У Швейцарыі праз недахоп вады забараняюць напаўняць басейны і паліваць газоны
У Швейцарыі праз працяглую спякоту і засуху ўводзяць абмежаванні на выкарыстанне вады. Узровень вады ў рэках і азёрах істотна знізіўся, а ў многіх месцах дасягнуў гістарычнага мінімуму. Пры гэтым запасы падземных вод працягваюць змяншацца, піша выданне Blick.
Па звестках MétéoSuisse, на ўсёй тэрыторыі краіны зафіксаваны найвышэйшы ўзровень небяспекі, звязаны з засухай. Праблема ўзмацняецца тым, што на працягу доўгага часу амаль не было ападкаў.
У многіх рэгіёнах ужо дзейнічаюць меры па эканоміі вады. На поўдні Швейцарыі мясцовыя ўлады забаранілі напаўняць басейны, паліваць газоны і мыць аўтамабілі. Яшчэ з сярэдзіны чэрвеня забаронена браць ваду з большасці невялікіх ручаёў, што стварае дадатковыя цяжкасці для сельскай гаспадаркі.
У некаторых раёнах лугі і пашы ўжо высахлі. На берагах Цюрыхскага возера з-за падзення ўзроўню вады агаліліся скалы, якія звычайна знаходзяцца пад вадой. Некаторыя суднаходныя кампаніі былі вымушаныя спыніць асобныя рэйсы, а спаборніцтвы па плаванні адмянілі.
У Альпгшвендзі, недалёка ад гары Пілат, мясцовая крыніца перастала даваць дастаткова вады. Таму пітную ваду даводзіцца дастаўляць у горы трактарамі ў спецыяльных цыстэрнах.
Абмежаванні ўвялі і ў рэгіёне Базель-Ланд. Напрыклад, жыхарам Лангенбрука забаранілі паліваць газоны і жывыя агароджы, напаўняць басейны і іншыя ёмістасці, а таксама мыць аўтамабілі.
У даліне Рэйна ў кантоне Граўбюндэн жыхароў таксама заклікаюць эканоміць ваду. У муніцыпалітэтах Енінс і Маланс у жніўні забаронена выкарыстоўваць ваду з пажарных гідрантаў для прыватных патрэб, у тым ліку для паліву, напаўнення басейнаў і мыцця машын.
Засуха ўжо негатыўна адбіваецца на прыродзе. У рацэ Дуб асобныя ўчасткі рэчышча перасыхаюць, гіне рыба, цярпяць лясы, а фермеры вымушаныя выкарыстоўваць запасы корму, якія прызначаліся на зіму.
Праблемы з нізкім узроўнем вады ўзнікаюць і ў іншых еўрапейскіх краінах. Напрыклад, у Венгрыі ўзводзяць спецыяльны бар'ер на Дунаі, каб падняць узровень вады каля адзінай у краіне АЭС і забяспечыць яе астуджэнне. У Румыніі недахоп вады ўжо прывёў да спынення АЭС «Чарнаводэ».
Цяпер чытаюць
Папулярная маладая блогерка з Чэрыкава памерла неўзабаве пасля нараджэння дзіцяці4
Каментары