Miedyki stvaryli leki ad Eboły. Vynachodka budzie mieć revalucyjnyja nastupstvy, paraŭnalnyja z adkryćciom pienicylinu

Novyja leki vyrablenyja na asnovie antyciełaŭ, atrymanych ad čałavieka, jaki pieranios Ebołu. Cypryjan Mubijała z Konha straciŭ 15 svaich svajakoŭ i vyžyŭ adziny sa svajoj siamji. Adkryćcio maje značeńnie nie tolki dla Eboły. Leki na asnovie antyciełaŭ pačnuć vykarystoŭvacca i dla lekavańnia inšych chvarob.

Vyprabavańni novych lekaŭ skončylisia ŭ žniŭni. Nieŭzabavie poŭnyja kančatkovyja vyniki buduć apublikavanyja ŭ adnym navukovym miedycynskim časopisie.

Heta praryŭ u miedycynie, paraŭnalny z adkryćciom pienicylinu, piša «Uoł-stryt džornał».

Źviartaje ŭvahu taksama toj fakt, što adkryćcio ździejśnili daktary z Afryki, z Konha — adnoj z najbiadniejšych krain śvietu.

Efiektyŭnaść novych srodkaŭ była paćvierdžanaja standartnymi kliničnymi daśledavańniami, praviedzienymi mižnarodnaj hrupaj lekaraŭ i navukoŭcaŭ.

Kanhalezski (tak hučyć pravilny prymietnik ad słova «Konha») virusołah Žan-Žak Mujembe Tamfum (Jean-Jacques Muyembe Tamfum) pryśviaciŭ svajo žyćcio ratavańniu ludziej ad chvaroby, što ŭpieršyniu była zafiksavanaja ŭ 1976 hodzie ŭ addalenaj vioscy kala rečki Eboła. Doktar Mujembe byŭ siarod pieršych śpiecyjalistaŭ, jakija identyfikavali virus Eboły. Tady jon pracavaŭ u katalickim špitali, jaki ratavaŭ pieršych chvorych na strašnuju chvarobu. Ciapier jon uznačalvaje Nacyjanalny instytut bijamiedyčnych daśledavańniaŭ Demakratyčnaj Respubliki Konha.

Doktar Mujembe daŭno pryjšoŭ da vysnovy, što antycieły — białki, jakija imunnaja sistema pradukuje dla baraćby ź infiekcyjaj — mohuć dapamahčy pacyjentam, chvorym na Ebołu. Ale inšyja navukoŭcy ŭ takoj teoryi sumniavalisia.

I voś, daśledavańnie, praviedzienaje padčas apošniaj uspyški Eboły, pakazała, što vyžyvalnaść pacyjentaŭ, jakim davali vyklučna dadzieny srodak na asnovie antycieł adnaho z pacyjentaŭ doktara Mujembe, skłała 65 %. Tady jak vyžyvalnaść tych, jakija nie prymali nijakaha srodku, składała ŭsiaho 10%. Novy srodak pakul maje nazvu mAb114.

Vyžyvalnaść pacyjentaŭ, jakim davali srodak REGN-EB3 na asnovie troch antycieł, raspracavany amierykanskaj kampanijaj Regeneron Pharmaceuticals Inc., skłała 66 %.

Ahułam apošniaja ŭspyška chvaroby pryviała da 3250 vypadkaŭ chvaroby. 67 % chvorych pamierła. Epidemiju ŭdałosia spynić šlacham vakcynacyi, jakuju prajšli 240 000 žycharoŭ paŭnočnaha ŭschodu Konha.

Cikavaja historyja čałavieka, antycieły jakoha byli vykarystanyja dla stvareńnia pieršaha srodku. 15 blizkich Cypryjana Mubijały pamierli ad vybuchu Eboły ŭ 1995 hodzie.

Pavialičyć

Usie jany zarazilisia ad Cypryjanavaha brata, jaki pracavaŭ u miascovaj balnicy i zaraziŭsia Ebołaj ad chvorych, jakich tam ratavali. Kali jon zachvareŭ, svajaki jaho dahladali, sprabavali ablehčyć jaho stan i sami padčapili virus. Paśla jany pamierli adzin za adnym. Vyžyli tolki Cypryjan i adna ź jahonych siaścior. «Mnie było tak kiepska, što ja dumaŭ, što chutka pamru», — uspaminaje Cypryjan Mubijała.

Kali jon zastaŭsia ŭ žyvych, jon pahadziŭsia, kab doktar Mujembe vykarystaŭ jahonuju kroŭ dla daśledavańniaŭ.

Navukoŭcy miarkujuć, što moc antycieł u arhaniźmie Cypryjana Mubijały tłumačycca tym, što jon nie tolki sam mocna pierachvareŭ, ale paśla vyzdaraŭleńnia dapamahaŭ svaim svajakam i tym samym sutykaŭsia ź virusam znoŭ i znoŭ.

Niekalki hadoŭ adzin z asistentaŭ doktara Mujembe razam z kamandaj navukoŭcaŭ patracili na toje, kab identyfikavać u arhaniźmie Cypryjana Mubijały antycieły, jakija pieramahli Ebołu. Jany i stali asnovaj srodku mAb114. 

• 0
• 0
• 0
• 0
• 0
• 0
• 0
• 0