Represiŭnaje noŭ-chaŭ stała adpracavanaj technalohijaj
Pajšła chvala preventyŭnaj začystki pierad "Eŭrapiejskim maršam".
Pajšła chvala preventyŭnaj začystki pierad "Eŭrapiejskim maršam". Učora, pavodle ironii losu — akurat paśla "mikradyjalohu" byŭ aryštavany Afnahiel. Siońnia ŭziali Kacoru i Palakova ŭ Homli, Romana ŭ Horadni, Atroščankava ŭ Miensku…
Pišu hetyja radki sa stałym adčuvańniem deža-viu. Zalez u archiŭ, znajšoŭ artykuł paŭhadavoj daŭniny — "Dzień Voli: i ŭłada, i apazycyja ŭ starym farmacie", napisany dla BISS.
Nu i što vy dumajecie? Možna davać adzin u adzin, tolki pamianiać Dzień Voli na "Eŭrapiejski marš".
Chto nadta choča, moža zaleźci voś siudy i zapampavać u PDF. Dla inšych pracytuju kolki frahmentaŭ.
"Pierad niadaŭnim Dniom Voli šmatkroć było paŭtorana, što heta test dla biełaruskaj ułady: ci hatovaja jana da dyjalohu z Eŭropaj (to bok da minimalnaj demakratyzacyi)? Adnačasna akcyja 25 sakavika 2007 hodu vyhladała i testam dla apazycyi: ci ŭdałosia joj pierabudavacca dy nabrać mocy za hod paśla prezydenckich vybaraŭ? Adkaz na abodva pytańni — admoŭny.
Abjadnanyja demakratyčnyja siły (ADS) padyšli da hadaviny vybaraŭ amal što ŭ raniejšym farmacie, jaki nikoli nia byŭ nadta pracazdolnym, a zaraz uščent raźjedzieny erozijaj. Pryčym prablema nia tolki ŭ permanentnaj baraćbie za ŭnutranaje liderstva dy resursy. Hałoŭnaja biada — kanceptualny kryzys. Pryniatyja letaś paśla vybaraŭ stratehija dy plan dziejańniaŭ ADS tak i zastalisia rečču ŭ sabie.
…Jak palityčnaje noŭ-chaŭ možna razhladać chiba adkryty list Milinkieviča prezydentu dy zvarot hrupy intelektuałaŭ da ŭradu z zaklikami zrabić 25 sakavika adpraŭnym punktam nacyjanalnaj kansalidacyi dziela niezaležnaści i cyvilizavanaj eŭrapiejskaj budučyni Biełarusi.
…Što da ŭłady, to jana napiaredadni sioletniaha Dnia Voli ŭžyła vyprabavanaje hod tamu represiŭnaje noŭ-chaŭ, jakoje atrymała nieaficyjny nazoŭ "preventyŭnaj začystki". Napiaredadni i niepasredna 25 sakavika było zatrymana niekalki dziasiatkaŭ apazycyjnych aktyvistaŭ (pavodle manitorynhu štabu Milinkieviča— bolš jak sto). Tracina ź ich byli pakaranyja sudom ("firmavym" stała abvinavačańnie ŭ niecenzurnaj łajancy). Inšych prosta pratrymali ŭ pastarunkach, pakul išła akcyja. Užyvałasia taksama zapałochvańnie (papieradžalnyja hutarki ŭ milicyi i da t.p.). Vidavočna, što ŭłada, z adnaho boku, mieła na mecie prademanstravać svaju moc i niepachisnaść, a ź inšaha — nia nadta razdražnić Zachad. Tamu na Kastryčnickuju płošču manifestantaŭ nie puścili, adnu z kalonaŭ raścierušyli z užyvańniem siły. Ale razam z tym, adrozna ad šerahu minułych Dzion Voli, abyšłosia biez asablivaj brutalnaści.
…Takim čynam, vidavočna, što ŭłada maje namier da apošniaha trymacca za stvoranuju palityčnuju madel, idučy pad ciskam abstavinaŭ na minimalnyja, pieravažna kasmetyčnyja źmieny. U stasunkach z Zachadam, najpierš z Eŭraźviazam, najchutčej što budzie vykarystoŭvacca taktyka viazkaj hulni z nadziejaj na jahonaje adstupleńnie ad patrabavańniaŭ demakratyzacyi dziela vyrašeńnia prahmatyčnych zadačaŭ, u pryvatnaści, enerhietyčnaje biaśpieki".
Heta nazyvajecca "Znajdzicie, dzieci, dziesiać adroźnieńniaŭ!":)
Zaŭvažna mianiajecca chiba adzin čyńnik, adzin parametar — cisk abstavinaŭ. Uładu ŭsio bolej napružvajuć ekanamičnyja prablemy, zdolnyja chutka ŭźniać hradus sacyjalnaj niezadavolenaści. Pakul što ratujuć kredyty dy cichi rasprodaž kavałkaŭ ułasnaści. Ale heta ściažynka ślizkaja. A mabilizacyjnaha varyjantu ekanomiki razbeščany spažyvieckim bumam elektarat nie zrazumieje.
Voś tut — kvintesencyja ŭładnych fobijaŭ. Pamiatajecie frazu: nie apazycyja strašnaja — strašny finansavy abvał! Pryvid Žachlivaha Defołtu i nastupnaha buntu mas vyhladaje najbolej dziejsnym šturchačom da zmušanaj ekanamičnaj transfarmacyi. Kaniešnie ž, niepaśladoŭnaj, pałavinistaj — ale ŭ ciapierašnich varunkach niepaźbiežnaj.
Kamientary