Trahikamiedyja na budoŭli «Hazpram-Centra»: abstalavańnie na $20 miljonaŭ sapsavałasia
My ŭžo paviedamlali, što niadaŭna «Hazpram transhaz Biełaruś» kančatkova prajhraŭ sud na $30 miljonaŭ sierbskaj kampanii-pastaŭščyku abstalavańnia dla enierhacentra. Ale ciapier vakoł hetaj historyi razharajecca skandał. Krynicy «Naša Nivy» raskazali pra novyja detali hetaha šmatmiljonnaha kantrakta.
Nahadajem, vializny kompleks «Hazpram-centra» chacieli zabiaśpiečvać enierhijaj z dapamohaj svajoj mini-TEC. Ź niekalkich kancepcyj realizacyi hetaj TEC vybrali rašeńnie na bazie hazavych turbin. Zajmacca hetym miełasia sierbskaja kampanija «Enierhaprajekt Aprema».
«U ideale płanavałasia, što abstalavańnie kupić sam «Hazpram-Transhaz», dalej vyzvalicca ad pošlin i PDV zhodna sa śpiecukazam, a zatym pieradaść jaho sierbam tolki dla mantažu, — raskazvajuć surazmoŭcy. — Ale niešta pajšło nie tak, i sierby sami kupili abstalavańnie i dastavili jaho na placoŭku dla mantažu. Što taksama pavialičyła vydatki, bo dla sierbskaj «dački» vyzvaleńnia ad pošlin i PDV praduhledžanaje nie było».
Pa słovach našych surazmoŭcaŭ, niedzie ŭ hety čas vyjavilisia chiby ŭ prajekcie ŭsiaho kompleksu, zabuksavała i budaŭnictva TEC. Sierbam pierastali pravodzić płaciažy, prapanavali zabrać abstalavańnie i źmirycca.
Tyja admovilisia. Pakolki «Hazpram-Transhaz» sam spyniŭ budaŭnictva, a abaviazki pa pakupcy abstalavańnia byli vykananyja sierbami ŭ poŭnym abjomie, jany padali isk u arbitraž z patrabavańniem kampiensavać vydatki.
«Načalstva «Hazpram-Transhazu» ličyła, što jany abaviazkova pieramohuć u sudzie, — kaža naša krynica. — I navat paśla pieršaha zvanočka, projhryša ŭ Stakholmie, jany praciahvali vieryć, što budzie paśpiachovaja apielacyja, tamu što «sud nie ŭličyŭ važnych abstavin».
Uvieś hety čas abstalavańnie prastojvaje: razhlad u Stakholmie doŭhi, a źvierchu jašče nakłaŭsia kavid, i terminy zaciahnulisia. A pakolki umovy zachoŭvańnia nie adpaviadali tym, što praduhledžanyja instrukcyjaj, abstalavańnie stała psavacca.
«Techniku ŭhrobili, dobraja pałova jaje ŭžo nie ŭjaŭlaje pramysłovaj kaštoŭnaści, a košt ramontu druhoj pałovy suvymierny z canoj pakupki novaj, — dadajuć krynicy. — Ciapier skłałasia kamičnaja situacyja: na dniach u «Hazpram-Transhazie» sfarmavanaja kamisija pa pryjomcy mietałałomu ŭ samich siabie. Enerhietyki «Hazpram-Transhazu» łamajuć hałavu, kudy dziavać hety mietałałom i jak adčytvacca pierad Maskvoj.
Bo za hety čas źmianiłasia prajektnaje rašeńnie, i novy hienieralny padradčyk uzhadniŭ prajekt mini TEC nie na hazavaj turbinie — adpaviedna, u Minsku heta ŭsio ŭžo nie patrebnaje. Zrešty, i budoŭla staić. A na inšy prajekt praz techničny stan heta ŭsio taksama nie adpraviš. Karaciej, nazirajem».
Kamientary