Hiensiekam NATA upieršyniu moža stać žančyna. Najbolš imaviernuju kandydatku paśpieŭ abniać Łukašenka
Mandat siońniašniaha hiensieka Jiensa Stołtenbierha skončvajecca ŭ 2022 hodzie.
Pavodle jaho pažadańnia, nastupnym kiraŭnikom arhanizacyi ŭpieršyniu za 70 hadoŭ isnavańnia NATA musić stać žančyna. Vialikija šancy ŭ Kalindy Hrabar-Kitarovič, jakaja była prezidentam Charvatyi, paviedamlaje Politico. Jana znajomaja z Łukašenkam, na adnoj z sustreč jon dazvoliŭ sabie pakłaści ruku joj na plačo.
Hałoŭnyja pieravahi Kalindy Hrabar-Kitarovič — vopyt pracy pamočnikam hiensieka NATA z 2011 pa 2014 hady, a taksama dypłamatyčnaja karjera: pasady ministra zamiežnych spraŭ, ministra Jeŭropy i pasła ŭ ZŠA, z 2015 pa 2020 jana była prezidentam Charvatyi.
Padčas prezidenctva Kitarovič padtrymlivała palityku strymlivańnia adnosna Rasii, ale heta nie pieraškodziła jej naviedać finał Čampijanatu śvietu pa futbole ŭ Maskvie ŭ 2018 hodzie, dzie kamanda Charvatyi sastupiła Francyi ź likam 4:2.
Apranutaja ŭ cišotku nacyjanalnaj zbornaj, Kitarovič stała chiba ci nie samaj jaskravaj zaŭziatarkaj. Paśla matču Kitarovič paznajemiłasia z Łukašenkam, dzie toj ŭ kułuarach dazvoliŭ sabie pakłaści ruku joj na plačo. Dziaržaŭnyja biełaruskija ŚMI nazvali heta «razmovaj u ciopłaj i siabroŭskaj abstanoŭcy».
Adnak naŭrad ci tyja heta budzie spryjać Łukašenku: praz represii ŭ krainie Paŭnočnaatłantyčny aljans razhladaje ŭłady Biełarusi jak krynicu rehijanalnaj destabilizacyi, pieraściarahajučy ich ad ahresii suprać Litvy ci Polščy. Łukašenka, u svaju čarhu, abvinavačvaje NATA ŭ namiery akupavać Biełaruś.
U śpisie kandydataŭ na pasadu hiensieka NATA taksama prysutničaje byłaja prezident Litvy Dala Hrybaŭskajte. Ale kandydat ad Litvy ličycca nadta varožaj da Rasii ŭ čas, kali Džo Bajden imkniecca stabilizavać adnosiny z Maskvoj. Tak što jaje šancy nievialikija.
Peŭnyja šancy maje taksama prezident Estonii Kierści Kaljułajd, chacia jaje śpiecyjalizacyja bolš padychodzić da pracy z ekanomikaj. Inšymi kandydatami na pasadu hiensieka NATA nazyvajuć italjanku Fiederyku Mahieryni, ministra zamiežnych spraŭ Bielhii Safi Vilmies i premjera Nidzierłandaŭ Marka Rute.
U lubym razie, značnaha ŭpłyvu na palityku NATA va Uschodniaj Jeŭropie čakać nie varta.
Klučavyja rašeńni ŭ Aljansie prymajuć krainy-čalcy, na padstavie pracedur. Hiensiek vykonvaje pradstaŭničuju funkcyju, ahučvaje supolnuju palityku błoku, dapamahaje šukać rašeńni sprečnych pytańniaŭ.
Tamu nacyjanalnaja prynaležnaść hiensieka prynosić svaim krainam tolki simvaličnuju karyść.
Kamientary