Vadzim Prakopjeŭ u intervju «Jeŭraradyjo» raskazaŭ, čym ciapier zajmajecca Siarhiej Cichanoŭski ŭ ZŠA i čaho čakać u budučyni.
«Užo ciapier možna z upeŭnienaściu śćviardžać: Siarhiej Cichanoŭski padmanuŭ čakańni Łukašenki», — zajaviŭ Prakopjeŭ.
Na jaho dumku, kali Łukašenka «zajšoŭ z kozyraŭ i addavaŭ Cichanoŭskaha «bujnym chabaram» Trampu», jon raźličvaŭ na zusim inšy scenar.
Prakopjeŭ miarkuje, što Łukašenka čakaŭ, što Cichanoŭski «stanie takoj pieršaj łedzi, siadzie cicha na hrantach, znojdzie sabie miesca ŭ Ofisie» i pieratvorycca ŭ «nadakučlivaha błohiera z aŭdytoryjaj, jakaja źmianšajecca». Adnak, pavodle jaho, u Minsku mienš za ŭsio čakali, što Cichanoŭski pasprabuje stać «samastojnaj palityčnaj fihuraj jašče i z ułasnaj daktrynaj».
Prakopjeŭ padkreślivaje, što ciapier Cichanoŭski viadzie aktyŭnuju mižnarodnuju dziejnaść:
«Jon vystupiŭ na słuchańniach u Kanhresie ZŠA. Jon naviedaŭ adnu z najvažniejšych mižnarodnych kanfierencyj pa biaśpiecy [u Miunchienie]. (…)
Siarhiej pa-raniejšamu znajomicca z patrebnymi ludźmi i kankretna ciapier rychtujecca da vystupleńnia ŭ Kałumbijskim univiersitecie. Jon taksama atrymaŭ jašče niekalki zaprašeńniaŭ, pra jakija raskaža sam u svoj čas. Heta cikavyja zaprašeńni, i tam možna budzie abaraniać jaho palityčnuju daktrynu i prasoŭvać intaresy Biełarusi».
Razam z tym Prakopjeŭ zaklikaje nie čakać chutkich vynikaŭ misii Cichanoŭkaha ŭ ZŠA:
«Heta budzie doŭhaja mietadyčnaja praca — pryčym na minimalnych resursach. U nas niama nijakaha ofisa. Z kamandy jość tolki ja i Siarhiej».
Biudžet, pavodle jaho, zabiaśpiečvajecca nie hrantami, a «amierykanskim i biełaruskim biznesam u vyhnańni».
«Hety biudžet dazvalaje Siarhieju ścipła žyć, jeździć u kamandziroŭki i zajmacca asabistaj dypłamatyjaj. Siarhiej vychoŭvaje dziaciej i vyvučaje movu», — raskazaŭ Prakopjeŭ.
Asobna jon zakranuŭ temu krytyki Siarhieja Cichanoŭskaha. Pavodle jaho, jana idzie nie tolki z boku łukašenkaŭskaj prapahandy.
«Jaho sistemna i mietadyčna abiasceńvajuć i z našaha boku. I heta ceły atrad hałasoŭ. U hetym atradzie jość ludzi prosta niedalokija i niaŭdziačnyja. Ale kali pryhledziecca, tam jość i hałasy, jakija majuć svoj karyślivy intares».
Adnak Prakopjeŭ upeŭnieny: «Siarhiej spravicca».
«U jaho źjaviłasia hrupa padtrymki. Kali vy źviarnuli ŭvahu, Pavieł Sieviaryniec vykazaŭsia ŭ jaho padtrymku dastatkova doŭha i arhumientavana. A Siarhiej Sparyš niadaŭna vykryŭ paklop pra toje, što Mikoła Statkievič davaŭ niejkija acenki Cichanoŭskamu na miažy pierad tym, jak raźviarnucca. (…)
Chaču skazać: sproby abiascenić i sapsavać Siarhieju reputacyju pravalilisia. Ale jany buduć jašče. Atakavać buduć i jaho reputacyju, i abaviazkova maju reputacyju. U hetaha jość intarasanty. Dyj hramadstva naša traŭmavanaje. Tamu i biaźlitasnaje. Ale Siarhiej spravicca».
Čaho čakać ad Cichanoŭskaha ŭ ZŠA?
Adkazvajučy na pytańnie pra mahčymaść stvareńnia «centra siły» ŭ ZŠA, Prakopjeŭ vykazvajecca strymana. Pavodle jaho, pry najaŭnaści resursaŭ možna było b stvaryć paŭnavartasnaje funkcyjanalnaje pasolstva i pracavać adrazu na niekalkich kirunkach: asabistaja dypłamatyja, supracoŭnictva z ekśpiertnaj supolnaściu, praca z presaj i akademičnymi kołami.
Ale, jak zapeŭnivaje Prakopjeŭ, značnuju častku hetaj pracy možna rabić i ź nievialikimi resursami.
«Napeŭna, [u budučym] patrebny jašče ludzi. Ale pakul nie patrebny. Pakul Siarhiej sam rychtujecca, nahaniaje stračanaje i vyvučaje movu. U niejki momant, napeŭna, instytucyjanalizacyja Siarhieja niepaźbiežna pavinna adbycca. Ja dumaju, što źjavicca arhanizacyja», — davodzić Prakopjeŭ.
U misii Cichanoŭskaha ŭ ZŠA jon vyłučaje dźvie mety. Pieršaja — taktyčnaja: «spryjać praciahu vyzvaleńnia ludziej». Pavodle jaho, u ich jość «idei i dostup da asob, jakija zajmajucca hetym z amierykanskaha boku». Druhaja — stratehičnaja: «spryjać vyzvaleńniu krainy», dla čaho patrebny «vyrazny realistyčny płan». I taki płan, jak zapeŭnivaje Prakopjeŭ, u Cichanoŭskaha jość. Jaho nieabchodna abmiarkoŭvać «z pravilnymi ludźmi».
Adnak chutkich vynikaŭ čakać nie varta.
«Kali vy dumajecie, što možna adrazu da [ziacia prezidenta ZŠA Donalda Trampa Džareda] Kušniera i chutka vykłaści jamu vyhady dla nacyjanalnaj biaśpieki ZŠA ad «finlandyzacyi» Biełarusi — i sprava budzie vyrašanaja… Heta naiŭnaje ŭjaŭleńnie pra toje, jak heta ŭsio pracuje.
Siarhieju treba nabrać vahu i reputacyju ŭnutry ZŠA. Jon cikavy, jaho žyćciovaja historyja niezvyčajnaja. Jon vyklikaje pavahu. Jamu treba być prysutnym šmat dzie. Heta sistemnaja praca. I asabistaja dypłamatyja, u tym liku vychad na takich asobaŭ [jak Kušnier], — heta chutčej vianok hetaj pracy, čym jaje nastupny krok», — patłumačyŭ Prakopjeŭ.
Kamientary
Navat niejak sumna