Hienierał Rašetnikaŭ zapisaŭ novy zvarot: «Biełarusy, adumajciesia!» VIDEA

Dyrektar Rasijskaha instytuta stratehičnych daśledavańniaŭ hienierał-lejtenant Leanid Rašetnikaŭ zapisaŭ novy zvarot da biełarusaŭ.

Jon nastojvaje, što biełaruskaja mova była stvorana 90 hadoŭ tamu.

«Biełaruś i Rasija — adzinaja terytoryja, bo ŭ nas «sajuznaja dziaržava», a nie «sajuznyja dziaržavy», — zajaviŭ jon. — My adziny narod, i raździalać nas — heta złačynstva. Adumajciesia, tavaryšy i spadarovie, nie pierahinajcie kija. Jak ŭžo pierahnuli va Ukrainie, — pahražaje Rašetnikaŭ. — Vy nie chočacie hanarycca Dastajeŭskim, Puškinym, vy nie chočacie hanarycca Tałstym, Miendzielejevym, hierojami 1812 hoda, Pieršaj suśvietnaj, hieorhijeŭskimi kavalerami? — pafasna pytajecca Rašetnikaŭ. — Vy nie chočacie hanarycca dasiahnieńniami našaj pramysłovaści? Čym vy chočacie hanarycca? Polskaj šlachtaj i litvinskimi kniaziami?

Jak heta moža vas karobić, kali ja kažu, što Biełaruś i Ukraina heta častka Vialikaj Rasii, tysiačahadovaj Rasii? — praciahvaje Rašetnikaŭ. — Jak ža možna adrakacca hetaha — supolnaj historyi, supolnych bied, supolnych hierojaŭ? Vy daloka zajšli ŭ svaim tumanie,

— kaža Rašetnikaŭ. — Kožny narmalny čałaviek u Rasii dumaje tak, jak ja. A tendencyja ŭ vas — na raździaleńnie, na adychod. Toje samaje zakładvałasia va Ukrainie, i vyliłasia ŭ nianaviść da rasiejcaŭ», — miarkuje Rašetnikaŭ. 

Rašetnikaŭ asudziŭ tuju krytyku, što prahučała ŭ Biełarusi na jahony papiaredni vystup.

Nahadajem, što šok u biełarusaŭ vyklikali voś hetyja zajavy Leanida Rašetnikava pra niemahčymaść isnavańnia niezaležnaj Biełarusi:

«U pieršaj zale [vystavy, pra jakuju idzie havorka] była vystaŭlena i ciapier tam znachodzicca hazieta «Praŭda» za 1926 hod. Na pieršaj staroncy pastanova arhbiuro CK VKP(b), i nazyvałasia hetaja pastanova «Pra stvareńnie biełaruskaj movy» [musić, majecca na ŭvazie pastanova CK KPB 1926 hoda ab praviadzieńni ŭ Miensku navukovaj kanfierencyi ab reformie biełaruskaha pravapisu — NN]. Razumiejecie? 1926 hoda. Hetaj movie, vychodzić, 90 hadoŭ. Voś hetaja bomba, jakaja była zakładziena tady, jana ciapier vybuchnuła, i praciahvajuć vybuchać maleńkija bombački, — skazaŭ Rašetnikaŭ. — Heta vielmi niepakoić usich nas, ja miarkuju, i naša kiraŭnictva taksama. Patrebnaja dyskusija, prynamsi, havaryć pra heta [treba] adkryta. Uvaha mnohich ciapier adciahnutaja Siryjaj ci Ukrainaj, prychodam da ŭłady Trampa, zabyvajuć pra Biełaruś. Nielha zabyvać — heta histaryčnaja častka vialikaj Rasiei, vializnaj Rasiei, heta častka našaha naroda. Tak ža i ź Biełaruśsiu, pra što jany dumajuć — kiraŭniki [Biełarusi], — praciahvaŭ Rašetnikaŭ. — Niezrazumieła, ci to pra ŭłasnaje stanovišča, ci to jašče pra niešta. Pra što jany dumajuć? Addalicca ad Maskvy i addacca kamuści inšamu — voś što atrymlivajecca, — skazaŭ Rašetnikaŭ i padsumavaŭ. — Jakaja «Biełaruś niezaležnaja ad Maskvy?»

Rasijski instytut stratehičnych daśledavańniaŭ (RISD, a pa-rasiejsku — RISI) zasnavany prezidentam Rasii. Jon zabiaśpiečvaje infarmacyjaj Administracyju prezidenta, Radu biaśpieki i inšyja struktury ŭłady Rasii.

Rašetnikaŭ — hienierał-lejtenant, pryjšoŭ u RISD sa Słužby zamiežnaj vyviedki.

U adkaza na zajavy Rašetnikava 22 śniežnia u Ministerstva zamiežnych spraŭ Biełarusi byŭ vyklikany daradca-pasłańnik Pasolstva Rasii ŭ Biełarusi Vadzim Husieŭ.

Rasijskamu dypłamatu byŭ zajaŭleny pratest u suviazi z vykazvańniami dyrektara Fiederalnaj dziaržaŭnaj navukovaj biudžetnaj ustanovy «Rasijski instytut stratehičnych daśledavańniaŭ» Rašetnikava Ł.P. na adras Respubliki Biełaruś.

«Biełaruskim bokam była dadziena pryncypovaja acenka ŭ dačynieńni da nieabhruntavanaści pa sutnaści i kateharyčnaj nieprymalnaści pa formie padobnych zajavaŭ. Padkreślena, što jany absalutna nie adpaviadajuć stratehičnamu charaktaru biełaruska-rasijskich adnosin, a taksama zafiksavanym u dvuch-i šmatbakovych dakumientach pryncypam, na jakich hruntujecca supracoŭnictva našych brackich dziaržaŭ, — pavahi suvierenitetu, niezaležnaści i terytaryjalnaj cełasnaści», — havorycca ŭ infarmacyi, raspaŭsiudžanaj pres-słužbaj MZS.

Čytajcie taksama: «Sovietskaja Biełoruśsija» dała adłup kiraŭniku Rasijskaha instytuta stratehičnych daśledavańniaŭ Rašetnikavu

Prafiesar Cychun: Biełaruskaja mova ŭtvaryłasia niedzie paśla VII st. našaj ery

• 0
• 0
• 0
• 0
• 0
• 0
• 0
• 0