18-hadovaja Safija Małaševič, što raśpisała «Rubiažy», u apošnim słovie: Klanusia, Cichan nie zasłuhoŭvaje takoha pakarańnia
U sudzie Kastryčnickaha rajona Minska 21 studzienia praciahnuŭsia razhlad kryminalnaj spravy ŭ dačynieńni da palitviaźniaŭ Safii Małaševič i Cichana Klukača.
Ich abvinavačvajuć u tym, što jany raśpisali bałončykami ščyty śpiecsrodkaŭ zaharody na akcyi pratestu šostaha vieraśnia (č. 2 art. 339 KK RB), a taksama ŭdzielničali ŭ dziejańniach, jakija hruba parušajuć hramadski paradak (art. 342 KK). Akramia taho, Safii Małaševič vystavili abvinavačańnie ŭ publičnaj abrazie prezidenta (art. 368 KK RB).
Praces viadzie sudździa suda Kastryčnickaha rajona Volha Niaborskaja. Dziaržabvinavaŭca — Rudnickaja. Na pieršym pasiadžeńni sud apytaŭ Safiju i Cichana.
Na pasiadžeńni 21 studzienia byli zasłuchanyja materyjały spravy. U tym liku, prahledžanyja videa z telehram-kanałaŭ i telefona Safii. Siarod apošnich — videa z udziełaŭ u maršach, a taksama asabistyja zdymki dziaŭčyny: jana nieadnarazova padkreślivała, što heta nie datyčycca spravy.
Śviedka, supracoŭnik vajennaj častki 3214, jaki ŭ toj dzień bačyŭ Safiju, skazaŭ, što dziaŭčynu było ciažka nie zaŭvažyć: jana była ahresiŭnaja, pahražała, tancavała, pakidała nadpisy.
«Safija tancavała, tamu što ličyła, što šmat ludziej i jana paźbiehnie pakarańnia», — upeŭnieny śviedka.
Taksama supracoŭnik raskazaŭ, što ź dziaŭčynaj byŭ małady čałaviek. Śviedka miarkuje, što jon taksama chacieŭ pisać, jany abmiarkoŭvali heta z Safijaj, ale chtości musiŭ zdymać na videa. Ale razmovu jon nie čuŭ. Spačatku zatrymali chłopca (hetaha śviedka nie bačyŭ), dziaŭčyna padyšła da jaho padnačalenaha sama: u rukach u jaje byŭ bałončyk z farbaj. Jana prasiła, kab chłopca adpuścili, a zatrymali jaje.
Taksama 21 studzienia sudździa vyrašyŭ zakončyć razhladać spravu bieź śviedkaŭ abvinavačańnia — supracoŭnikaŭ milicyi i AMAP, chacia advakaty patrabavali ich vyklikać.
Abvinavačańnie admoviłasia ad abvinavačańnia Cichana Klukača pa č. 2 art. 339. Prakuror zapatrabavaŭ dla chłopca adzin hod i šeść miesiacaŭ pazbaŭleńnia voli ŭ kałonii ahulnaha režymu (pa č. 1 art. 342).
Abvinavačańnie taksama pierakvalifikavała č. 2 art. 339, zhodna ź jakoj abvinavačvajuć Safiju Małaševič, na č. 1 art. 339. Takim čynam, šlacham składańnia pakarańniaŭ pa troch artykułach (č. 1 art. 368, č. 1 art. 342, č. 1 art. 339) dla jaje prakuror zaprasiŭ dva hady pazbaŭleńnia voli ŭ kałonii ahulnaha režymu.
Cichan Klukač u apošnim słovie raskajaŭsia ŭ tym, što ździejśniŭ, i paprasiŭ prabačeńnia ŭ maci i babuli, bo «prynios im šmat hora».
U svaim apošnim słovie palitźniavolenaja Safija Małaševič paprasiła nie karać Cichana.
«Składana kazać, kali ŭ vačach ślozy, ale ja ŭsio ž skažu. Ja chacieła b paprasić sud nie karać jak minimum Cichana: jamu prosta spadabałasia pryhožaja dziaŭčynka, i jon zachacieŭ pravodzić mianie na mitynh.
Jon dziesiać tysiač razoŭ — ja vam klanusia — adhavorvaŭ mianie syści nazad ad płota. Ja dumaju, dvuch miesiacaŭ u SIZA dastatkova, kab zrazumieć, što nikudy chadzić nie treba i da płatoŭ padychodzić taksama nie treba. Ja taksama adsiedzieła dva miesiacy ŭ SIZA i za hety čas zrazumieła, što turma ludziej nijak nie źmienić: jana zrobić tolki horš.
Sa mnoj siadzieli ludzi, jakija ŭžo byli ŭ turmie, i ja hladzieła nie na toje, jakimi jany tudy pryjšli, a na toje, jakimi jany adtul sychodzili — i heta byli nie samyja lepšyja ludzi, jakich ja viedała. Tamu što da hetaha jany byli našmat lepš. Tamu kali vy daścio čałavieku [Cichanu], jaki adzin raz pamyliŭsia — pajšoŭ na mitynh ź dziaŭčynkaj, — hod pazbaŭleńnia voli, naŭrad ci jon stanie lepš.
Ja pryznaju svoj aktyŭny ŭdzieł u mitynhu. Ale ja nie pahadžusia z tym, što maje na ŭvazie hetaja vina, — pakarańniem. Zrazumieła, vy hałoŭnyja, vy pryznačajecie, što ja zasłužyła. Ja pavinna adkazvać za svaje ŭčynki.
Ale ja vam klanusia, što jon [Cichan] nie zasłuhoŭvaje takoha pakarańnia. Vy sud, vy pavinny być spraviadlivymi. Ale jon navat nie dakranaŭsia palcam da płota i bałončyka! Jon bolš nie budzie chadzić na mitynhi — tak, Cichan?
Mnie, viadoma ž, nie chaciełasia b pazbaŭleńnia voli: nie budu siabie abaraniać i vyharodžvać, ale kali vy daścio mnie termin, ja mahu ŭžo nie ŭbačyć babulu. Možna navat dać «chimiju» z pryznačeńniem, ale bolš [termin], čym pazbaŭleńnie voli. Kab było spraviadliva, ale kab ja ŭbačyła babulu».
Vyrak budzie ahučany 22 studzienia ŭ 14:30.
Kamientary