У Купалаўскім тэатры расійскія рэжысёры правядуць творчую лабараторыю, у якой абяруць спектакль для рэпертуару
«Гэта элемент эксперыментальнага прачытання, новы подых».
У Нацыянальным акадэмічным тэатры імя Янкі Купалы пачаўся творчы праект «Купала. Лабараторыя», піша Белта. На працягу тыдня артысты тэатра разам з трыма расійскімі рэжысёрамі створаць тры эскізы спектакляў.
30 жніўня іх пакажуць гледачам, якія, як абяцаюць, змогуць выбраць упадабаны эскіз для далейшага ўключэння ў рэпертуар тэатра.
Праект стартаваў 24 жніўня. Пра яго журналістам распавёў генеральны дырэктар Купалаўскага тэатра Аляксандр Шастакоў.
«Мы запрашаем майстроў сваёй справы, і важна, каб, акрамя нашых рэжысёраў, было іншае бачанне беларускай драматургіі. Гэта элемент эксперыментальнага прачытання, новы подых, які дазваляе нават нашым артыстам па-іншаму паглядзець на ўсім знаёмы матэрыял», — сказаў Шастакоў.
Кіруе лабараторыяй расійскі тэатральны крытык Аляксандр Віслаў. Ён кажа, што ў Расіі такі фармат лабараторыі шырока распаўсюджаны, але для Купалаўскага тэатра гэта першы падобны эксперымент.
«Мы правялі вялікі адбор рэжысёраў разам з мастацкім кіраўніком тэатра. Выбралі трох яркіх майстроў, якія ўмеюць знаходзіць падыход да артыстаў і раскрываць іх патэнцыял», — сказаў ён.
Эскізы спектакляў будуць ствараць з дэкарацыямі і касцюмамі Купалаўскага тэатра, а ролі будуць выконваць ягоныя артысты.
Усе тры эскізы пакажуць на беларускай мове.
Расійскі рэжысёр Андрэй Шляпін выбраў для пастаноўкі п’есу Мікалая Матукоўскага «Мудрамер».
«Пакуль невядома, што атрымаецца ў выніку. На мой погляд, твор дакладна трапляе ў актуальную тэму пошуку адказу на пытанне «хто я?». Сапраўды неабходна перыядычна задаваць сабе гэтае пытанне. Гэта вечная тэма знаходжання чалавека ў прасторы і сацыяльных пластах», — сказаў Шляпін.
Расійская рэжысёрка Марыя Раманава працуе з п’есай Янкі Купалы «Раскіданае гняздо».
Паводле Раманавай, праца з беларускім матэрыялам мае і асабістае значэнне: яе бабуля была родам з Рагачова.
«Падарожжа ў Беларусь аказалася надзвычай значным для мяне, бо мая бабуля родам з Рагачова. Інтуітыўна я выбрала для пастаноўкі твор Янкі Купалы, і ў працэсе яго прачытання ён мяне моцна зачапіў. П’еса цяжкая, але вельмі паэтычная. Мне важна знайсці эквівалент трагічнасці, каб перавесці яе на больш духоўны ўзровень, які тычыцца пытання прыняцця такога лёсу. Я імкнуся знайсці ў гэтым прыгажосць», — сказала рэжысёрка.
Трэцюю пастаноўку — паводле п’есы Францішка Аляхновіча «Чорт і баба» — рыхтуе заслужаны артыст Расіі Аляксандр Агароў.
Ён прызнаўся, што раней не ведаў Францішка Аляхновіча.
«Раней я не ведаў гэтага драматурга, і мяне ўразіў яго трагічны лёс. Мне падалося, што «Чорт і баба» — гэта не проста нейкая «забаўная штучка». У творы ёсць размова пра сапраўднае, якое датычыць усіх нас», — распавёў Агароў.
30 жніўня гледачы ўбачаць усе тры эскізы і, паводле кіраўніцтва тэатра, змогуць выбраць эскіз, які ў далейшым можа ўвайсці ў рэпертуар Купалаўскага тэатра.
У тэатры называюць гэта называюць магчымасцю па-іншаму паглядзець на знаёмы беларускі матэрыял.
Нагадаем, пасля разгрому старой купалаўскай трупы ў 2020‑м у тэатр запрашаюць расійскія кадры — як акцёраў, так і рэжысёраў, якія не ведаюць ні беларускай культуры, ні беларускай мовы. А зверху над імі паставілі адміністрацыйна-сілавы кантроль.
Цяпер чытаюць
«Калі вы пазакрываеце я**льнікі»: злоўлены на допінгу амапавец з Гродна паказаў сваё высокакультурнае аблічча12
Каментары