TBM stvaryła hrupu pa pytańni zakanadaŭčaj roŭnaści biełaruskaj i ruskaj moŭ
Rada hramadskaha abjadnańnia «Tavarystva biełaruskaj movy imia Franciška Skaryny» (TBM) na pasiadžeńni 11 studzienia stvaryła admysłovuju hrupu pa pytańni zakanadaŭčaj roŭnaści biełaruskaj i ruskaj moŭ, paviedamiŭ staršynia TBM Aleh Trusaŭ.
Hrupu ŭznačaliŭ namieśnik staršyni TBM Dzianis Tušynski. Pavodle słoŭ Trusava, hrupa stvoranaja ŭ suviazi z tym, što na praciahu bolš za 10 hadoŭ situacyja z vykarystańniem dziaržaŭnych moŭ u krainie raźvivajecca nie na karyść biełaruskaj. Prablemu niaroŭnaści ŭžyvańnia hetych moŭ pryznaje navat Kanstytucyjny sud, adznačyŭ kiraŭnik TBM.
26 śniežnia 2014 hoda KS nakiravaŭ adkaz na zvarot tavarystva, u jakim adznačyŭ, što pytańnie ab vykarystańni dźviuch dziaržaŭnych moŭ nieadnarazova razhladałasia Kanstytucyjnym sudom. U dakumiencie skazana, što pazicyi KS adnosna roznych pytańniaŭ vykarystańnia biełaruskaj movy ŭ hramadskich adnosinach źmiaščajucca ŭ šerahu rašeńniaŭ suda, jakija tyčacca ŭžytku dziaržaŭnych moŭ ŭ śfierach absłuhoŭvańnia, sistemie strachavańnia, paznačeńni hieahrafičnych abjektaŭ, adukacyi.
Razam z tym u KS kanstatujuć, što «pry farmalna-jurydyčnym raŭnapraŭi dziaržaŭnych moŭ na praktycy bałans ich vykarystańnia nie zaŭsiody zachoŭvajecca». Hetaj ža farmuloŭkaj Kanstytucyjny sud karystaŭsia ŭ śniežni 2003 hoda, kali pytańnie roŭnaści biełaruskaj i ruskaj moŭ razhladałasia na asobnym pasiadžeńni suda.
«Jany pryznali, što nijakaj roŭnaści ŭ nas niama, my dziakujem im za toje, — adznačyŭ Trusaŭ. — Jany pryznali, što pačynajučy z 2003 hoda ničoha nie źmianiłasia, choć pa idei niešta pavinna było źmianicca paśla rašeńnia suda (u 2003 hodzie KS prapanoŭvaŭ parłamientu razhledzieć pytańnie ab papraŭkach u moŭnaje zakanadaŭstva)».
Tavarystva biełaruskaj movy maje stasunki z Pałataj pradstaŭnikoŭ pa pytańniach roŭnaha ŭžytku moŭ bolš za 10 hadoŭ, adznačyŭ kiraŭnik abjadnańnia. Ciapier hetyja pieramovy z parłamientaryjami budzie vieści admysłovaja moŭnaja hrupa TBM.
Ciapier čytajuć
Ejsmant: Łukašenka nie zmoža palacieć na Samit miru ŭ ZŠA, bo pavietranaja prastora Jeŭropy dla jaho zakrytaja38
Kamientary