Pčalar Uładzimir Sierada śćviardžaje, što najsmačniejšy miod — svoj. I što naŭrad ci znojdziecca pčalar, jaki z hetym nie pahodzicca. Sam jon ciaham tydnia moža źjeści ceły słoik miodu — nie nadakučvaje i nie pryjadajecca, bo svajo.
Uładzimir — dyrektar internet-kramy, dzie pradajecca miod i ŭsio, što tolki moža spatrebicca pčalaru. Tamu jon viedaje, pra što havoryć i ŭpeŭnivaje, što pasprabavać siabie ŭ roli pčalara nasamreč varta.
Uładzimir davodzić, što nie isnuje standartnaj schiemy, pa jakoj treba zajmacca pčołami. Šlachoŭ šmat, i kožny abiraje toj, jaki jamu bližej.
«Jość pčalary, jakija hadami adstojvajuć svaju pazicyju i svaracca praz heta, — kaža Uładzimir. — Siońnia samomu zdabyvać miod — nie prablema. Pastaviŭ na leciščy dva-try vulei ź niezłaślivymi pčołami — i zajmajsia ŭ svajo zadavalnieńnie. U mianie navat u maci staić vulej, a svajoj dačce ja pakazvaju pčoł bieź śpiecyjalnaj vopratki. Kaniečnie, kali pracuješ z pčołami — patrebna ekipiroŭka. Ale kali jany sami pa sabie lotajuć, to ŭ ich nijakaj cikavaści da ludziej niama».
Uładzimir pryhadvaje, daŭno, jašče kali jon tolki pačynaŭ zajmacca pčołami, adpakutavaŭ paru dzion ad ukusaŭ i zabyŭ, što heta takoje. Tut nie ŭhadaješ, jakaja budzie reakcyja arhanizma. Adzin «puchnie», a inšy pieranosić ukusy vielmi lohka. Ale ciapier jość admysłovyja kaściumy, jakija abaraniajuć pčalaroŭ i dazvalajuć kožnamu bracca i zajmacca spravaj biez bojazi być skusanym.
«Z časam pčalary ŭvohule praktyčna pierastajuć pakutavać ad ukusaŭ, bo pravilna apranajucca i pravilna siabie pavodziać. Pčoły reahujuć na ruchi, na štości ciomnaje, buchmataje. Pa hetaj pryčynie jany i na vałasy napadajuć — abaraniajuć svaju siamju, svoj vulej», — kaža pčalar.
Uładzimir adznačaje, što ciapier ŭ Biełarusi pčalarstva znachodzicca ŭ zamarožanym stanie.
«Kaliści ŭ razhar sprečki ja chacieŭ skazać, što naša pčalarstva na ŭzroŭni Siaredniaviečča. Ale heta niapraŭda. VKŁ było adnym z najbujniejšych pastaŭščykoŭ miodu i vosku ŭ Jeŭropie. Ciapier ža my i blizka nie majem takich maštabaŭ», — tłumačyć jon.
Choć, na dumku Uładzimira, zajmacca pčalarstvam nie tak i składana, jak padajecca. Dy i nie tak doraha.
«Nie daremna kažuć, što na pčalarach zarablajuć bolš, čym sami pčalary. U hetym jość dola praŭdy, bo invientar davoli darahi. Ale ŭ mianie jość siabar-rybałoŭ, jaki tracić na svoj zaniatak u razy bolš, pryčym vychad u jaho ŭ lepšym vypadku nulavy. Adnak heta ž zadavalnieńnie! Z pčalarstvam toje samaje, — dadaje Uładzimir. — Siońnia nie treba rvać śpinu i prykładać niejmaviernyja namahańni, kab mieć svoj miod. Da prykładu, u Biełarusi ŭžo robiać lohkija, zručnyja, kampaktnyja vulei pa technałohii bujnoj viadomaj polskaj kampanii Lyson. Zajmajecca hetym fiermierskaja haspadarka «Pčalar Połaččyny». Hetyja vulei — sučasnaja alternatyva starym nie mabilnym draŭlanym vullam».
Try kroki dla taho, kab stać pčalarom
Pieršaje i samaje hałoŭnaje — vyvučyć pryrodu pčoł. Jutub vam u dapamohu. Dy i litaratury pa temie proćma.
Druhoje — pravieryć, ci jość alerhija na pčalinyja ŭkusy.
Treciaje — prydbać minimalny invientar i niepasredna samich pčoł.
Nu i, naturalna, znajści dla ŭsiaho hetaha dabra miesca. Pažadana, z kłopatam pra spakoj susiedziaŭ.
Razam z Uładzimiram my prajšlisia pa asartymiencie kramy miodtut.bieł i prykinuli, kolki treba mieć hrošaj na starcie i na što jany spatrebiacca.
| Invientar | Kolkaść | Košt | Ahułam |
| Vulej z korpusam «Dadant» + 2 kramy | 1 | 150 rubloŭ | 150 rubloŭ |
| Kaścium pčalara z dvunitki z pałoskaj | 1 | 25 rubloŭ | 25 rubloŭ |
| Maska pčalara «Pasieka» | 1 | 5.10 rubla | 5.10 rubla |
| Nož pčalarski «Jeŭropa» (280 mm, adnabakovaje nižniaje zavostryvańnie) | 1 | 5.70 rubla | 5.70 rubla |
| Palčatki | 1 | 24 rubli | 24 rubli |
| Drot dla ramak (0,4 mm, 250 hramaŭ, čorny) | 1 | 3.20 rubla | 3.20 rubla |
| Videlec dla sot «OR-1» (pramaja ihołka, vyhnutaja płastykavaja ručka) | 1 | 4.50 rubla | 4.50 rubla |
| Dymar dla pčoł | 1 | 24.90 rubla | 24.90 rubla |
| Vaščyna, kh | 2 | 18 rubloŭ | 36 rubloŭ |
| Ramki «hniezdavyja» | 10 | 0,90 rubla | 9 rubloŭ |
| Ramki «kramnyja» | 20 | 0,80 rubla | 16 rubloŭ |
| Stamieska | 1 | 7 rubloŭ | 7 rubloŭ |
| Ahulnaja suma | 285,50 rubla | ||
| Pčoły | |||
| Pakiet pčoł (čatyrochramačny) | 1 | 100-150 rubloŭ | 100-150 rubloŭ |
Uładzimir dadaje, što kali vy tolki pačynajecie zajmacca pčalarstvam, nie abaviazkova tracić hrošy adrazu na ŭsio. Možna źbirać nabor pastupova, jak kanstruktar. Pčalarstva — heta biaskoncaja praktyka i biaskoncy dośvied, tamu varta zapaścisia ciarpieńniem i atrymlivać asałodu ad samoha pracesu i svajho miodu.
Ilustracyi ź internet-krynic.
UNP 691589626
Ciapier čytajuć
Biełaruska raspačała čelendž «40 spatkańniaŭ», ale ŭžo na siaredzinie nie chavaje rasčaravańnia ŭ mužčynach52
Kamientary