Biełarus z fejkavaj pošty razasłaŭ u škoły listy z patrabavańniem pravieści abmierkavańnie Kanstytucyi. I atrymaŭ spravazdaču
Z elektronnaj pošty «Hramadskaj dyjałohavaj placoŭki pa abmierkavańni źmienaŭ u Kanstytucyju» biełarus razasłaŭ list u minskija škoły z patrabavańniem arhanizavać ciaham čatyroch hadzin dyjałohavuju placoŭku z pradstaŭnikami «Biełaj Rusi», «BRSM» i administracyi, ź dziaržaŭnaj simvolikaj.
U vyniku adna sa škoł bieśpiarečna vykanała pastaŭlenuju zadaču ŭ pracoŭny čas i prysłała fotaspravazdaču, pišuć pravaabaroncy.
Supracoŭniki ŭstanovy adukacyi arhanizavali fotasiesiju na fonie dziaržaŭnych ściaha, hierba, simvoliki Minska, ekrana z Kanstytucyjaj i z hazietaj «Biełaruś siehodnia» ad 29 studzienia.
Akazałasia, što aŭtar rozyhryšu małady nastaŭnik ź Minska Uładzisłaŭ, vymušany źjechać u Polšču ad palityčnaha pieraśledu. Takim čynam jon vyrašyŭ razyhrać administracyju škoły, u jakoj raniej pracavaŭ, piša Reform.by.
Uładzisłaŭ źjaŭlajecca mastakom i rasceńvaje svaje dziejańni jak mastacki pierfomans. Letaś maładoha čałavieka zatrymali supracoŭniki HUBAZiK, ale paśla dopytu nie zmahli pastavić jamu ničoha ŭ vinu, akramia «niepadparadkavańnia supracoŭnikam orhanaŭ». Nastaŭnik byŭ adpuščany dadomu da suda i nieadkładna vyjechaŭ z krainy. Dyrektar škoły, ź jakoj jon nie paśpieŭ zvolnicca da adjezdu, nie zastałasia abyjakavaj da hetaj situacyi.
— Jana niekalki miesiacaŭ šukała farmalnaści, kab mianie nie zvalniać, nie viartać dypłom i pracoŭnuju, i ŭvieś čas telefanavała ŭ RUUS, kab mianie šukali. Učastkovy kožny raz prychodziŭ da maci pa miescy majoj prapiski i pytaŭsia, kudy ja dzieŭsia, tamu što jaho dastaŭ dyrektar škoły, u jakoj ja pracavaŭ — raspavioŭ małady čałaviek Reform.by.
Apynuŭšysia za miažoj, Uładzisłaŭ vyrašyŭ pažartavać z dyrektara škoły: stvaryŭ fejkavuju poštu i, pradstaviŭšysia «kaardynataram dyjałohavych placovak», napisaŭ list ab nieabchodnaści arhanizavać na bazie škoły «dyjałohavuju placoŭku pa abmierkavańni źmianieńniaŭ u Kanstytucyju».
Dyrektar škoły, jakaja pryvykła pa pieršym patrabavańni ładzić palityčnyja mierapryjemstvy, vykanała zadańnie, a fotaspravazdaču adpraviła na fejkavuju poštu. Akramia administracyi škoły, u abmierkavańni Kanstytucyi ŭdzielničali: staršynia prafsajuznaj piarvički, staršynia piarvički «Biełaja Ruś», sakratar BRSM i adna interaktyŭnaja doška.
Varta adznačyć, što kančatkovyja praŭki ŭładami ŭniesienyja i prajekt Kanstytucyi ŭžo vyniesieny na refierendum.
- Kali ščyra, ja mała cikaviŭsia abmierkavańniem papravak — pryznajecca Uładzisłaŭ. — Ale, viedajučy, jakija ludzi pracujuć u škołach, vyrašyŭ, što jany kupiacca. Naŭrad ci jany sami hetym pytańniem zadavalisia. U škołach, ja miarkuju, zastalisia tolki tyja, chto nie dumaje, a vykonvaje.
Jahor Lebiadok: Usio bolš zaŭvažnaja sproba adnavić vobraz Łukašenki jak žychara nieba, a nie radavoha čynoŭnika
«Dla biełaruskich uładaŭ ja, chutčej, mahčymaść, a nie pahroza». Kaleśnikava dała vialikaje intervju Zołatavaj92
Kamientary