Z 1 krasavika ŭ vystavačnaj zale filijała Nacyjanalnaha histaryčnaha muzieja Respubliki Biełaruś «Muziej historyi biełaruskaha kino» pačynaje rabotu prymierkavanaja da Mižnarodnaha Dnia śmiechu vystava «LATUČAJA, HARUČAJA, PRAZRYSTAJA: HISTORYJA PROMYSŁU I BARAĆBY Ź IM U BIEŁARUSI», jakaja padrychtavana sumiesna z RHA «Biełaruski sajuz dyzajnieraŭ».
Aficyjnaje adkryćcio vystavy adbudziecca 1 krasavika a 17-j hadzinie.
Tradycyja samahonavareńnia ŭ Biełarusi viadoma z XV stahodździa. Samahonka ŭ historyi našaj krainy stanaviłasia jak čyńnikam haspadarčaha rostu, tak i sapraŭdnym bičom na šlachu raźvićcia hramadstva. Vyrab harełki kantralavaŭsia dziaržavaj, a časami stanaviŭsia niesankcyjanavanym. Apošni pieryjad rostu niesankcyjanavanaha vyrabu źviazany z 1939 hodam i abjadnańniem terytoryi Biełarusi ŭ jaje sučasnych miežach. Čas vajennaha lichalećcia, častaj źmieny ŭłady prymušaŭ nasielnictva šukać stabilnuju «valutu» dla ŭzajemnych raźlikaŭ. Samahonavareńnie zaležała ŭ pieršuju čarhu ad najaŭnaści žyta ŭ sialan, tamu spačatku istotna raspaŭsiudziłasia ŭ Zachodniaj Biełarusi, nie abciažaranaj kałhasnym ładam.
U najnoŭšaj historyi samahonavareńnie stała abjektam pieraśledu z boku dziaržavy. Z dapamohaj piara, pendźla i słova z hetaj źjavaj zmahałasia satyra i nahladnaja ahitacyja.
Siońnia samahonka – častka nacyjanalnaj niemateryjalnaj kulturnaj spadčyny; jak i biełaruskaja kuchnia, jana vyznačaje rehijanalnuju admietnaść, raskryvaje turystyčny patencyjał krainy. U jakaści demanstracyi samahonu jak kulturnaj spadčyny jaho prapanujuć siońnia šmatlikim turystym, naviedvalnikam ahra-siadzibaŭ, kulturnickich zapaviednikaŭ, muziejnych kompleksaŭ.
Ekspazicyja vystavy prezientuje ŭzory samahonnych aparataŭ, atrybuty, jakija supravadžali sam praces samahonavareńnia. Značnuju častku ekspanataŭ składajuć uzory savieckich płakataŭ antyałkaholnaj nakiravanaści. Žanr satyry, jaki vykryvaŭ sacyjalnyja stereatypy, źviazanyja z pjanstvam, siońnia užo źjaŭlajecca historyjaj. Satyryčnaja hrafika na hetuju temu pa-asablivamu vyjaŭlaje tvorčaść takich viadomych biełaruskich mastakoŭ jak Barys Zaboraŭ, Mikałaj Hurło, Leanard Čurko, Askold Čurkin, Jaŭhien Busieł i inš. Hramadzianskaja liryka, jakuju stvarali da płakataŭ, naležyć nie mienš viadomym biełaruskim aŭtaram-litarataram, Ryhoru Baradulinu, Hienadziu Klaŭko, Ivanu Stadolniku. Płakaty paźniejšaha pieryjadu naležać aŭtarstvu Uładzimira Krukoŭskaha, Uładzimira Ceślera, Siarhieja Vojčanka, Dźmitryja Maślija i inš.
Naviedvalnikam vystavy prapanujucca videahidy, jakija raskryvajuć cikavyja staronki z historyi samahonavareńnia. Z kulturałahičnaha punktu hledžańnia asablivaści kultury spažyvańnia ałkaholu ŭ biełarusaŭ razhladaje doktar fiłasofii Iryna Dubianieckaja. Ahlad historyi samahonavareńnia, jaho rolu ŭ sistemie haspadarki, cikavyja archiŭnyja spasyłki prapanuje doktar histaryčnych navuk Valancin Hołubieŭ.
Partnioram prajektu vystupiŭ muziejny kompleks «Dudutki», jaki adradžaje staradaŭnija technałohii i recepty, u jakaści demanstracyi kulturnaj spadčyny ŭ miežach vystavy ładzić dehustacyi.
Muziej historyi biełaruskaha kino
Adras: h. Minsk, vuł. Śviardłova, 4
Kožny dzień (akramia paniadziełka) z 10.00 da 19.00
Teł. dla daviedak: 327 10 75; 029 627 10 75
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie8
Kamientary