Čaj plus 18%, ahurki — 40%. Jak źmianilisia cieny na pradukty paśla admieny dziaržrehulavańnia
Litaralna tydzień tamu, 15 śniežnia ŭłady amal udvaja skaracili pieralik sacyjalna značnych tavaraŭ. Pahladzieli, jak źmianilisia ceny na pradukty, paśla taho jak ich pierastali strymlivać.
Ceny my zafiksavali jašče 29 listapada, kali ŭłady tolki abviaścili ab płanach skaracić pieralik. Dla paraŭnańnia bralisia ličby, pryviedzienyja na sajcie «Je-dastaŭki». My prasačyli vahańnie cen na tavary adnoj marki i roŭnaj fasoŭki, dla inšych brendaŭ jana moža adroźnivacca.
Na bolšaść tavaraŭ, jakija pierastali być sacyjalna značnymi, ceny nie źmianilisia. Ale niekalki pazicyj zaŭvažna padaraželi.
Tak, kitajski časnok prybaviŭ u canie 4,2% (raniej jon pradavaŭsia pa 9,59 rubla za kh, ciapier pa 9,99). Tušanaja śvinina ŭ kansiervach (my brali Biarozaŭskaha miasakambinata) plus 4,8% — raniej 3,53 rubla, ciapier 3,70.
Kava padaražeła na 8,5%. Pačak raspuščalnaha «Neskafe kłasik» (100 hramaŭ) možna było kupić za 4,23 rubla, siońnia — za 4,59.
Istotna padskočyła cana na čaj — ažno na 18,5%. Paraŭnajcie sami: 100 hramaŭ listavoha čornaha čaju Tell's pradavali za 1,78 rubla, a ciapier za 2,11.
Na 21,8% padaražeła haspadarčaje myła. Toje, što my brali («Chelen» ź limonam), raniej kaštavała 1,19 rubla, ciapier 1,45.
Ale lidaram pa rostu cen akazalisia ahurki — plus 39,6%. U kancy listapada hładkija rasijskija addavali pa 4,79 rubla za kiło. Siońnia jany ž vystaŭlenyja pa 6,69. Varta skazać, što darahija ahurki ŭ kancy hoda — typovaja źjava. Letaś, naprykład, miesiačny rost cen na ich u śniežni byŭ jašče bolšym, plus 55% (zhodna ź Biełstatam).
Rezkaje padaražańnie praduktaŭ sioleta nazirajecca va ŭsim śviecie. Ceny na ježu stali samymi vysokimi za apošnija 46 hod. Hetamu jość niekalki pryčyn: kavid, jaki vyklikaŭ prablemy z pastaŭkami, niedachop pracoŭnaj siły, niespryjalnyja ŭmovy nadvorja, enierhietyčny kryzis.
U Biełarusi abmiažoŭvać ceny pačali z kanca lutaha. Tady ŭ śpisie byli 62 tavary, i pavyšać ceny na ich dazvalałasia nie bolš čym na 0,2% u miesiac.
Ciapier sacyjalna značnych tavaraŭ 29. U hetym śpisie zastalisia, naprykład, cukar, bulba, kapusta, miasa (aproč biaskosnaha), małako, jajki, tvaroh, syr, chleb, muka, dziciačaje charčavańnie. U śniežni-lutym rost cen na ich moža być maksimum 0,9% u miesiac, u sakaviku-śniežni — 0,3%.
Kamientary