Ukrainskamu biznesoŭcu Dźmitryju Firtašu pradjaŭlena abvinavačvańnie ŭ davańni chabaru indyjskim čynoŭnikam dla atrymańnia dazvołaŭ na raspracoŭku radoviščaŭ tytana ŭ Indyi.
Ab hetym paviedamlajecca ŭ raspaŭsiudžanym u sieradu pres-relizie ministerstva justycyi ZŠA.
Usiaho ŭ ramkach spravy pra rasśledavańnie mižnarodnaj karupcyjnaj schiemy pad śledstvam znachodziacca šeść čałaviek, u tym liku Dźmitryj Firtaš, vienhierski pradprymalnik Andraš Knop, hramadzianin Ukrainy Suren Hievarhian, indyjski palityk Ramačandra Rao i dva kamiersanty ź Indyi i Šry-Łanki.
Rasśledavańnie pakazała, što pačynajučy z 2006 hoda, u jakaści chabaru indyjskim čynoŭnikam było pieradadziena kala $18,5 młn u abmien na atrymańnie dazvołu na raspracoŭku hornazdabyŭnoj šachty ŭ indyjskim štacie Andchra-Pradeš.
Štohadovy prybytak ad prajektu moh dasiahnuć $ 500 młn. Častka tytana mieła pradavacca firmie Company A, jakaja bazujecca ŭ Čykaha.
Pa dadzienych śledstva, Firtaša vioŭ pieramovy ź indyjskimi čynoŭnikami i davaŭ rasparadžeńnie ab vydzialeńni im srodkaŭ u abmien na prefierencyi ŭ pradastaŭleńni dazvolnych dakumientaŭ.
Taksama pa jaho ŭkazańni, jak śćviardžajecca, padrablali dakumienty na pieradaču hetych hrošaj z metaj maskiroŭki niezakonnych vypłat pad zvyčajnyja kamiercyjnyja płaciažy.
Rasśledavańnie było praviedziena siłami padraździaleńnia FBR ŭ Čykaha, razhlad viadziecca śpiecyjalistami sud paŭnočnaj akruhi štata Ilinojs.
21 sakavika Dźmitryj Firtaš byŭ zvolnieny ziamielnym sudom Vieny z turmy pad zakład u 125 młn jeŭra. Tam jon apynuŭsia paśla taho, jak jaho zatrymała palicyja pa zapycie pravaachoŭnych orhanaŭ ZŠA.
Firtaš zajmaŭ 4-je miesca ŭ rejtynhu samych bahatych ludziej Ukrainy (2013). Jahonaje bahaćcie aceńvajecca ŭ $3,5 młrd. Jaho aktyvy abjadnanyja ŭ mižnarodnuju hrupu kampanij «Group DF», asnoŭnymi kirunkami dziejnaści jakoj źjaŭlajucca azotny, tytanavy, hazavy i bankaŭski biznesy. Jon uznačalvaje Fiederacyju pracadaŭcaŭ Ukrainy, jakaja abjadnoŭvaje ŭvieś bujny ŭkrainski biznes.
Vialiki rezanans u pačatku 2013 hoda vyklikała nabyćcio hrupaj Firtaša kampanii Inter Media Group, u jakuju ŭvachodziać telekanały «Inter», NTN, K1, «Mieha», «Enter-film», K2, «Piksiel» i MTV.
Jaho telekanały byli klučavymi ŭ prapahandzie Janukoviča. Napiaredadni ŭciokaŭ Janukoviča «Inter» rezka pamianiaŭ ton.
Ličycca, što Firtaš źviazany cienievymi suviaziami z Uładzimiram Pucinym. Prynamsi, mienavita z udziełam prezidenta Pucina było vyrašana, što pastaŭki hazu va Ukrainu «Hazprom» budzie ažyćciaŭlać nie naŭprost, a praz struktury Firtaša.
Dla hetaha ŭ 2004 hodzie ŭkrainski biznesmen supolna z «Hazpromam» stvaryŭ kampaniju «Rasukrenierha» dla ažyćciaŭleńnia tranzitu hazu va Ukrainu i ŭ krainy Jeŭrasajuza. U tym ža hodzie była nabyta aŭstryjskaja kampanija Zangas Hoch-und Tiefbau GmbH, jakaja śpiecyjalizujecca na budaŭnictvie hazapravodaŭ.
Kansalidavanaja vyručka Group DF za 2012 hod składała prykładna $6 młrd, a EBITDA — $ 1,3 młrd.
Ciapier čytajuć
Prakuror prosić dla eks-pamočnika Łukašenki Ihara Bryło 12 hadoŭ źniavoleńnia4
Kamientary