У Польшчы цягнік сышоў з рэек пасля сутыкнення з грузавіком — пацярпелі дзясяткі людзей
У Мазавецкім ваяводстве Польшчы пасажырскі цягнік сутыкнуўся з грузавіком-бетонамяшалкай на чыгуначным пераездзе, пасля чаго сышоў з рэек. У аварыю трапіў міжгародні цягнік кампаніі Intercity, які рухаўся з Любліна ў Шчэцін, піша Onet.pl.
Пасля сутыкнення з грузавіком састаў, які складаўся з лакаматыва і шасці вагонаў, сышоў з рэек.
На момант аварыі ў цягніку знаходзіліся каля 120 пасажыраў. Паводле папярэдняй інфармацыі, пацярпелі не менш за 20 чалавек. Чатыры пацярпелыя знаходзіліся ў цяжкім стане. Пасля стала вядома, што ў выніку аварыі адна з цяжка параненых пасажырак, якая ехала ў першым за лакаматывам вагоне, памерла.
Вядома, што цяжкія пашкоджанні атрымалі машыніст цягніка і кіроўца грузавіка.
Следства папярэдне ўстанавіла, што менавіта бетонамяшалка ўрэзалася ў цягнік, які ў гэты момант знаходзіўся ў руху. Чыгуначны пераезд не мае шлагбаумаў, але абсталяваны светлавой і гукавой сігналізацыяй. Пакуль высвятляецца, чаму кіроўца не спыніўся перад пераездам. Па словах намесніка міністра інфраструктуры Польшчы, кіроўца заявіў, што яго магло асляпіць сонца.
Пасажырка цягніка расказала, што перад аварыяй адчула вельмі моцнае тармажэнне і рэзкае разгойдванне вагона. Паводле яе слоў, пасажыры хутка зразумелі, што цягнік можа сысці з рэек. Ратавальнікі і медыкі прыбылі на месца ўжо праз некалькі хвілін. Дзеянні экстранных службаў былі добра скаардынаваныя і панікі сярод людзей не ўзнікла.
Цяпер чытаюць
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам30
Каментары