Premjer-ministr Malty Džozef Muskat zajaviŭ, što ŭviečary 11 sakavika samalot Ali Ziejdana spyniŭsia na dazapraŭku na terytoryi vostrava. Zatym były livijski premjer adpraviŭsia ŭ «inšuju jeŭrapiejskuju krainu».
Były premjer moh adpravicca ŭ Šviejcaryju, dzie jon pražyvaŭ u časy kiravańnia Kadafi. Ziejdan byŭ livijskim dypłamatam da 1980 hoda, kali syšoŭ z pasady i zastaŭsia na Zachadzie ŭ znak pratestu suprać Kadafi. Paśla hetaha jon zajmaŭsia pravaabarončaj dziejnaściu, bazujučysia ŭ Ženievie.
Jon padtrymaŭ paŭstańnie ŭ Livii, što vybuchnuła na chvali «arabskaj viasny». Kažuć, što mienavita Ziejdan pierakanaŭ prezidenta Francyi Nikala Sarkazi akazać vajennuju dapamohu paŭstancam.
Premjeram jon staŭ u 2012 hodzie, paśla pieršych u Livii svabodnych vybaraŭ.
U sieradu 11 sakavika, livijski parłamient vynies votum niedavieru Ali Ziejdanu, a časovym vykanaŭcam abaviazkaŭ premjera pryznačyŭ ministra abarony Abdału al-Tani.
Hienieralnaja prakuratura Livii praź niekatory čas abviaściła, što pačała ŭ dačynieńni da byłoha premjera rasśledavańnie. U suviazi z rasśledavańniem byłomu premjeru zabaranili pakidać krainu, ale, jak bačym, jon parušyŭ hetuju zabaronu.
U adstaŭku kiraŭnika ŭrada adpravili paśla skandału z paŭnočnakarejskim tankieram «Morninh Hłory».
Hetaje sudna zakupiła naftu ŭ livijskim porcie Es-Sidr, što znachodzicca pad kantrolem sieparatystaŭ, jakija abviaścili vobłaść Kirenaika aŭtanomijaj i dabivajucca bolšaj doli ŭ prodažy nafty. Karabli livijskich VMS sprabavali błakavać tankier i abiacali adkryć pa im ahoń u vypadku sproby schavacca, adnak «Morninh Hłory» zmoh syści ad pahoni.
Paśla padzieńnia Kadafi Livija zastajecca padzielenaj pa kłanavym i rehijanalnym pryncypie. Centralnaja ŭłada zastajecca słaboj. A ekspart nafty — hałoŭnaj krynicy dachodaŭ krainy — tak i nie vyjšaŭ na pieradrevalucyjny ŭzrovień.
Kamientary