Чацвёртую лінію мінскага метро павядуць у Дражню. А «Сляпянка» і «Даўгабродская» змянілі сваё месца

Новыя абрысы транспартнай будучыні Мінска сталі вядомыя дзякуючы рэпартажу дзяржаўнага тэлеканала АНТ, прысвечанаму працы праходчых шчытоў, як заўважыў партал blizko.by. У сюжэце ў кадр трапілі свежыя схемы развіцця падземкі з кабінетаў інстытута «Мінскметрапраект». З іх вынікае, што ранейшая траса чацвёртай лініі змянілася — метратунэлі зробяць рэзкі віраж на ўсход.

Новая траса ўсходняга паўкальца

Да нядаўняга часу планавалася, што пасля станцыі «Батанічны сад» цягнікі пойдуць да шостай клінічнай бальніцы на станцыю «Уральская», на скрыжаванні вуліц Уральскай і Фролікава, а адтуль скіруюцца да станцыі «Даўгабродская», дзе была запланавана перасадка на станцыю «Трактарны завод» Аўтазаводскай лініі.

Павялічыць

Павялічыць

Аднак цяпер траса ўсходняга паўкальца істотна змяняецца. Пасля «Батанічнага сада» лінія заварочвае на ўсход, да Запарожскай плошчы на скрыжаванні вуліц Філімонава, Сталетава і Запарожскай, дзе размесціцца станцыя «Сляпянка».

Далей тунэлі пройдуць пад Радыяльнай вуліцай, дзе ў прамысловай зоне на скрыжаванні з вуліцай Ваўпшасава з’явіцца новая станцыя «Дражня».

Пасля гэтага траса чацвёртай лініі працягнецца пад Радыяльнай вуліцай да скрыжавання з Пераходнай вуліцай і ў створы з вуліцай Жылуновіча, па ўскрайку Мінскага падшыпнікавага завода, выйдзе да станцыі «Даўгабродская» на Партызанскім праспекце, якая цяпер стане перасадачнай са станцыяй «Партызанская», а не са станцыяй «Трактарны завод», як было запраектавана раней.

Павялічыць

Павялічыць

Навошта змянілі чацвёртую лінію

Магчыма, што гэтыя змены ва ўсходнім паўкальцы звязаны з тым, што на ўсход ад Мінскай кальцавой аўтадарогі плануецца ўзвядзенне мікрараёна Зялёны Бор, агульная плошча забудовы якога перавысіць мільён квадратных метраў.

Вуліца Ваўпшасава стане галоўнай транспартнай артэрыяй для гэтага масіва, таму метро імкнуцца падвесці як мага бліжэй да будучых жыхароў.

Павялічыць

Пры гэтым у новай дакументацыі заяўлены 18 (17) станцый чацвёртай лініі, што не супадае з намаляваным на схеме. Першапачаткова на кальцы планавалася 17 прыпынкаў. Калі ў пачатку года з праекта выключылі «Кіеўскі сквер» і «Політэхнічную», іх засталося пятнаццаць. Цяпер дадалася «Дражня» — на прадстаўленых новых схемах адлюстраваны толькі 16 прыпынкаў.

Што тычыцца іншых перспектыўных раёнаў, падаўжэнне першай і другой ліній захоўваецца толькі ў кірунку Ельніцы і Шчомысліцы адпаведна. Працяг метро ў Дзегцяроўку ці Паўночны бераг, дзе плануюць збудаваць чатыры з паловай мільёна квадратных метраў жылля, праектам па-ранейшаму не прадугледжаны.

• 8
• 0
• 0
• 7
• 3
• 0
• 0
• 0