«My razam. My doma». Chto takaja Alena Zialenskaja — pieršaja łedzi Ukrainy
Niezadoŭha da 16 lutaha prezident Ukrainy Uładzimir Zialenski zapisaŭ karotkaje videa. U im jon vykazaŭ namier abviaścić 16 lutaha, mierkavany dzień rasijskaha napadu na Ukrainu, dniom jadnańnia krainy, i raspavioŭ, što nikudy nie źjazdžaje. Razam ź Zialenskim u roliku źjaviłasia jaho žonka Alena.
Zialenskaja stała pieršaj łedzi Ukrainy ŭ 2019 hodzie. Alena vučyłasia sa svaim budučym mužam u paralelnych kłasach škoły, ale na toj čas jany byli prosta siabrami.
Budučyja muž i žonka pačali kantaktavać bližej, kali Alena vučyłasia na budaŭničym fakultecie Kryvarožskaha nacyjanalnaha ŭniviersiteta. 6 vieraśnia 2003 hoda, praz 8 hadoŭ adnosin, para narešcie zaklučyła šlub. Ciapier jany hadujuć dvaich dziaciej — 16-hadovuju Alaksandru i 8-hadovaha Kiryła.
Niadoŭhi čas Alena pracavała architektaram, ale paźniej pieraklučyłasia na pracu scenarystki ŭ Studyi «Kvartał-95». Jana taksama była adnoj z aŭtarak scenara kultavaha sieryjała «Słuha naroda», jaki i padšturchnuŭ Uładzimira Zialenskaha pačać palityčnuju karjeru.
Alena Zialenskaja ŭvachodzić u top samych upłyvovych žančyn Ukrainy pa viersii časopisa «Fokus» (2-je miesca). Niekatoryja śćviardžajuć, što Alena nie vartaja takoj uvahi, bo časta znachodzicca ŭ ciani svajho muža. Jaje abvinavačvajuć u tym, što jana nibyta redka daje intervju — ale jašče padčas pieradvybarčaj kampanii muža Zialenskaja paviedamiła, što budzie zastavacca ŭ baku ad uvahi miedyja.
Pieršaja łedzi Ukrainy redka niešta raić svajmu mužu. Siarod rekamiendacyj, jakija jana jamu dała, — paźbiahać hutarak z žurnalistami, kali heta tolki mahčyma.
Zialenskaja i sama datrymlivajecca hetaj pazicyi. Adno sa svaich niešmatlikich intervju jana dała vydańniu Diplomatic Courier, u razmovie ź jakim padkreśliła važnaść roŭnaści žančyn i pašyreńnia ich mahčymaściaŭ. Alena taksama ŭchvaliła pracu svajho muža, jaki padpisaŭ dekret z metaj pieraduchilać i vykaraniać chatni hvałt i hvałt, zasnavany na pałavoj prynaležnaści čałavieka. Siarod inšych temaŭ razmovy byŭ kavid (Alena chvareła na jaho i lažała ŭ špitali z uskładnieńniami) i navat harderob pieršaj łedzi.
A voś pytańnie adnosin z Rasijaj i mahčymaj vajny ŭkrainka nie ŭzdymała da apošniaha času ni ŭ intervju, ni ŭ svaich sacsietkach. Jano ŭźnikła tolki ŭ karotkim videa, apublikavanym uviečary 14 lutaha, napiaredadni mierkavanych dat rasijskaha ŭvarvańnia va Ukrainu. Pry kancy taho rolika razam sa svaim mužam Alena skazała: «My razam. My doma. My va Ukrainie».
Kamientary