«Chroniki Narnii: Prync Kaśpijan»
Chaładnavataje fentezi pra hieraičnyja bitvy
Chroniki Narnii: Prync Kaśpijan (The Chronicles of Narnia: Prince Caspian)
ZŠA – Vialikabrytanija, 2008, kalarovy, 108 chv.
Režyser: Endru Adamsan
Roli vykonvajuć: Ben Barnz, Džordž Hienli, Skandar Kajnz, Ŭiljam Moźli, Serdžya Kastelita, Piter Dzinkłejdž, Ŭorŭik Dejvis
Žanr: Fentezi pavodle knihi Kłajva Synklera Ljuisa
Adznaka: 5,5 (z 10)
Hieroi narnijskich chronik dzieci Pieviensi viartajucca ŭ čaroŭnuju krainu. Ale, kali ŭ Anhlii prajšoŭ hod, to ŭ Narnii minuli stahodździ. Kraina razburanaja, hnomy j kientaŭry schavalisia ŭ lasach, a pa susiedztvie panuje padstupny karol Miraz. U Narnii jość nadzieja – juny prync Kaśpijan. Anhielskija padletki – “staražytnyja karali i karalevy” dałučajucca da Kaśpijana i ŭznačalvajuć narnijskuju armiju…
Druhaja častka narnijskich chronik patanaje ŭ popielna-šerych kolerach zła. Ahramadny pałac Miraza, ciomnyja sutareńni, načnyja sceny, źlakany j ścišany les. Chacia kamputarnych efektaŭ, u paraŭnańni z papiaredniaju častkaj, niašmat, dekaracyi j kaściumy ŭražvajuć: dla armii talmaryncaŭ było vykavana amal 4 tysiačy kalčuhaŭ i masak. Hieroi-padletki zaciata vajujuć (i zabivajuć!), kryčyć u pakutach paradzicha, uśmichajecca zły karol.
Chryścijanskija aluzii, jakija zachoŭvalisia ŭ raniejšych chronikach, z hetaha filmu źnikli; stužka pieraŭtvaryłasia ŭ chaładnavata-niazhrabnaje fentezi pra hieraičnyja bitvy.
Chacia finalnaja bojka – maštabna-vidoviščnaja, śvietłyja čary dabra vydychlisia; anhielskija dzieci – vajaŭniča-badzioryja makiety, a mudry leŭ – kamputarny statyst.
Na hetkim tle zuchavaty bajavy myš – jak balzam na hladackaje serca.
Aktor Ben Barnz u roli prynca Kaśpijana biare bolš fakturaj, padkałodna-padstupny Serdžya Kastelita (karol Miraz) jaho pierajhraje.
“Prync Kaśpijan” nia lezie ŭ šedeŭry, ale j nie katuje nudoj. Zaŭziatary “Chronik Narnii” znojduć u im darahija ŭzhadki, ale j niezadavolenych budzie šmat.
U dakumientach pa «spravie Epštejna» znajšli ślady bujnych hrašovych pieravodaŭ u Minsk. Znoŭ uspłyło imia Karyny Šulak44
Kamientary