Śpiecnaz uvarvaŭsia na viečarynu śvinhieraŭ pad Minskam VIDEA

Milicyja paviedamlaje, što nakryli padpolny bardel.

U noč na 28 lipienia ŭ pasiołku Baraŭlany Minskaha rajona supracoŭniki Hałoŭnaha ŭpraŭleńnia pa narkakantroli i supraćdziejańni handlu ludźmi MUS uvarvalisia ŭ adzin z katedžaŭ. Apieracyja prachodziła pry padtrymcy śpiecatrada chutkaha reahavańnia MUS.

Pavialičyć

«U chodzie apieratyŭna-vyšukovych mierapryjemstvaŭ my vyznačyli, što z 2016 da 2018 hoda dvoje biespracoŭnych minčukoŭ zdymali katedž dla praviadzieńnia za ŭznaharodžańnie zakrytych seks-viečarynak. Klijentaŭ šukali siarod znajomych, praz abjavy ŭ internecie, sacsietkach i mesendžarach. Košt uvachodu dla mužčyn składaŭ ad 200 da 370 rubloŭ, dla pary — 120 rubloŭ. Pradstaŭnicy słabaha połu ŭdzielničali ŭ mierapryjemstvie biaspłatna. U nastupnym pastajannym členam kłuba nadavalisia źnižki. Naviedvalniki pieravodzili hrošy na kartku, mabilny telefon abo pieradavali asabista arhanizataram», — paviedamlaje milicyja.

Akramia vypadkovych udzielnikaŭ, na viečarynkach prysutničali prastytutki, viadučyja tematyčnych konkursaŭ, barmeny i inšyja pradstaŭniki absłuhovaha piersanału, pasłuhi jakich uvachodzili ŭ košt naviedvańnia. Taksama ŭ apłatu ŭklučaŭsia ałkahol, ježa, karystańnie saŭnaj i basiejnam.

Na momant śpiecapieracyi ŭ katedžy znachodzilisia 34 mužčyny i 18 dziaŭčat, siarod jakich byli šlubnyja pary i studenty. Uzrost udzielnikaŭ varjiravaŭsia ad 20 da 45 hadoŭ.

Na arhanizataraŭ zaviali kryminalnuju spravu za arhanizacyju i (abo) vykarystańnie zaniaćcia prastytucyjaj abo stvareńnie ŭmoŭ dla zaniatku prastytucyjaj. Im pahražaje da 5 hadoŭ.

Naviny.by paviedamlali, što adbyvałasia ŭsio pa adrasie Biarozavy Haj, 38.

Pavialičyć

Pavialičyć

Dom arandavali ŭ minčuka. «Naša Niva» źviazałasia z haspadarom katedža, kab daviedacca, što adbyvałasia ŭ Baraŭlanach. Ale jon ad kamientaroŭ admoviŭsia.

Viadoma, što viečaryna była nie pieršaj. Arhanizatary stała zajmalisia takimi tusoŭkami.

Uvachod kaštavaŭ 100—120 rubloŭ. Unutry naviednikaŭ čakali biaspłatny bar, kaljany, biljard, basiejn, łaźnia i saŭna.

Zvyčajna ŭvachod na takija mierapryjemstvy kaštuje bolš. Ale narodu źbirajecca niašmat.

Uvosień na padobnuju śvinh-tusoŭku pryjšło 27 čałaviek. Para musiła płacić 50 dalaraŭ, hości biez rekamiendacyj płacili 150 dalaraŭ za pieršuju viečarynku i pa 100 dalaraŭ za kožnuju nastupnuju ciaham hoda.

Viečaryny prachodzili rehularna. Časam — tematyčnyja.

Arhanizoŭvaŭ usio minčuk, viadomy jak Słava (ci Słava Kazanova). Udzielničała ŭ tusoŭkach i jaho žonka Alena. Słavu kala 40 hadoŭ. Dakładny rod jaho zaniatkaŭ nieviadomy.

U siecivie možna znajści intervju z tym Słavam. Jon raskazvaje, što pravodzić śvinh-viečaryny kala 4 hadoŭ. Ahułam pravioŭ bolš za sotniu padobnych mierapryjemstvaŭ. Spačatku ŭsio adbyvałasia na kvatery, paśla achvotnych stała bolš, pačali zdymać katedžy.

Na viečarynkach jość ałkahol. Ale za naviednikami pryhladvaje achova.

Leśbi-pary vitajucca, hiejaŭ nie puskajuć. «Našy mužčyny tolki na słovach talerantnyja, a na spravie ŭsio značna horš. Navošta pravakavać?» — tłumačyć Słava.

Pa jaho słovach, siaredniestatystyčny naviedvalnik — heta słavianin. Byli hości ź Jeŭropy, z Kaŭkaza paru razoŭ, z Turcyi.

Videazdymka na viečarynach zabaronienaja, usie telefony addajuć achovie. Ale kazusy byvajuć: pa słovach Słavy, adnojčy dačka sustreła na viečarynie svaich baćkoŭ.

Darečy, možna mierkavać, što ŭ dalejšym biełaruskim śvinhieram pryjdziecca niaprosta.

«Jość infarmacyja, što roznyja śvinh-viečarynki z elemientami BDSM, tematyčnymi raspusnymi konkursami, udziełam pradstaŭnikoŭ nietradycyjnych seksualnych pohladaŭ, u tym liku prychilnikaŭ ŁHBT-supolnaści, mahli arhanizoŭvacca ŭ mnohich rehijonach krainy. Hetyja źviestki praviarajucca. Adnak užo vidavočna, što pad vyhladam seks-viečarynak chavajecca niezakonnaja dziejnaść pa arhanizacyi i vykarystańni prastytucyi, pa jaje raspaŭsiudzie, a taksama prasoŭvańniu pierakručanych pohladaŭ na adnosiny «mužčyna-žančyna». Kab nie dapuścić hetaha, my praciahniem pracavać u hetym napramku i budziem spyniać fakty supraćpraŭnaj dziejnaści», — paviedamiŭ Dźmitryj Cajun, namieśnik načalnika Hałoŭnaha ŭpraŭleńnia pa narkakantroli i supraćdziejańni handlu ludźmi.

• 0
• 0
• 0
• 0
• 0
• 0
• 0
• 0