Navukoŭcy vyraścili myšyny embryjon u prabircy da stadyi sercabićcia
Izrailskim navukoŭcam udałosia vyraścić embryjony myšej u łabaratornych umovach da toj stadyi, kali ŭ ich pačali źjaŭlacca kancaviny, raźvivacca kryvianosnaja i niervovaja sistema i navat bicca serca.
Navukoŭcy sprabujuć vyroščvać embryjony sysunoŭ jašče z 1930-ch hadoŭ. Meta takich ekśpierymientaŭ — bolš detalova vyjavić raźvićcio zarodka, što niemahčyma zrabić va ŭłońni maci. Adnak takija daśledavańni adnojčy mohuć uźniać pytańnie, ci maje čałaviek prava vyroščvać žyvioł «u prabircy».
Da hetaha času navukoŭcam paśpiachova ŭdavałasia vyroščvać embryjony sysunoŭ, u tym liku ludziej, da stadyi impłantacyi, kali ŭ embryjona pačynaje farmiravacca płacenta.
Adnak padtrymlivać takija embryjony ŭdavałasia tolki na praciahu 24 hadzin, paśla čaho, jak praviła, embryjony hinuć abo ŭ ich pačynajucca anamalii raźvićcia, bo jany nie mohuć raźvivacca biez ułońnia maci, piša The New York Times.
Izrailskija navukoŭcy ź Instytuta Viejcmana ažyćciavili praryŭ u hetych ekśpierymientach. Daśledčyki vydalali myšynyja embryjony z samki na piaty dzień jaje ciažarnaści, a zatym vyroščvali ich na praciahu šaści dzion u štučnaj matcy.
Ciažarnaść myšy doŭžycca kala 20 dzion, tamu na adzinaccaty dzień u embryjona ŭžo pačało bicca serca. Daśledčykam udałosia vyraścić kala 1000 takich embryjonaŭ.
Paźniej navukoŭcy pačali adrazu brać apłodnienyja jajcakletki, kali jany jašče nie pačali raźvivacca va ŭłońni samki, i vyroščvać ich u štučnych umovach na praciahu 11 dzion.
Na stvareńnie štučnaj matki navukoŭcam spatrebiłasia kala 7 hadoŭ. Jana ŭjaŭlaje saboj sistemu ź inkubataraŭ, pažyŭnych rečyvaŭ i vientylacyi.
Embryjony raźmiaščajuć u šklanyja fłakony, jakija znachodziacca ŭnutry inkubataraŭ, dzie jany płavajuć u admysłovaj pažyŭnoj vadkaści. Fłakony prymacoŭvajuć da koła, jakoje pavolna krucicca, kab embryjony nie datykalisia da ścienak, bo ad hetaha jany źmianiajuć formu i pamirajuć.
Inkubatary złučajuć ź vientylacyjnaj sistemaj, jakaja padaje embryjonam kisłarod i vuhlakisły haz, kantraluje ich kancentracyju, a taksama cisk.
Na adzinaccaty dzień navukoŭcy paraŭnali štučna vyraščanyja embryjony z tymi, jakija raźvivalisia ŭ matkach žyvych myšej. Łabaratornyja embryjony byli identyčnymi z sapraŭdnymi.
Adnak na hetaj stadyi raźvićcia embryjony stanoviacca zavialikimi, kab vyžyć biez kryviezabieśpiačeńnia, a pažyŭnoha rastvoru było ŭžo niedastatkova.
Pieraadoleńnie hetaj pieraškody — nastupnaja meta navukoŭcaŭ.
Ciapier čytajuć
Biełaruskija repietytary ŭ panicy: praz prablemy «Jandeksa» jany mohuć zhubić materyjały, jakija napracoŭvali hadami8
Kamientary