U Minsku mužčynu źbili za majku z nadpisam «DNR»? Mutnaja historyja — i fotaŭ niama

Prarasijski dziejač Jaŭhien Kanstancinaŭ na svajoj staroncy ŭ fejsbuku apavioŭ historyju, jak 21 červienia la staličnaha handlovaha centra «Moma» (stancyja mietro «Mahiloŭskaja») nibyta byŭ źbity 42-hadovy Siarhiej Łanavienka.

Pavialičyć

«Na jaho napała hrupa biełaruskich nacyjanalistaŭ i vielmi mocna źbiła. Jon byŭ apranuty ŭ majku «DNR». Strasieńnie, złamanaja vačnica, złamany nos, askiepak ledź nie trapiŭ u mozh, mahčyma, treba budzie apieracyja. Pieršapačatkova SK admoviŭsia zavodzić kryminalnuju spravu, ale ŭčora čamuści vyrašyŭ pierahledzieć svajo rašeńnie», — napisaŭ Kanstancinaŭ.

U jaho adrazu stali pytacca: čamu ž nie była zaviedziena sprava? «Siarhiej čuŭ, jak jany [śledčyja — Red.] razmaŭlali pamiž saboj, što bajacca źviazvacca z nacyjanalistami», — patłumačyŭ Kanstancinaŭ.

«Biełaruskija nacyjanalisty pierajšli da adkrytaha teroru», — tak adreahavała na post Kanstancinava infarmacyjnaha ahienctva «Rehnum». Napisali pra vypadak i inšyja rasijskija vydańni.

Łanavienka śćviardžaŭ, što ŭ mašynie tych, chto napadaŭ na jaho, byli bieł-čyrvona-bieły i ŭkrainski ściahi, a taksama simvolika «Pravaha siektara» — taki sabie nabor džentelmiena.

Mnohija ŭ sacyjalnych sietkach pačali paraŭnoŭvać hetuju historyju z «raśpiatym chłopčykam», jakuju aktyŭna tyražavali ŭ rasijskich ŚMI, a potym jana vyjaviłasia fejkam.

Siarhiej Łanavienka pahadziŭsia raskazać «NN» pra hetuju historyju. Praŭda, jon adrazu adznačyŭ, što vielmi sumniavaŭsia, ci varta puskać jaje ŭ publičnuju prastoru.

«Mnie škada chłopcaŭ, što jany mohuć paciarpieć. Surjoznaha suprać ich, kaniečnie, nie budzie ničoha, ale ž pacierpiać. Ja nie budu da ich mieć nijakich pretenzij, kali jany zrazumiejuć, što nie mieli racyi», — kaža jon.

«Ja pryjechaŭ na stancyju mietro «Mahiloŭskaja» na pracu 21 červienia. Ja byŭ u majcy «DNR». La handlovaha centra «Moma» pabačyŭ VIA «Oksva» [muzykanty z savieckaj simvolikaj, jakija vystupajuć u roznych punktach Minska — Red.], sfotkaŭsia ź imi, parazmaŭlaŭ, potym adyšoŭ na stajanku pakuryć. Tut jedzie mašyna, čyrvony «Nisan». Mnie adtul pakazvajuć «fak», ja adkazaŭ tym ža. Z mašyny pačułasia: «Chadzi siudy». Nu, ja i padyšoŭ.

Pytajusia žartam: «Vy što, banderaŭcy?» Jany kažuć, što, maŭlaŭ, tak. Słova za słova — pačałasia bojka. Atrymlivaju ŭdar ad adnaho ŭ levuju skułu. U mianie ŭdar pastaŭleny, bić nielha. Prymianiaju pryjom, kidaju adnaho na ziamlu. Tady nie ŭtrymaŭ druhoha, ad jakoha atrymaŭ nahoj u tvar. Padyšoŭ jašče treci, jaki im taksama dapamoh. Paśla hetaha pajechaŭ, užo paśla kalehi zavieźli mianie na miedycynski ahlad», — raskazvaje Siarhiej Łanavienka.

26 červienia jamu pazvanili z Zavodskaha RUUS Minska, vyśviatlali padrabiaznaści kanfliktu.

Čamu mužčyna apranuŭ takuju majku? «Maja pazicyja — padtrymlivać ludziej, jakija chočuć miru ŭ «DNR», — davodzić jon.

Łanavienka kaža, što časta chodzić pa Minsku ŭ takoj majcy, raniej prablem nie ŭźnikała. Na pracy kalehi taksama nibyta reahujuć narmalna. Łanavienka zajmajecca ramontam aŭtamabilaŭ.

U sacyjalnych sietkach šmat zdymkaŭ, dzie Łanavienka fotkajecca z rasijskim ściaham. «Ja liču na siońnia heta simvałam spraviadlivaści ŭ śviecie», — adkazvaje mužčyna. Ni da jakich partyj ci arhanizacyj jon siabie nie adnosić. Choć letaś Łanavienka ŭdzielničaŭ u akcyi na płoščy Niezaležnaści ŭ padtrymku sajuza Biełarusi i Rasii.

Aficyjny pradstaŭnik Śledčaha kamiteta pa Minsku Maryna Drańkova paviedamiła «NN», što kryminalnaj spravy pa fakcie źbićcia Siarhieja Łanavienki niama.

Varta adznačyć, što fotaŭ źbitaha Łanavienki nie publikavaŭ ni jon sam, ni Kanstancinaŭ.

• 0
• 0
• 2
• 0
• 0
• 0
• 0
• 0