Łukašenka vykazaŭsia pra akumulatarny zavod u Breście: Ja na baku ludziej

Alaksandr Łukašenka siońnia ŭ čas naviedvańnia Bresta vykazaŭ svaju pazicyju nakont budaŭnictva ŭ horadzie akumulatarnaha zavoda, pieradaje BiełTA.

«Dumaju, nie budu vielmi aryhinalny ŭ svaim mierkavańni: ja, viadoma, na baku ludziej. Tut źjavilisia ŭžo i aryštavanyja, i zatrymanyja, i kryminalnyja spravy, i inšaje. Na žal, jany źjavilisia tady, kali ŭsia infarmacyja stała zdabytkam prezidenta», — źviarnuŭ uvahu Alaksandr Łukašenka.

Kiraŭnik dziaržavy raskazaŭ, što jak tolki da jaho pastupiła infarmacyja ab prablemach, źviazanych z budaŭnictvam akumulatarnaha zavoda, hetuju infarmacyju stali staranna pierapraviarać. Nie razabraŭšysia ŭ situacyi, machać miačom prosta nieprymalna, padkreśliŭ jon.

«Kali ja pierapravieryŭ infarmacyju, ja ŭbačyŭ, što tut ludzi, jakija pieražyvajuć za ekałohiju, svajo žyćcio, žyćcio dziaciej, u asnoŭnym majuć racyju. I ja ŭbačyŭ pravaparušeńni — z boku i asobnych dziaržaŭnych słužačych, i asobnych działkoŭ, jakija paabiacali pabudavać u ahulnym patrebny nam abjekt», — raspavioŭ Alaksandr Łukašenka.

Alaksandr Łukašenka zaŭvažyŭ, što ŭ Biełarusi nie było akumulatarnaha zavoda, i prajekt u Breście byŭ dobrym. Jaho treba było realizoŭvać, adnak u adpaviednaści z usimi patrabavańniami, padkreśliŭ kiraŭnik dziaržavy.

«Ale heta taho nie varta, kab hnabić ludziej i hadzić ekałohiju.

My pačali vyčyščać, vymyvać krainu, i na tabie — łyžka dziohciu. Tamu ja bačyŭ tam kryminalnyja spravy i žorstka daručyŭ adpaviednym słužbovym asobam zaniacca hetym pytańniem. Kali zrazumieli, što prezident trymaje na kantroli, rukami raźviali i adpravili ŭ miescy nie hetak addalenyja niekalki čałaviek. Astatnija ŭ biahach — šukajem. Dakładniej, my viedajem, dzie jany — pryviaziem dadomu, heta nie pytańnie. I spytajem na ŭsiu katušku», — skazaŭ Łukašenka.

Jon dadaŭ, što kali akumulatarny zavod u Breście buduć uvodzić u stroj, to jon pavinien adpaviadać usim ekałahičnym standartam. Pavodle jaho słoŭ, taksama nieabchodna dać prava miascovamu nasielnictvu pravieści svaju ekśpiertyzu. «Tolki jany buduć vyrašać, ci być hetamu zavodu i jakim budzie hety zavod», - zapeŭniŭ kiraŭnik dziaržavy.

U toj ža čas Łukašenka nahadaŭ, što na chvali čarnobylskaj katastrofy ŭ Biełarusi aktyvizavalisia vielmi nacyjanalistyčnyja ruchi.

«I dzie jany zaraz? Hetaha nacyjanalizmu chapała ŭsiudy, heta pryviało da razvału Savieckaha Sajuza i šmat-šmat bied pryniesła narodam, asabliva biełarusam. Tak i tut — jość prablema, i niechta choča palityčna pahreć ruki: užo ŭładu mianiać buduć, bo zavod drenny. Ja chaču, kab mudryja, adukavanyja, razumnyja bieraściejcy razumieli, što jany vykarystoŭvajuć lubuju nahodu dla taho, kab prarvacca va ŭładu. Jašče b paraiŭ im, chto vykarystoŭvaje hety vypadak, što jany buduć rabić u hetaj uładzie. Ciapierašniaja ŭłada raźbiarecca, nie z takimi prablemami raźbiralisia. My vyrašym tak, jak treba bieraściejcam», - reziumavaŭ biełaruski kiraŭnik.

Pačynajučy z 4 sakavika 2018 hoda kožnuju niadzielu praciŭniki zavoda vychodziać na płošču Lenina pakarmić hałuboŭ i tym samym vykazać svoj maŭklivy pratest suprać zavoda. Za hety mnohich ź ich nie raz zatrymlivali i štrafavali.

14 červienia 2019 hoda staršynia Bresckaha abłvykankama Anatol Lis prypyniŭ budaŭnictva akumulatarnaha zavoda da likvidacyi vyjaŭlenych parušeńniaŭ, a ŭ pačatku lipienia kiraŭnik kampanii «Aj Paŭer» Viktar Lemiašeŭski razam z šeraham padnačalenych byli zatrymanyja.

• 0
• 0
• 0
• 0
• 0
• 0
• 0
• 0