24 lutaha spoŭniłasia b 80-hadoŭ narodnamu paetu Biełarusi Ryhoru Baradulinu, admysłova da jubileja lidar hurta Vuraj, salist Biełdziaržfiłarmonii Siaržuk Doŭhušaŭ, padrychtavaŭ prahramu narodnych pieśniaŭ Vušaččyny – tych samych, jakija praz usio žyćcio natchniali dziadźku Ryhora. My parazmaŭlali sa spadarom Doŭhušavym pra asabistaje znajomstva z paetam i mistyku pieśniaŭ Połaččyny.
Pra asabistaje znajomstva
Ja vielmi chacieŭ paznajomicca z Ryhoram Baradulinym, asabliva kali pačuŭ zapisy, dzie jon śpiavaje narodnyja pieśni, paśla pačaŭ cikavicca vieršami Baradulina. U hości da spadara Ryhora mianie pryvioŭ Siarhiej Paniźnik, na jakoha ja litaralna nasieŭ z prośbaj: «Paznajomcie mianie z Baradulinym». U vyniku my rehularna prychodzili da jaho, časam navat z hurtom Vuraj. Užo paśla śmierci vyśvietliłasia, što Baradulin pryśviaciŭ mnie akra-vierš.
Pra apošniuju sustreču
Apošni raz my sustrelisia za try dni da śmierci Baradulina, ja pryjšoŭ da jaho razam z Alaksandram Jasinskim, my praśpiavali jamu paru pieśniaŭ – spadar Ryhor vielmi ŭzradvaŭsia, my pasiadzieli hadzinku, Baradulin prapanavaŭ nam pakaštavać samahonki, adnak my admovilisia – uviečary byŭ kancert, damovilisia pryjści jašče raz. Było niejkaje pradčuvańnie, što heta adna z apošnich našych sustreč, ale my nie dumali, što jana stanie apošniaj.
Pra jubilejnuju prahramu
U adnu z sustrečaŭ Baradulin padaryŭ mnie maleńkuju knižačku «Pieśni matčyny z Vušaččyny», jakuju jon ukłaŭ z narodnych pieśniaŭ rodnaha kraju. Heta roznyja pieśni – viesnavyja, vosieńskija, žniŭnyja, viasielnyja, chreśbinnyja, vałačobnyja, zastolnyja. Reč u tym, što mienavita ŭ hetych pieśniach uvieś Baradulin, litaralna ŭsio jahonaje žyćcio. Pieśni nadzvyčaj hłybokija – my pracujem nad prahramaj, chodzim jak fanatyki, z hetym materyjałam niaprosta pracavać: kali prydumvaješ da słovaŭ muzyku, pieśnia litaralna pačynaje dyktavać svaje ŭmovy – dzie-nidzie my ŭvohule pakidajem tolki hołas i bubny.
Udzielniki kancerta
U kancercie voźmie ŭdzieł naš novy prajekt Harmonic Style – heta častka muzykaŭ hurta Vuraj, adnak u pieršaasnovie aranžyrovak – harmonik, u vyniku majem taki mini-skład – vakał, harmonik, bajan, bubny, dudački i śpievy. Da taho ž razam z nami vystupić małady kampazitar Viačasłaŭ Piaćko, jaki tym razam budzie vystupać u nie samaj zvykłaj dla siabie formie – jak vykanaŭca.
Pra budučyniu prajekta
Ja nie lublu razavych prajektaŭ, adnak jašče na pachavańni Baradulina ja daŭ abiacanku, što zrablu kancert pamiaci dziadźki Ryhora ŭ Fiłarmonii. Paśla da mianie dałučylisia inšyja muzyki, u vyniku my majem cełuju prahramu z 15 pieśniaŭ. Adrazu paśla vystupu my pajedziem zapisvać prahramu ŭ studyi, u lutym-sakaviku budziem pravodzić Śpieŭnyja schody pavodle pieśniaŭ prajekta, a paśla chočam pravieźci prahramu pa ŭsioj krainie: takim čynam jašče raz nahadać usim pra Ryhora Baradulina.
Kancert pamiaci Ryhora Baradulina adbudziecca 24 lutaha ŭ małoj zali Fiłarmonii. Pačatak a 19-j hadzinie.
U kancercie biaruć udzieł:
Viačasłaŭ Piaćko — vieršy
Siaržuk Doŭhušaŭ — śpievy, dudki
Jaŭhien Kurylčyk — bajan
Lonia Paŭlonak — bubny, pierkusija
Daša Trubina — śpievy
Stasia Kuźmič — śpievy
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie10
Kamientary