беларусі. Гэта адбылося на Свіслачы ў раёне вуліцы Арлоўскай. Спачатку ён думаў, што гэта іншая рыба, але, убачыўшы ўлоў, вельмі здзівіўся. Пасля фота рыбак адпусціў фарэль назад у ваду, піша «Смартпрэс».
«Я толькі ў апошні момант зразумеў, хто гэта. Пакуль цягнуў, думаў, судак дробны, мяркуючы па выцягнутым цені ў вадзе. Калі падвёў да берага, не паверыў сваім вачам, бо ў такой бруднай вадзе стронга не можа вадзіцца. Калі выцягнуў, вельмі ўзрадаваўся і нават ушчыкнуў сябе, каб праверыць, ці не сплю я», — гаворыць рыбак.
Зрабіўшы пару фота, хлопец выпусціў рыбіну назад у ваду, ад разгубленасці нават не здагадаўшыся зрабіць відэа.
Навукоўцы пацвердзілі, што на фота сапраўды ручаёвая стронга, але адзначылі: на сёння няма звестак, што гэты від пастаянна жыве ў Свіслачы ў межах Мінска. Таму спецыялісты просяць паведамляць пра падобныя выпадкі, калі яны паўторацца.
Раней гэта рыба сустракалася вышэй па цячэнні Свіслачы, але цяпер найбліжэйшыя месцы, дзе яна жыве — рэкі Іслач і Гайна, якія са Свіслаччу не злучаныя. Таму самастойна трапіць у Мінск яна не магла.
Версія пра тое, што ікру маглі перанесці птушкі, лічыцца малаверагоднай. Хутчэй за ўсё, рыбіну нехта выпусціў у раку — напрыклад, з акварыума або пасля лоўлі ў іншым месцы.
Для жыцця фарэлі патрэбная чыстая, халодная вада з вялікай колькасцю кіслароду. У Мінску яна тэарэтычна можа выжыць у асобных месцах, дзе ў раку ўпадаюць крыніцы з чыстай сцюдзёнай вадой, але размнажацца — не, бо для гэтага патрэбна камяністае дно, якога ў Свіслачы няма.
У цэлым у Беларусі колькасць ручаёвай фарэлі паступова расце, і яе ўжо лічаць менш уразлівым відам, чым раней. Аднак лавіць такую рыбу забаронена — калі такая трапляе на кручок, то яе трэба адразу адпускаць.
Сёння ў Раўбічах выцягнулі рыбака з палонкі
Перад сустрэчай з Лукашэнкам Коўла забаўлялі расказамі пра зімовую рыбалку
Рыбакі знайшлі на Бярэзіне дзіўную палонку, побач ляжаў ледабур
Бясстрашнасць і адвага. Гэтыя людзі ловяць рыбу на лёдзе ў +14
На Чыгірынскім вадасховішчы рыбакі замест рыбы дасталі з вады тое, чаго зусім не чакалі
У Гродне зноў заўважылі ажыятаж на рацэ. Што так прыцягвае дзясяткі чалавек?
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі5
Каментары