Nadzieja Jermakova zdavała katedž u Drazdach za $6 tysiač FOTY interjeraŭ
U tym, dzie raniej žyła eks-kiraŭnik Nacbanka, sakretu nie było. «Naša Niva» nie adnojčy zhadvała miesca ŭ Drazdach.
Viadoma, što ŭčastak u 15 sotak byŭ vydzieleny Nadziei Jermakovaj jašče ŭ siaredzinie 2000-ch. Razam ź joj pobač budavalisia i inšyja čynoŭniki, biznes- i sportelita. Paźniej hety dom byŭ pierapisany na starejšuju dačku Natallu Čepikavu. Tym nie mienš, Nadzieja Andrejeŭna tak i zastałasia ŭ elitnaj pryvatnaj zabudovie, atrymaŭšy jašče 15 sotak i pabudavaŭšy sabie jašče adzin dom na pieršaj bierahavoj linii ŭ vioscy Viaśninka, pra jakuju ŭžo nie raz pisali.
Ciapier dom u Izumrudnym zavułku zdajecca ŭ doŭhaterminovuju arendu z usioj meblaj i bytavoj technikaj.
Na 15 sotkach u haspadaroŭ hetaha doma znachodzicca nievialiki stavok z presnaj vadoj z darožkaj, brukavanaj kamieniem, zona dla barbiekiu ź piečču-kaminam i lažankaj.
Pobač z zonaj dla adpačynku raźbity aharod z vysokimi parasonami kropu i inšaj zielaninaj, jakuju ciapierašnija haspadyńki vyroščvajuć, «kab da stała była svaja zielanina». Tut ža pasadžany małady fruktovy sadok.
U abjavie ŭkazana, što katedž dvuchuzroŭnievy, płoščaj 336 kvadratnych mietraŭ. Adzin z šaści pakojaŭ adviedzieny pad haścinuju z kaminam i kanapavaj zonaj. Na kaminie zaŭvažana ramka-dreva ź siamiejnymi fotazdymkami. Razhledzieć, chto na ich, składana. Zatoje nie vyklikaje sumnieńniaŭ partret na kamodzie, na jakim sama eks-kiraŭnik Nacbanka Nadzieja Jermakova.
Nad televizaram na palicy staić viasielnaje fota adnoj z dačok, akuratna rasstaŭlenaja kalekcyja lalek — takich paraŭnalna niadaŭna pradavali ŭ šapikach «Biełsajuzdruku». Trochi vyšej stajać fihurki słanoŭ i viarbludaŭ.
Na druhuju fatahrafiju patrapili abiedzienny stoł i kot.
U kabiniecie staić skurany harnitur, na pracoŭnym stale — firmovy kalandar Nacbanka. Taki ž kalandar možna było zaŭvažyć i na pracoŭnym stale Nadziei Andrejeŭny ŭ Nacbanku, kali tam byŭ dzień adčynienych dźviarej. Darečy, tady hałoŭnaja bankirša krainy nazvała draŭlanaje, ababitaje tkaninaj kresła «karaleŭskim».
— Heta karaleŭskaje kresła. A ja nie karaleva. Heta kresła siońnia prosta pastavili dla karcinki, kab było pryhoža. Ale ja takija nie lublu, — kazała ŭ intervju TUT.BY Nadzieja Jermakova.
Na ścianie, tam, dzie ŭ dziaržstrukturach zvyčajna viešajuć inšy partret, tut, doma — zdymak Merylin Manro.
Miarkujučy pa aknie ŭ stoli, spalnia znachodzicca na druhim paviersie. Tut usio ścipła.
Jak miarkujecca, na druhim paviersie znachodziacca i dva dziciačyja pakoi.
Na sajcie ŭkazany košt za arendu hetaha doma: za miesiac treba budzie zapłacić šeść tysiač dalaraŭ.
Abviestka źjaviłasia ŭ internecie jašče da taho, jak Minhandlu stroha zabaraniŭ ŭkazvać ceny ŭ valucie. U biełaruskich rublach ciapier košt arendy hetaha doma byŭ by kala 96 miljonaŭ u miesiac.
Žurnalisty patelefanavali na paznačany u abviestcy numar, pacikavilisia, ci zdajecca dahetul hety dom. Darečy, katedž prapanoŭvali ŭ arendu i letaś, ale košt byŭ jašče vyšejšym — 7,5 tysiačy dalaraŭ.
— U dadzieny momant my pieradumali zdavać dom, ci budzie jon zdavacca nadalej — nie mahu dakładna skazać, — adkazali nam na zvanok.
Susiedzi tut — nie mienš upłyvovyja domaŭładalniki: biznesmien Alaksandr Šakucin, tenisistka Viktoryja Azaranka, namieśnik staršyni Biełaruskaj fiederacyi tenisa Siarhiej Ciacieryn i inšyja.
* * *
Adstaŭka Nadziei Jermakovaj. «Jana vyrasła ŭ chacie biez elektryčnaści, a była kiraŭnicaj Nacbanka»
* * *
Kamientary