U Biełdziaržfiłarmonii siońnia vialiki viečar pamiaci Ryhora Baradulina i Hienadzia Buraŭkina
Siońnia a 19-j hadzinie ŭ Vialikaj zale Fiłarmonii adbudziecca kancert pamiaci paetaŭ Ryhora Baradulina i Hienadzia Buraŭkina «Struny serca čystaha». Ideja pravieści miemaryjalnuju viečarynu naležyć narodnamu artystu Biełarusi, dyryžoru Michaiłu Kazincu.
«My byli z adnaho pakaleńnia, a z Hienadziem Mikałajevičam my jašče siabravali. Luboŭ da biełaruskaj paezii pryjšła da mianie ŭ dalokija 1960-ja pad upłyvam paezii Baradulina i Buraŭkina.
Ryhor Baradulin — pieršaadkryvalnik novych dalahladaŭ u leksicy paezii. U jaho vieršach rassypany razynki narodnaha humaru.
Hienadź Buraŭkin — paet-liryk, ale i ŭ rańniaj, i ŭ poźniaj lirycy jon zaŭsiody paŭstaje vialikim fiłosafam i hramadzianinam. I Baradulin, i Buraŭkin — heta nośbity biełaruskaści, abodva vielmi tonka adčuvali biełaruskuju movu.
Los rasparadziŭsia tak, što jany pajšli z žyćcia amal adnačasova, adzin za adnym — viasnoj 2014 hodu…», — tak patłumačyŭ narodny artyst Biełarusi Michaił Kaziniec svoj vybar.
U pieršym adździaleńni miemaryjalnaj viečaryny prahučać pieśni na vieršy paetaŭ. U supravadžeńni Nacyjanalnaha akademičnaha narodnaha arkiestra imia Žynoviča pad kiraŭnictvam Michaiła Kazinca buduć śpiavać Źmicier Vajciuškievič, Jadźviha Papłaŭskaja i Alaksandr Cichanovič, Ihar Zadarožny, Andrej Kołasaŭ, charavaja kapeła imia Ryhora Šyrmy.
U 2-m adździaleńni Michaił Kaziniec budzie dyryžyravać Dziaržaŭnym akademičnym symfaničnym arkiestram. Budzie vykananaja Šostaja symfonija Andreja Mdzivani «Połackija piśmiony».
Kamientary