Dźmitryjeŭ: Davajcie zrobim usio, što ad nas zaležyć, kab u Biełarusi byŭ novy prezident

Pra heta kandydat u prezidenty Andrej Dźmitryjeŭ zajaviŭ u vystupie na Pieršym nacyjanalnym kanale radyjo. Jon vystupaŭ pa-biełarusku.

«Biełarusi patrebny novy prezident, u vypadku pieramohi, ja pryznaču novyja vybary», — skazaŭ jon.

«Absalutnaja bolšaść biełarusaŭ chočuć novaha prezidenta. U mianie troje dziaciej, i ja baču, jak šmat moładzi źjazdžaje. Heta vielmi horka i prykra. Adna babula skazała mnie, raniej maje dzieci pryjazdžali na leta, a ciapier ja baču ich pa skajpie. Tak nie pavinna być».

Dźmitryjeŭ taksama źviarnuŭ uvahu, što adna ź vialikich prablem — hety čynoŭniki. «Čynoŭniki pavinny pracavać na čałavieka».

Jon nahadaŭ, što ŭ 2015 hodzie Taćciana Karatkievič, jakaja bałaciravałasia ŭ prezidenty, zajaviła, što «Łukašenka stamiŭsia, jamu čas sychodzić».

«Łukašenka zastaŭsia, i my stracili piać hadoŭ. Zamiest raźvićcia i reform atrymali stahnacyju ź viečnaj pakazuchaj, vorahaŭ siarod svaich hramadzian i biezadkaznuju palityku padčas karanavirusa.

Tamu tak važnyja nam hetyja vybary. Kali Łukašenku jość kudy pajści na adpačynak, to nam niama kudy sychodzić. Jašče piać hadoŭ, jak ciapier, mohuć abiarnucca katastrofaj. U nas sprabujuć vybić hlebu z-pad noh, va ŭsich tych, chto choča pieramien, nas nie žadajuć zaŭvažać i zaŭvažać naš vybar. Hetaja kampanija stała ŭžo niby supraćstajańniem, a nie vybarami. Pa kolkaści zatrymańniaŭ — siońnia bolš za 700 — ciskam na apanientaŭ, členaŭ ich kamand, błohieraŭ, palityki siadziać u turmach, abmiežavanyja miescy ahitacyi.

«Mnohija hladziać na heta i ŭžo chočuć machnuć rukoj, nie pajści hałasavać — hetaha ad nas i damahajecca ŭłada. My nie pavinny zdavacca, my pavinny iści napierad. Davajcie razam u zhodzie abjadnoŭvacca. Ja zaklikaju členaŭ CVK i ŭčastkovych kamisij ličyć sumlenna», — skazaŭ Dźmitryjeŭ.

«Adpuścicie palitźviaźniaŭ, viarnicie ich u siemji. Biełarusy talerantnyja, my ŭmiejem žyć u zhodzie.

Dźmitryjeŭ nazvaŭ 10 krokaŭ, jakija jon zrobić, kali jaho abiaruć prezidentam:

— pierachodny ŭrad z alternatyŭnymi kandydatami, my praviadziem ciaham hoda novyja vybary,

— maksimum dva terminy na pasadzie prezidenta, važny padzieł uładaŭ,

— admianić kantraktnuju sistemu, nijakich karotkaterminovych kantraktaŭ,

— siaredniaja piensija nie mienš za 60% ad siaredniaha zarobku, ludzi sumlenna pracavali, im treba zabiaśpiečyć hodnaje žyćcio,

— refarmavać pramysłovyja pradpryjemstvy. Hrošy treba ŭkładać u ludziej. Kali budziem skaračać rabotnikaŭ, to budziem płacić 2/3 zarobku na šeść miesiacaŭ,

— padtrymka małoha i siaredniaha biznesu ŭ małych haradkach,

— skarocim kolkaść čynoŭnikaŭ i praviaralščykaŭ. Praviadziom publičnyja pravierki na pradmiet kumaŭstva,

— pradać bolšaść rezidencyj prezidenta. Karaleva Brytanii nie maje stolki rezidencyj. A kali jeździš pa krainie, možna spynicca i ŭ hateli.

— Dźmitryjeŭ źviarnuŭ uvahu na nieabchodnaść dobraha abstalavańnia rajonnych balnic. U Viciebskaj vobłaści ludzi jeździać rabić MRT u Smalensk. Jon vykazaŭ zaściarohu, što praź niejki čas Biełaruś sutykniecca z «biełaj emihracyjaj», kali buduć źjazdžać ludzi ŭ biełych chałatach.

— vyzvalić nastaŭnika ad niepatrebnych kłopataŭ. Nastaŭnik pavinien vučyć, a nie źbirać hrošy i afarmlać padpisku. Nie — paboram.

«My pabudujem krainu, dzie nichto nie budzie chamić vam, dzie nie buduć manić vam», — skazaŭ Dźmitryjeŭ.

«Ułada pavinna mianiacca. Ale mianiacca mirna, praz vybary. Pavinien być konkurs na pasadu».

«Davajcie zrobim usio, što ad nas zaležyć, kab u Biełarusi byŭ novy prezident. Ja adpracuju termin na pasadzie i budu potym spakojna hladzieć u vočy ludziam, chodziačy pa vulicach».

Zaŭtra ŭ 18.30 Dźmitryjeŭ vystupić na telekanale «Biełaruś-1»

• 0
• 0
• 0
• 0
• 0
• 0
• 0
• 0