Z-za školnaj party — u namiot na 15 čałaviek. Jak staršakłaśnikaŭ buduć prymusova rychtavać da słužby
Navučencaŭ čakajuć armiejskija namioty, strohi rasparadak dnia i charčavańnie, maksimalna nabližanaje da vajskovaha.
Biełaruskija vajskoŭcy ŭ efiry STB prademanstravali ŭmovy, u jakich buduć prachodzić abaviazkovyja vučebna-palavyja zbory dla staršakłaśnikaŭ, zaŭvažyła vydańnie «Lusterka».
Dla ŭdzielnikaŭ užo padrychtavali vialikija armiejskija namioty, u kožnym ź ich buduć raźmiaščać nie bolš za 15 čałaviek. Ahułam bryhada prymie 60 staršakłaśnikaŭ z čatyroch škoł Minskaj vobłaści i Minska.
Vučebna-palavyja zbory pačnucca 25 maja i praciahnucca dziesiać dzion. Jak raskazaŭ kamandzir asobnaha radyjotechničnaha bataljona 49‑j radyjotechničnaj bryhady VPS i vojskaŭ SPA Dzianis Bobak, umovy dla školnikaŭ pasprabujuć maksimalna nablizić da armiejskich.
«Matrac, navałačka, vydzialajecca ručnik, asabistyja rečy pieršaj nieabchodnaści jany zachoŭvajuć u tumbačkach, astatnija rečy buduć zachoŭvać akuratna pad łožkam», — raskazaŭ Bobak.
Akramia taho, namioty abstalujuć aśviatleńniem i dadatkovymi srodkami abahravańnia, bo «nočy pakul chałodnyja, raptam choładna stanie».
Ranicaj školniki buduć karystacca armiejskimi rukamyjnicami, a ŭviečary zmohuć naviedvać vajskovuju łaźniu. Jak adznačyŭ Dzianis Bobak, u łaźni praduhledžany asobnyja pamiaškańni dla pieraapranańnia i myćcia, a taksama haračaja vada. Charčavańnie arhanizujuć u armiejskaj stałovaj.
«Spłanavana standartnaje mieniu, nabližanaje da armiejskaha. Śniadanak, abied, viačera, dadatkova praduhledžany padviačorak. Na padviačorak budziem vydavać dadatkova šakaład i małako. Racyjon dastatkova zbałansavany: ryba, syr, boršč. Usio dla taho, kab chłopcam chapała enierhii na ceły dzień», — paviedamiŭ kamandzir bataljona.
Žyćcio na zborach budzie prachodzić pavodle strohaha rasparadku, raskazaŭ namieśnik kamandzira 49‑j radyjotechničnaj bryhady pa ideałahičnaj rabocie Artur Babachanian.
«Rasparadak dnia ŭ nas uklučaje ranišni ŭzdym, ranišnija tualety, śniadanak, paśla śniadanku pastrajeńnie, viadoma, razvod na praviadzieńnie zaniatkaŭ, abied. Paśla abiedu my dadzim im trochi adpačynku, paśla hetaha znoŭ zaniatki, i buduć pravodzić ź imi vychavaŭčuju rabotu, roznyja zabavy, hulniu ŭ valejboł, futboł. Što nieabchodna dla ich, usio budzie skancentravana i pravodzicca ŭ tych ža maštabach, jak dla vajennasłužačych terminovaj słužby», — zajaviŭ jon.
Nahadajem, dziesiać dzion zboraŭ uklučajuć 60 navučalnych hadzin. U školnikaŭ projduć zaniatki pa taktyčnaj, fizičnaj, vajenna-miedycynskaj padrychtoŭcy, akazańni pieršaj dapamohi. A jašče strajavaja padrychtoŭka, ahniavaja padrychtoŭka, abarona ad zbroi masavaha paražeńnia, vyvučeńnie ahulnavajskovych statutaŭ.
Kamientary