Невядомыя дасылаюць беларускай актывістцы ў Польшчы пахавальныя вянкі і здымкі з помнікамі ўсім членам яе сям’і
Адміністратарку шэлтара для экс-палітвязняў у Варшаве і паплечніцу Паўла Латушкі ў Каардынацыйнай радзе Ганну Федаронак працягваюць кашмарыць.
Усё пачалося з пастоў пра збор сродкаў на пахаванне актывісткі ў сацсетцы X, працягнулася падкідваннем пахавальнага вянка пад шэлтар, дзе працуе Ганна. Цяпер жа жанчыну запужваюць карцінкамі з нафоташопленымі помнікамі са здымкамі членаў сям’і — на іх яе дзеці і ўнукі.
«Я не ведаю, чаго ад мяне хочуць гэтыя людзі, чаго дамагаюцца. Спачатку я думала, што гэта дыскрэдытацыя мяне перад выбарамі ў Каардынацыйную раду, запужванне, але выбары ўжо прайшлі», — каментуе Ганна.
Пасля таго, як Ганне прывезлі вянок, перакінуўшы яго за плот шэлтара, дзе яна працуе, жанчына аднесла заяву ў паліцыю. Падтрымаў яе і гаспадар дома — паляк, у якога беларусы арандуюць дом пад шэлтар для палітвязняў.
Дадаткова, перажываючы за сваю бяспеку, жанчына звярнулася ў пракуратуру і ABW — агенцтва ўнутранай бяспекі Польшчы. Ганна кажа, што першапачаткова ў паліцыі не хацелі прымаць яе заяву, тут і дапамог гаспадар-паляк, які першапачаткова вырашыў, што гэты «падарунак» для яго.
«Гэта ўсё ж не проста тролінг у інтэрнэце. Мне прывезлі рэальны вянок рэальныя людзі, яны замахнуліся на прыватную ўласнасць. Я гэта публічу і не маўчу, каб дадаткова паўплываць на польскія ўлады. Гэта ўсё ж небяспека і іх краіны, бо, атрымліваецца, нейкія шпіёны знаходзяцца на іх тэрыторыі. Нікому, думаю, не патрэбная другая Анжаліка Мельнікава, калі я знянацку знікну», — не хавае абурэння актывістка.
Апошняя пагроза прыйшла актывістцы сёння, і ў ёй пішуць, што яна можа чакаць гасцей на адкрыцці «доміка» (маецца на ўвазе наваселле шэлтара).
Дадаткова невядомыя выкарысталі здымкі ўжо з унукамі Ганны Федаронак. «Калі дзеці цябе не зачапілі, то, можа, унукі разварушаць», — напісаў ананім у тэлеграме, падпісаны Бартэкам.
Каментары