Цэнтральны Батанічны сад Мінска рыхтуецца да правядзення атмасфернага летняга open-air — фестывалю «Купальскія агні», што запланаваны на 4‑5 ліпеня.
Гасцей чакаюць відовішчнае вогненнае шэсце, майстар-клас па пляценні вянкоў і іх спуск на ваду, жывая музыка, гістарычныя рэканструкцыі і шмат іншага, піша Tochka.by.
Адзначаць Купалле ў цэнтры Мінска ў Батанічным садзе становіцца добрай традыцыяй. Фестываль праводзіцца не ўпершыню, і ў 2025 годзе асабліва ўразіў гледачоў масавым вогненным шэсцем з паходнямі да возера, дзе ўвечары на ваду былі спушчаны тысячы вянкоў.
Летам 2026 года купальскія абрады і традыцыі таксама стануць галоўнай часткай праграмы, а кульмінацыяй будзе вячэрняе вогненнае шоу ад аднаго з галоўных сталічных тэатраў агню.
Як адзначаюць арганізатары, «Купальскія агні» — гэта не толькі пра забавы і адпачынак. Фестываль знаёміць гасцей з гісторыяй, адраджае абрады і рамёствы, стварае прастору жывога дыялогу пакаленняў.
«Мы хочам, каб кожны госць не проста назіраў, а пражываў традыцыю: пляў вянкі, пазнаваў сэнсы купальскіх песень і сімвалаў, удзельнічаў у майстар-класах і абрадавых дзеяннях», — кажуць арганізатары.
Асабліва адзначаецца вогненнае шэсце, якое аб’ядноўвае людзей вакол агульнага вогнішча, павагі да прыроды і агульных каштоўнасцей.
Яшчэ і рыцарскі турнір
У дні фестывалю ў Батанічным садзе разгорнецца цэлы рыцарскі лагер з рэканструкцыяй гістарычных турніраў.
У праграме — фальклорныя выступы, кірмаш рамёстваў, сямейныя гульні, пляценне вянкоў і пошук папараць-кветкі ў глыбіні саду, духоўныя практыкі, зоны медытацыі і адпачынку.
Наведаць фестываль можна ўсёй сям’ёй. Для самых маленькіх гасцей прадугледжана вялікая дзіцячая зона з гульнямі і сучаснай анімацыяй. Падчас і пасля актыўнага адпачынку перакусіць можна будзе на фуд-корце з разнастайнай кухняй.
Квіткі на фестываль можна будзе набыць на месцы ў касах Батанічнага саду, а ўжо цяпер яны даступныя анлайн у білетных аператараў.
Цяпер чытаюць
«Няма ў нас іншых беларусаў». Лідар «Драздоў» заклікаў дараваць тым, хто «не там лайк паставіў»41
«Няма ў нас іншых беларусаў». Лідар «Драздоў» заклікаў дараваць тым, хто «не там лайк паставіў»
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2626
Каментары