Лепельская суддзя Кручыніна, якая рэпрэсавала медыкаў, пастара, ратавальнікаў, звольнілася па ўласным жаданні
Канвеер палітычных судоў пакінула лепельская суддзя Ірына Кручыніна, былая настаўніца беларускай мовы. У Лепелі, а перад тым у Чашніках, яна разглядала палітычна матываваныя адміністрацыйныя справы. Сыходзіць жанчына па ўласным жаданні. У чым прычына — невядома.
Стала вядома, што з пасады суддзі Лепельскага раёна па ўласным жаданні сышла Ірына Кручыніна — адна з мясцовых суддзяў, датычных да масавых рэпрэсій. Яна актыўна карала беларусаў па надуманых «экстрэмісцкіх» артыкулах. І, як расказвала ў мясцовай прэсе, была перакананая, што ўсё робіць правільна.
Менавіта яна адпраўляла на «суткі» новалукомльскага пастара, карала і медыкаў Новалукомльскай ЦРБ і вайсковага фельчара.
Яшчэ вясной 2025 года ў інтэрв'ю мясцовай раённай дзяржгазеце Кручыніна адкрыта хвалілася сваёй працай. На пытанне журналістаў, ці не хацела яна калі-небудзь сысці з прафесіі з-за цяжкіх працэсаў, яна заявіла, што ні разу не сумнявалася ў вынесеных прысудах і заўсёды была перакананая, што «знаходзіцца на сваім месцы і ўсё робіць правільна».
Да таго як стаць часткай судовай сістэмы — спачатку ў Чашніцкім, а пасля ў Лепельскім раёне — Кручыніна працавала настаўніцай беларускай мовы і літаратуры, аднак пасля перакваліфікавалася ў юрыста. Сама яна расказвала мясцовай прэсе, што вельмі любіць раманы Івана Шамякіна і чытае яго «толькі на беларускай мове».
Цяпер чытаюць
Ніводзін лукашэнкаўскі СМІ і канал не выкарыстаў слова «рэтранслятары». Што гэта можа азначаць?26
Каментары