Biełaruskaja mova «niedapuščalnaja» — internet-krama velcom nie dazvalaje rabić zamovy pa-biełarusku

Kryścina Vituška aformiła zajavu na novy telefon na minułym tydni.

Dziela zručnaści jana vyrašyła nabyć telefon praź internet-kramu. Kali pačała zapaŭniać formu dla zamovy, systema napisała: «Utrymlivajucca niedapuščalnyja symbali».

«Majo imia i proźvišča byli napisanyja biez pamyłak, — raskazała Vituška Svabodzie. — Aficyjnym pravapisam pieršaj dziaržaŭnaj movy. Ja zrabiła skrynšot zamovy. Praz profil u fejsbuku źviarnułasia da kampanii velcom z prośbaj vypravić takuju pamyłku».

Spačatku Kryścina Vituška paličyła heta techničnym nieparazumieńniem. Maŭlaŭ, sajt raspracavany pa-rasiejsku, biełaruskamoŭny interfejs znachodzicca ŭ stadyi raspracoŭki.

«Na vialiki žal, kampanija mnie adkazała, što internet-krama prymaje zamovy tolki pa-rasiejsku», — kaža Vituška.

Ale jaje zajaŭku nie pryniali navat u vyhladzie skrynšota, jaki jana dasłała.

«U mianie nie było namieru kanfliktavać z kampanijaj, u mianie było žadańnie nabyć smartfon. Pryčym nabyć nie ŭ rasterminoŭku, a spłacić uvieś košt adrazu».

I napaŭnialnik dla kata, i picu pryvozili — prablemaŭ z zamovami pa-biełarusku nikoli nie było

Dastaŭku telefona abiacali ciaham sutak. Hetaha nie adbyłosia. Paśla taho jak Kryścina Vituška źmiaściła na svajoj staroncy ŭ Fejsbuku druhi dopis sa skarhaj na pracu kampanii, ź joj źviazałasia biełaruskamoŭnaja supracoŭnica velcom i prapanavała zrabić zamovu praz telefon.

«U kampanii znajšli biełaruskamoŭnuju dziaŭčynu, jakoj daručyli mnie patelefanavać, ale jana nie vałodała matčastkaj, tak by mović: nia viedała, jaki telefon ja zamaŭlaju. Ja vymušana iznoŭ naviedać ichni sajt, uzhadvać madel, jakuju ja zamaŭlała. Čamu ja mušu prachodzić praz dadatkovyja ciažkaści, kali ŭsiaho tolki vyrašyła paradavać kampaniju svaimi hrašyma?»

Pa słovach Vituški, heta ŭzdymaje pytańnie abarony pravoŭ biełaruskamoŭnych spažyŭcoŭ.

«Heta parušeńnie majho prava jak spažyŭca. Ja nie patrabavała ad ich vieści sa mnoj kamunikacyju pa-biełarusku. Heta było b cudoŭna, ale ja razumieju, u jakim śviecie ja žyvu. Ale mianie aburaje, što stvarajucca pieraškody pry nabyćci tavaraŭ, što kampanija ŭ pryncypie nie hatovaja prymać maje zajaŭki. Ja prosta chacieła nabyć telefon».

Z takoj prablemaj Kryścina Vituška sutyknułasia ŭpieršyniu. Jana časta karystajecca internet-kramami, i choć jany rasiejskamoŭnyja ŭ svajoj bolšaści, zapoŭnić zajaŭku jana zaŭždy mahła.

«Napaŭnialnik dla kata ci picu mnie pryvoziać na zamovu pa-biełarusku. Tamu mianie vielmi ździviła, što tut adsutničaje takaja mahčymaść».

Što adkazaŭ velcom na prapanovu padtrymać źmieny ŭ Zakon «Ab abaronie pravoŭ spažyŭcoŭ»

Siońnia biełaruskija kampanija nia majuć abaviazku źmiaščać infarmacyju pra tavary pa-biełarusku. U Zakonie «Ab abaronie pravoŭ spažyŭcoŭ» napisana, što infarmacyja ab tavarach (rabotach, pasłuhach) davodzicca da viedama spažyŭca «na biełaruskaj abo rasiejskaj movie». Hetym i karystajecca bolšaść vytvorcaŭ, pakidajučy źviestki pra tavary tolki pa-rasiejsku.

Prymusić vytvorcaŭ źmiaščać infarmacyju pra tavary na dźviuch dziaržaŭnych movach mohuć papraŭki ŭ zakanadaŭstva. Ciaham dvuch apošnich hadoŭ svaje prapanovy na hety kont aktyŭna dasyłaŭ u parlament Ihar Słučak, inicyjatar kampanii «Spravavodztva pa-biełarusku».

Prapanovy padtrymać źmieny ŭ Zakon «Ab abaronie pravoŭ spažyŭcoŭ» Słučak dasyłaŭ u tym liku mabilnym aperataram.

U toj čas jak MTS jahonuju inicyjatyvu vitała, velcom nastojvaŭ na tym, kab užyvańnie biełaruskaj albo rasiejskaj movy było pravam, a nie abaviazkam jurydyčnych asobaŭ.

A prapanovy Słučaka mohuć, na dumku aperatara, pryvieści da pavieličeńnia dakumentaabarotu i nehatyŭna paŭpłyvać na ŭsprymańnie infarmacyi klijentami.

Pavialičyć

«Heta vielmi dziŭna, — kaža Słučak. — Tamu što velcom vykarystoŭvaje biełaruskuju movu ŭ reklamie i spansuje konkurs biełaruskamoŭnaj reklamy AD!NAK».

• 0
• 0
• 0
• 0
• 0
• 0
• 0
• 0