Pakul nieviadoma, ci ŭpaŭ dron u Litvie, ci pakinuŭ terytoryju krainy

Kiraŭnik Nacyjanalnaha centra kiravańnia kryzisami Viłmantas Vitkaŭskas zajaviŭ, što pakul niezrazumieła, ci dron, jaki, mierkavana, zalacieŭ u Litvu i staŭ pryčynaj abviaščeńnia pavietranaj tryvohi, upaŭ na terytoryi krainy abo pakinuŭ jaje, paviedamlaje LRT.

Na pres-kanfierencyi ŭ sieradu dniom Viłmantas Vitkaŭskas paviedamiŭ, što pieršy sihnał pra mahčymaje praniknieńnie drona pastupiŭ z Łatvii.

«U Daŭhaŭpiłskim rehijonie Łatvii byŭ abvieščany «žoŭty» ŭzrovień pavietranaj niebiaśpieki», — skazaŭ Vitkaŭskas. Jon nahadaŭ, što taki ŭzrovień papiaredžańnia aznačaje, što ŭ pavietranuju prastoru krainy moh trapić vajenny abjekt, jaki moža ŭjaŭlać pahrozu dla žycharoŭ i infrastruktury.

Paśla hetaha byli atrymany paviedamleńni ad armii, jakaja z dapamohaj radaraŭ zafiksavała abjekt, što nabližaŭsia da miažy Litvy. Radarnyja sistemy adsočvali jaho ŭ rajonie Ihnalinskaha rajona.

«Faktyčna ŭ 9:40 było zafiksavana pierasiačeńnie miažy, i my sumiesna z Departamientam supraćpažarnaj achovy i vyratavańnia razasłali paviedamleńni nasielnictvu, pieradusim žycharam Ihnalinskaha rajona, papiaredziŭšy ich pra mahčymuju pavietranuju niebiaśpieku. Zatym zona papiaredžańnia była pašyrana, pakolki mierkavałasia, što dron lacić u bok Vilniusa, i trajektoryja była takoj, što treba było papiaredzić i inšyja rajony. Žychary Vilniusa atrymali papiaredžańnie kala 10 hadzin», — skazaŭ Vitkaŭskas.

Pavodle jaho słoŭ, u 11:09 abjekt źnik z radaraŭ. Adnak pakul centr nie moža adkazać, ci dron upaŭ, ci pakinuŭ terytoryju Litvy i pieralacieŭ u inšuju krainu.

«Na hety momant my nie možam adkazać. Čakajem danych ad armii. Takaja situacyja. Žychary byli papiaredžany, surjoznaha chvalavańnia abo paniki my nie zafiksavali.

Kaniečnie, byli asobnyja vypadki, kali ŭ škołach abo inšych ustanovach nie było vyraznych instrukcyj, što rabić z vučniami abo supracoŭnikami. Ale my acenim hetuju situacyju i prykładziom usie namahańni, kab u budučyni takoj niavyznačanaści było jak maha mienš», — skazaŭ Vitkaŭskas.

Adkazvajučy na pytańnie, čamu nie byli ŭklučany sireny, Vitkaŭskas patłumačyŭ, što ich aktyvacyja patrabuje času. Pavodle jaho słoŭ, paśla adpraŭki paviedamleńniaŭ na mabilnyja telefony žycharoŭ paźniejšaje ŭklučeńnie siren mahło b vyklikać jašče bolšuju błytaninu.

«Kali sireny ŭžo byli hatovyja da ŭklučeńnia, my atrymali danyja, što dron, mahčyma, užo pakinuŭ hety rajon. Kab nie vyklikać dadatkovuju paniku, było pryniata rašeńnie sireny nie ŭklučać, pakolki praź niekalki chvilin adbyłasia admiena pavietranaj tryvohi.

Heta pytańnie času, tamu što ŭ siren niama miechanizmu admieny. Jość sireny, jakija mohuć hołasam pieradavać peŭnuju infarmacyju, ale sistema infarmavańnia žycharoŭ u takich vypadkach značna zručniejšaja», — adznačyŭ Vitkaŭskas.

• 0
• 0
• 0
• 0
• 0
• 0
• 0
• 0