Kala 200 litoŭskich fur jašče zastajucca ŭ Biełarusi. Mahčyma, ich i nie zabiaruć
Pa słovach kiraŭnika asacyjacyi pieravozčykaŭ Linava Erłandasa Mikienasa, navat praz bolš jak dva miesiacy paśla taho, jak biełaruskija ŭłady dazvolili zatrymanym na terytoryi Biełarusi litoŭskim furam viarnucca na radzimu, častka srodkaŭ transpartu — kala 200 štuk, — usio jašče zastajecca ŭ krainie, piša LRT.
Pa słovach Erłandasa Mikienasa, u Biełarusi zastałosia nie bolš za 200 transpartnych srodkaŭ, uklučajučy jak sami ciahačy, tak i paŭpryčepy. Adnak vialikaja vierahodnaść, što hetyja hruzaviki ŭžo nie viernucca ŭ Litvu.
Heta źviazana z tym, što ich viartańnie ekanamična niavyhadnaje: płata za zachoŭvańnie vielmi vysokaja i ŭ niekatorych vypadkach pieravyšaje košt samoha transpartu. Naprykład, za adzin aŭtapojezd treba zapłacić kala 6 tysiač jeŭra. Tamu niekatoryja kampanii admaŭlajucca ad svaich mašyn, a inšyja jašče sprabujuć sabrać hrošy, kab ich viarnuć.
Dadatkovyja ciažkaści ŭźnikajuć z-za sankcyj: kab zabrać transpart, treba zrabić płaciažy biełaruskaj kampanii, jakaja znachodzicca pad jeŭrapiejskimi abmiežavańniami, i heta moža ličycca parušeńniem sankcyj.
Pradstaŭnik litoŭskaj słužby achovy miažy paviedamiŭ, što z kanca sakavika, kali źjaviłasia mahčymaść viartańnia, u Litvu ŭžo viarnułasia da tysiačy hruzavikoŭ. Dakładnuju kolkaść ciapier nie vyznačajuć, bo ŭ apošni čas jany viartalisia vielmi pavolna — usiaho pa niekalki mašyn u dzień.
Prablema z furami ŭźnikła paśla taho, jak u adkaz na pastajanny zapusk ź Biełarusi ŭ Litvu kantrabandnych pavietranych šaroŭ, jakija pieraškadžali pracy vilenskaha aeraporta, litoŭskija ŭłady časova zakryli miažu. Tady biełaruski bok zabaraniŭ litoŭskim hruzavikam ruchacca pa svajoj terytoryi i prymusiŭ ich stajać na śpiecyjalnych stajankach, za jakija ciapier patrabujecca apłata. Prytym nie źmianiŭ svaju pazicyju navat davoli praciahły čas paśla taho, jak miaža była adkrytaja.
Što da ciapierašniaj situacyi na miažy, to punkty propusku pracujuć narmalna i bieź pierahruzki. Praź ich štodnia prajazdžaje peŭnaja kolkaść hruzavikoŭ, ale ahulny patok źmienšyŭsia. Čerhi značna skaracilisia: kali raniej kiroŭcy mahli čakać sutkami, to ciapier čakańnie zvyčajna zajmaje tolki niekalki hadzin, a časam čerhaŭ niama ŭvohule.
Pieravozčyki adznačajuć, što ŭvohule hruzavyja patoki pamiž Litvoj i Biełaruśsiu ciapier minimalnyja, bo značnaja častka pieravozak pierajšła na maršruty praz Polšču.
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie7
Kamientary