Tramp zajaviŭ, što ZŠA, mahčyma, zaklučać mirnaje pahadnieńnie ź Iranam

Prezident ZŠA Donald Tramp, vystupajučy ŭ aŭtorak na siesii Hienieralnaj Asamblei AAN, skazaŭ, što, na jaho dumku, Złučanyja Štaty padpišuć mirnaje pahadnieńnie ź Iranam paśla pramiežkavych vybaraŭ u Kanhres ZŠA, jakija projduć 3 listapada, piša Bi-bi-si.

Akramia Irana, u svajoj pramovie Tramp zakranuŭ vajnu va Ukrainie, los Kuby i novaje pahadnieńnie ab Hrenłandyi, a taksama prapanavaŭ pierajmienavać štučny intelekt.

«Ja dumaju, my zaklučym ździełku [ź Iranam] adrazu paśla vybaraŭ, tamu što im niama sensu jaje nie zaklučać. Jany čakajuć, jak u mianie pojduć spravy na pramiežkavych vybarach», — skazaŭ Tramp.

Tehieran zajavu Trampa nie kamientavaŭ, ale sam amierykanski lidar paśla vystupleńnia skazaŭ, što aficyjnyja pradstaŭniki ZŠA i Irana sustrelisia ŭ Ńju-Jorku na palach siesii Hienieralnaj Asamblei AAN upieršyniu za niekalki miesiacaŭ (jak udakładniaje Financial Times, z kanca červienia).

Vašynhton na sustrečy pradstaŭlali pasłańniki Trampa Styŭ Uitkaf i Džared Kušnier, Tehieran — kiraŭnik MZS Abas Arahčy. Pieramovy vialisia praz pasiarednikaŭ, jak heta adbyvałasia i raniej.

«Siońnia na palach Hienieralnaj Asamblei AAN my praviali praciahłyja pieramovy ź iranskaj delehacyjaj pry pasiarednictvie pradstaŭnikoŭ, jakija ciaham usiaho dnia kursiravali pamiž bakami. Byŭ paśpiachova zavieršany raund abmierkavańniaŭ, jaki, jak my spadziajomsia, apyniecca kanstruktyŭnym i pierśpiektyŭnym. Pasiaredniki praciahnuć svaju pracu», — napisaŭ paźniej Uitkaf u sacyjalnaj sietcy X.

U svaim vystupleńni z trybuny AAN Donald Tramp zajaviŭ, što jamu treba budzie pryniać važnaje rašeńnie: źniščyć Iran abo zaklučyć ź im pahadnieńnie.

«Mnie treba budzie pryniać važnaje rašeńnie. Ci budzie zaklučana ździełka ź Iranam, jakaja dazvolić jamu adnavić krainu i zrabić jaje značna bolš vialikaj, čym jana kali-niebudź była, — skazaŭ prezident ZŠA, — ci mnie źniščyć Isłamskuju Respubliku i zrabić heta chutka, kab jany bolš nie mahli zabivać ludziej i razburać krainy?»

«Ci ŭčynić im piekła biez šancaŭ na vyžyvańnie, biez nadziei na vialikuju budučyniu i budučyja pakaleńni? Ale ja dumaju, my zaklučym ździełku adrazu paśla vybaraŭ», — praciahnuŭ Tramp.

Tramp zaklikaŭ inšyja krainy śvietu padtrymać cisk na Iran, a taksama ŭ čarhovy raz zajaviŭ, što ZŠA, raspačaŭšy vajnu suprać Irana, praduchilili stvareńnie im jadziernaj zbroi.

Iran, raźvivajučy svaju jadziernuju prahramu, adnačasova niaźmienna zapeŭnivaŭ, što jana maje mirny charaktar i što kraina nie maje namieru stvarać jadziernuju zbroju.

Novaje abiacańnie miru va Ukrainie

Zakranajučy temu vajny Rasii suprać Ukrainy, Donald Tramp znoŭ paabiacaŭ chutki mir, ale na hety raz nie nazvaŭ terminaŭ.

«My vielmi ciesna supracoŭničajem ź lidarami Rasii i Ukrainy, i my heta zrobim. Heta [mirnaje pahadnieńnie] adbudziecca, ja dumaju, raniej, čym mnohija dumajuć», — skazaŭ Tramp.

Prezident ZŠA taksama nahadaŭ pra padpisany im u piatnicu zakon ab «piakielnych sankcyjach».

«Na minułym tydni, u pamiać pra sienatara Lindsi Hrema, ja padpisaŭ mahutny novy zakon, pryniaty Kanhresam, jaki daje mnie vielizarnyja novyja paŭnamoctvy ŭ častcy taryfaŭ — i, kali spatrebicca, ja ich užyvu […] Para spynić bojniu», — skazaŭ Tramp.

Kuba — źmiena ŭłady

Zakranajučy temu Kuby, Tramp skazaŭ, što jaho administracyja damahajecca źviaržeńnia kamunistyčnaha režymu na vostravie.

«Maja administracyja damahajecca fundamientalnych źmienaŭ u situacyi na Kubie, kamunistyčny režym jakoj znachodzicca pad vialikim ciskam — samym vialikim ciskam, pad jakim jon kali-niebudź byŭ. Heta całkam pravalenaja dziaržava, jana pravalvajecca jak nikoli raniej, i jana ŭpadzie», — zajaviŭ prezident ZŠA.

«Kamunizm nikoli nie pryjdzie ŭ Amieryku, a voś na Kubu pryjdzie svaboda», — cytuje Trampa ahienctva Reuters.

Kubinskaja delehacyja padčas vystupleńnia Trampa vyjšła z zały.

• 0
• 0
• 0
• 0
• 0
• 0
• 0
• 0