«У працоўны час разгадвалі крыжаванкі, праглядалі часопісы мод або прымалі ежу»
Дзяржкантроль апублікаваў вынікі «андропаўскага» рэйду па Гродзеншчыне.
Дзяржкантроль апублікаваў вынікі «андропаўскага» рэйду па Гродзеншчыне.
Газета «Гродзенская праўда» апублікавала вынікі праверак Камітэту дзяржаўнага кантролю Гродзенскай вобласці, якія ладзіліся ў рэгіёне ад 26 красавіка да 4 мая. Афіцыйна гэтыя мерапрыемствы назваліся маніторынгам стану працоўнай дысцыпліны.
«Парушэнні працоўнага распарадку выяўленыя на 57 прадпрыемствах і ў арганізацыях, падпарадкаваных міністэрствам прамысловасці, транспарту, будаўніцтва і архітэктуры, жыллёва-камунальнай гаспадаркі, энергетыкі, канцэрнам «Беллегпрам», «Беллеспаперапрам», а таксама мясцовым органам улады, ва ўстановах адукацыі і аховы здароўя, грамадскіх арганізацыях»,— рапартуе «Гродзенская праўда».
У чым жа заключаліся парушэнні, за якія па выніках маніторынгу да дысцыплінарнай адказнасці былі прыцягнутыя 93 парушальнікі працоўнай дысцыпліны?
Праверкі выявілі, што людзі часта спазняюцца на працу. Больш за тое, у некаторых арганізацыях у часе паўторнага рэйду правяральшчыкі лавілі на спазненні тых жа людзей, што і ў часе першага візіту.
Маніторынг высветліў, як бавяць свой працоўны час супрацоўнікі прадпрыемстваў і арганізацый.
«У працоўны час асобныя супрацоўнікі замест выканання сваіх службовых абавязкаў разгадвалі крыжаванкі, чыталі кнігі і газеты, праглядалі часопісы мод або прымалі ежу.Некаторыя наогул адсутнічалі на працоўных месцах без паважных прычын, а кіраўнікі не маглі патлумачыць, дзе знаходзяцца іх падначаленыя».
Праверка выявіла недахопы ў арганізацыі пропуску на тэрыторыі, якія ахоўваюцца.
«Работнікі Камітэта дзяржкантролю бесперашкодна ўваходзілі на тэрыторыі, якія ахоўваюцца, і нават на рэжымныя аб'екты, а вартаўнікоў ў гэты час увогуле не было на месцы».
Праз некалькі дзён пасля завяршэння праверкі на Гродзеншчыне Аляксандр Лукашэнка зрабіў жорсткую заяву пра неабходнасць «навядзення парадку ў арганізацыях і прадпрыемствах, у тым ліку ўзмацнення жорсткасці працоўнай дысцыпліны» і згадаў часы Андропава. Магчыма, адной з прычын, з'яўлення гэтай заявы сталі і вынікі гродзенскага рэйду. Неўзабаве кіраўнік Адміністрацыі прэзідэнта Уладзімір Макей заявіў пра ўсебеларускую праверку дысцыпліны і кадравай работы на прадпрыемствах. Вынік не прымусіў сябе чакаць. 14 мая ў суботу чытачы «НН» паведамілі, што ад некаторых прадпрыемстваў і ўстановаў сталіцы райвыканкамы запатрабавалі спісы супрацоўнікаў, якія не выйшлі пра працу (тая субота была працоўная). Пазней падобныя паведамленні пачалі прыходзіць з іншых рэгіёнаў Беларусі.
Цяпер чытаюць
«Дзве Беларусі. Абедзве едуць на аўтобусах МАЗ. Адзін народ — такі розны лёс»2
Каментары