Siarhiej Navumčyk prylacieŭ u Biełaruś paśla 20 hadoŭ palityčnaj emihracyi

Navumčyk pačaŭ svaju pajezdku z naviedvańnia mahiły Vasila Bykava, a dalej pabyvaje ŭ svaich baćkoŭ.

Siarhiej Navumčyk i Zianon Paźniak pakinuli Biełaruś u 1996 hodzie, kali im pahražaŭ pieraśled za biesparadki padčas masavaha šeścia «Čarnobylski šlach». Jany atrymali palityčny prytułak u ZŠA. Navumčyk znajšoŭ pracu na radyjo «Svaboda», jakoje finansujecca Kanhresam ZŠA.

«Hety byŭ vymušany krok, — skazaŭ Navumčyk u Minsku. — Daŭšy tady palityčny prytułak Zianonu Paźniaku i mnie, ZŠA faktyčna dali adnaznačnuju acenku kursu, na jaki paviarnuŭ režym u Biełarusi», — cytuje jaho radyjo «Svaboda».

Jon vypraviŭsia tudy z bukietam ružaŭ prosta z aeraporta, kab ušanavać pamiać Vasila Bykava.

Pavialičyć

«Za hetyja 20 hadoŭ nie było ni dnia, kali b ja nie dumaŭ pra viartańnie ŭ Biełaruś, — skazaŭ Navumčyk. — Na mahiłu Bykava pryjechaŭ, bo jon šmat značyŭ u maim losie. Na žal, na pachavańnie ja pryjechać nie zmoh, tamu choć tak».

Taksama Navumčyk uskłaŭ kvietki da mahił paeta Hienadzia Buraŭkina i žurnalista Ihara Hiermiančuka.

Pavialičyć

U Biełaruś Navumčyk pryjechaŭ na niekalki dzion. «Raniej maje baćki mahli jeździć da nas, ciapier užo nie — uzrost. Maja dačka, jakaja naradziłasia ŭ Amierycy, uvohule pieršy raz pryjechała ŭ Biełaruś, choć u jaje biełaruskaje hramadzianstva. Jana nikoli nie bačyła svaich dzieda i babku pa linii maci. Tamu, kali baćki vykazali žadańnie nas pabačyć, my nie mahli nie pajści im nasustrač», — raspavioŭ jon.

Pavodle słoŭ Navumčyka, pryjechać jon zmoh, bo situacyja ź jaho biaśpiekaj źmianiłasia. 

Siońnia ŭ płanach pajezdka na małuju radzimu žonki, potym — niekalki dzion u Minsku.

Pavialičyć

Hałoŭnaje ŭražańnie ŭ Siarhieja Navumčyka – što jon viarnuŭsia dadomu.

«Choć za 20 hadoŭ i źmianiłasia amal usio tut, ja adčuvaju, što heta ŭsio svajo, što ja doma, — kaža Navumčyk. — Taksama dačka mnie skazała, što razumieje, čamu rasiejskija kiniematahrafisty zdymajuć svaje sieryjały ŭ Minsku — bo heta sapraŭdy vielmi pryhožy horad».

Pry hetym jon uzhadaŭ, što ŭ emihracyi prajšła amal pałova jaho žyćcia. Ale Navumčyk padkreśliŭ, što nikoli nie chacieŭ źjazdžać z krainy, heta nie byŭ jaho vybar. Pa jaho słovach, pieršapačatkova jon płanavaŭ pravieści za miažoj niekalki tydniaŭ, ale ž potym daviedaŭsia, što jość realnaja niebiaśpieka jaho žyćciu, tamu ŭ Biełaruś vyrašyŭ nie viartacca.

Navumčyk padkreśliŭ, što jon nie źmianiŭ svaich pohladaŭ: «Ja zastajusia na tych pazicyjach, na jakich i byŭ. I kali kali kraina nazyvajecca Respublika Biełaruś, to kiraŭnik pavinien zajmać pasadu nie bolš za dva terminy, kali heta sapraŭdy respublika, a nie manarchija».

Na pytańnie, ci płanuje jon viarnucca na pastajanna i ci nie źbirajecca ŭznačaljić partyju ci stvaryć ułasny ruch, Navumčyk adkazaŭ tak: «Ja liču, što maja i maich kalehaŭ pa apazicyi hałoŭnaja histaryčna-palityčnaja misija była vykananaja 21 žniŭnia 1991 hoda, kali pry padtrymcy tysiač ludziej my stvaryli hetuju krainu, kali prymali pieršyja zakony. I ja razumieju, što ja ŭ palitycy ničoha bolš nie zrablu. Tamu dla mianie siońnia hałoŭnaje — zaviaršyć cykł knih najnoŭšaj historyi. A ŭvohule, jość takaja prymaŭka: «Chočaš naśmiašyć Boha — raskažy jamu pra svaje płany na nastupny tydzień».

Pavialičyć

Apytanka

• 0
• 0
• 0
• 0
• 0
• 0
• 0
• 0