Biełaruski akcyjanist Kuźmič sprabavaŭ zaleźci ŭ Jelisiejski pałac u Paryžy z butelkaj, jaho zatrymali
Razam ź im zatrymali jašče dvuch čałaviek.
1 krasavika pasiarod dnia mužčyna sprabavaŭ praniknuć u dvor prezidenckaha pałaca ŭ Paryžy. Padčas sproby ŭźleźci na vysoki płot vakoł rezidencyi mužčyna mieŭ z saboj butelku z vadkaściu i kavałak tkaniny, papiarednie padpaleny. Hetym čałaviekam byŭ biełaruski mastak Alaksiej Kuźmič, jaki vyjechaŭ z krainy paśla prezidenckich vybarach, padčas jakich jon ažyćciaviŭ pierformans prosta na vulicy.
Zhadanaha čałavieka supravadžała para, jakaja rabiła fota i videa ź miesca zdareńnia. Troje byli ŭziatyja pad vartu za «naŭmysny hvałt sa zbrojaj», piša francuzskaja hazieta «Fiharo».
Rasśledavańnie było daručanaje padraździaleńniu, jakoje zajmajecca kryminalnymi złačynstvami. Palicyja budzie vyśviatlać, ci była kinutaja butelka z zapalnaj vadkaściu, ci čałaviek jaje prosta ŭpuściŭ.
«Fiharo» piša, što vadkaść u butelcy nie była niebiaśpiečnaj, a mužčyna śćviardžaje ŭ svajo apraŭdańnie, što jon artyst i nie žadaŭ učyniać hvałtoŭnaha aktu.
Pierad tym, jak zładzić hety pierformans, mastak źmiaściŭ pasłańnie ŭ fejsbuku (pa-francuzsku) i instahramie (u pierakładzie na rasijskuju).
«Siońnia ja pryjšoŭ ździejśnić revalucyju… Na vohniščy padmanu połymiem hienacydu siońnia ŭ centry Jeŭropy zharaje adna nievialikaja kraina. U joj žyvie samy ciarplivy ŭ śviecie narod i samyja złyja bandyty… Dzie ŭ adkaz na miarzoćcie hvałtaŭnikoŭ ludzi, ustajučy na łavu, zdymajuć abutak».
U poŭnym patetyki pasłańni Kuźmič abvinavačvaje prezidenta Makrona ŭ tym, što Francyja taksama kocicca da fašyzmu i stanovicca «padobnaj da Biełarusi».
«My źviartalisia da sumleńnia pačvar, nie dumajučy, što jano dla ich inšarodnaje», — piša Kuźmič.
«Pratest stanaviŭsia piknikom. Kaktejli Mołatava ŭ našych rukach byli zapraŭlenyja luboŭju dačok, žonak i maciarej», — praciahvaje Kuźmič.
«Abudžeńnie rozumaŭ razburyć turmy. I mir pryjdzie na ziamlu, bo spraviadlivaść zaŭsiody pieramahaje», — piša biełaruski mastak-akcyjanist (francuzski tekst pasłańnia krychu adroźnivajecca ad rasijskamoŭnaha).
U Minsku adbylisia masavyja zatrymańni vydaŭcoŭ i kniharaspaŭsiudnikaŭ33
Kamientary