Čorny śpis minimizavany. Łukašenku vyrašyli puścić u Eŭropu. Piša ŭ svaim błohu Alaksandar Kłaskoŭski.
Eŭraźviaz prypyniŭ na paŭhodu vizavyja sankcyi ŭ dačynieńni da Łukašenki i šerahu vysokich čynoŭnikaŭ, paviedamili 13 kastryčnika infarmacyjnyja ahienctvy. U čornym śpisie zastalisia tolki čaćviora fihurantaŭ memarandumu Purhurydesa dy kiraŭnica Centarvybarkamu.
Hety krok Eŭropy, zrobleny na pasiedžańni ministraŭ zamiežnych spraŭ EZ u Luksemburhu, vykliča tryjumf u tutejšaj kiroŭnaj viarchoŭcy. Prahmatyčny čyńnik, da jakoha tak doŭha apelavali biełaruskija ŭłady, uziaŭ vierch ŭ Bruseli.
Hety krok sparodzić rezkuju krytyku z boku biełaruskaj palityčnaj apazycyi, va ŭsiakim razie značnaj jaje častki. Kali vynieści za dužki vyzvaleńnie viaźniaŭ, to Łukašenka nie sastupiŭ zachodnikam ni kaliva — i damohsia svajho.
Hety krok moža dadać pesymizmu našaj hramadzianskaj supolnaści. Bo nadta mnohija pierakananyja: z boku Miensku ŭ dačynieńniach z Bruselem ŭsio abmiažujecca «kidałavam».
Zrešty, šerah niezaležnych ekspertaŭ ličać, što Eŭropa abrała realistyčny šlach. Kali nie pracujuć scenary kalarovych revalucyj, mo' spracuje metad cichaje sapy?
Hałoŭnaje pytańnie: ci sapraŭdy budzie niejki plon ad novaha padychodu zachodnikaŭ? Ci daść efekt taja «darožnaja karta»?
Pra jaje šmat kažuć, ale nichto pakul što nia bačyŭ u vočy chacia b hrubaj prykidki. Chacia sam pryncyp zrazumieły: robicie takuju voś sastupku — atrymlivajecie voś taki bonus. Eŭraparlamentary, naprykład, prapanujuć, kab ciaham vyprabavalnaha paŭhadavoha terminu biełaruskija ŭłady pierahledzieli niadaŭna pryniaty zakon ab ŚMI. Ci razhoniacca? Pakul što čynoŭniki prahavorvajucca pra advarotnaje: ciškom rychtujecca pastanova pra rehlamentacyju internetu.
Vybary "sterylnaha" parlamentu zaśviedčyli, što tutejšaje kiraŭnictva nie hatovaje sastupić ni kropli realnaj ŭłady. Tamu spadzievy na palityčnuju liberalizacyju, raźniavoleńnie medyjaŭ całkam naiŭnyja.
Ahienctvy cytujuć eŭrakamisarku Ferera-Valdner, jakaja paśla sustrečy ź ministram Martynavym patetyčna abvieściła: «Biełaruski narod staić pierad histaryčnym vybaram: ruchacca ŭ kirunku demakratyi i niezaležnaści albo ŭ kirunku palityčnaj stahnacyi». Kładučy ruku na serca, narod u nas ničoha nie vybiraje. Nu a načalstva palityčnaj stahnacyjaj nie napałochaješ. Dla kaho stahnacyja, a dla kaho stabilnaść.
Kaniečnie, my nia viedajem źmiestu kuluarnych razmoŭ Siarhieja Martynava ŭ Luksemburhu. Zrešty, kali navat jon niešta paabiacaje, dyk dzie harantyi, što biełaruskaja kiroŭnaja viarchoŭka razhonicca tyja abiacańni vykonvać?
U tutejšaha načalstva — ahromnisty dośvied viešańnia łokšyny na vušy Maskvie pad markaj «bratniaj intehracyi». Ciapier moža raspačacca takaja ž humavaja «eŭraintehracyja».
Hetakija notki ŭžo hučali ŭ niadaŭnim interviju Łukašenki eŭrapiejskim hazetam. Maŭlaŭ, dajcie termin, nie hanicie ŭ šyju, mo' i my niekali prydziem na 80% da vašych standartaŭ. A 20%, musić, varta śpisać na "asablivaści nacyjanalnych tradycyj". Vuń i ŭ vas karalevu nichto nie čapaje, namiakaŭ aficyjny kiraŭnik hazetčyku z Brytanii.
Karaciej, pakul vyhladaje na toje, što Eŭropa doŭžyć eksperyment ź mizernymi šancami na pośpiech. Ale chto prapanuje cudadziejnuju stratehiju?
Na fonie taho, što Eŭraźviaz nazyvaŭ minułyja vybary testam i źviazvaŭ perspektyvy razmarožvańnia stasunkaŭ mienavita ź ich vynikami, šyroki žest u vyhladzie skasavańnia vizavaha tabu vyhladaje alahizmam, ličyć palitolah Valer Karbalevič. Ź jaho słoŭ, adzinaje tłumačeńnie — hieapalityčny intares EZ.
Na dumku palitolaha Andreja Fiodarava, Eŭropa zaraz musić vybirać pamiž drennym i vielmi drennym. Jon ličyć, što ŭ hieapalityčnym zmahańni z Maskvoj za ŭpłyŭ na Biełaruś Zachadu varta było b pajści i na ekanamičnuju padtrymku.
Nu a kali Łukašenka, atrymaŭšy žadanaje ad Eŭraźviazu, praź niejki čas, naprykład, pahodzicca pryznać Paŭdzionnuju Asetyju dy Abchaziju? Što tady rabić bruselskim strateham? Znoŭ budavać słoŭnyja kanstrukcyi z abarotam «niahledziačy na…»? I kolki takich «niahledziačy na…» spatrebicca Bruselu, kab zrazumieć, što Miensk jaho banalna «razvodzić»?
Tak ci inačaj, Eŭropa vyrašyła zrabić efektny chod kaniom.
Brusel sprabuje zhulać u hieapalityčnyja šachmaty. Ale ž viadoma, što karonny chod biełaruskaj ułady — doškaj pa hałavie.
Kamientary